Версия для печати
Понедельник, 04 Декабрь 2017 04:05

Кесиптик лицейлерде

Тойчу Алтыбаев атындагы №113 кесиптик лицейдин директору Гүлзада Эшалиева:

«Бизге келечегин ойлогон көрөгөч жаштар келет»

- ЖОЖдо окуп жаткан студенттердин көпчүлүгү ата-энеси тандаган же көп акча таба турган кесипте окуп жатышат. Алар окуу жайды бүтөрү менен эле иш менен камсыз кылынса жакшы нерсе деңизчи. Бирок биздин мамлекетте азырынча андай мүмкүнчүлүк жок. Дипломду эптеп алышса, анан чет өлкөгө барып кара жумушта иштеп калышат. Мен дайыма окуу жайлар абитуренттерди кабыл алууда план менен иштеши керек деген оюмду айтып келем. Маселен канча банкир, канча экономист, канча юрист керек, ошого жараша кадр даярдап чыгарса. Канчалаган ата-эненин акчасы жөн эле чачылып жатат: окууга кеткен контракт, жол кире акысы, тамак-аш, кийим кечесине. Төрт жылда канча деген акча сарпталат. Эгерде бала окуп, өз кесибинин мыкты адиси болсо башка кеп. Анда кубанабыз, тилекке каршы, андай эмес, жогоруда айтканымдай эптеп эле дипломду алуунун жолун издеп калышкан жаш достор. Ал эмес бизге Орусиядан чалып алышып акча менен бир сертификат бүтүрүп бере коюңуз дешет. Бул көрүнүш мамлекетибиздин келечеги үчүн чоң коркунуч десек болот. ЖОЖдо окууга каршы эмесмин. Бирок, «ашык дөөлөт баш жарбайт» дегендей, студенттер сабактан кийин ар кандай курстарга катышып экинчи бир кесип ээси болуп калууга умтулушса жакшы болмок. Айрымдардын чын эле акча каражаты жетишпейт. Ошондуктан окуу программасына киргизүүнү сунуштап келебиз.

 Биздин окуу жайда ашпозчу, чачтарач, тигүүчүлүккө даярдалат. 1 айдан баштап 10 айга чейин окутабыз. 10 айлык окууга 30 жашка чейинкилерди кабыл алабыз. Ал эми 3 айлык менен 1 айлыкка жашы чектелбейт. 60, 50гө чыгып калган эже-агаларыбыз келип окуп кетишет. 10 айлык окуу курсубуз бюджеттик негизде болгону үчүн окууга кабыл алууда тест тапшырышат. Тестте окуучунун дүйнө таанымын, кыргыз тилин, маданиятын канчалык деңгээлде билерин текшеребиз. Тест ошого ылайыкталып түзүлөт. Ал эми 3 айлык окуу эки жол менен акысыз окутулат. Биринчиси, шаардык иш менен камсыз кылууга көмөктөшүү башкармалыгы менен иштешебиз. Аларга кайрылган жарандар «кесибимди өзгөртөм, кесибим боюнча жумуш жок экен» деген түрдүү себептер менен кайрылышат. Башкармалык бизге жолдомо берет, алар бизге келип башкармалыктын каржылоосунда акысыз окуй алышат. Башкармалыкка барган жарандардын шаарда каттоосу болуусу шарт. Экинчи жолу акыркы үч жылдан бери Азия өнүктүрүү банкынын долбоорун утуп алып, ошол долбоордун негизинде акысыз окутабыз. Алар окуучунун практикасына кеткен материалдарды, ашпозчунун азык-түлүгүнөн бери алып беришет. Бир жума теория, бир жума практика жүзүндө окушат. Мен бул окуу жайдын директору катары бизге келечегин ойлогон, көрөгөч, мыкты жаштар келет деп ишеничтүү айта алам. Бир эмес эки кесиптин ээси болуп, өз келечегин ойлогон жаштар барган сайын көбөйүп бара жатат. Бул нерсеге кубанбай коюуга болбойт.

Бактыгүл Калдарбай кызы

 

 

Окулду 2432 жолу