«Төрт тарабы төп келишкен, ар тараптан ийгиликтүү, бактылуу жашоого  эмнелер арналса анын баары бул адамда бар. Тарбиясын көрүп ата-энесине ыраазы болосуӊ. Ишинин майын чыгара иштеген так, жоопкерчиликтүү жетекчи экени айтпаса да көрүнүп турат», бул жөн гана мактоо сөз эмес, бул инсан менен маектешүүдөн кийинки ар бир адамдын ага арнаган менчик мүнөздөмөсү.   «Бейне» рубрикабыздын бул жолку коногу - Оштогу атайын оорукананын директору Ташполотов Кыялбек Жаныбекович.

Каарман тууралуу:

Ташполотов Кыялбек Жаныбекович 1978-жылы 29-майда Ош шаарында төрөлгөн. Yй-бүлөдө 10 бир туугандын бешинчиси. Атасы маркум Жаныбек Ташполотов өмүр бою ревизор болуп иштеп, балдарын тактыкка, жоопкерчиликке тарбиялаган. Орто мектепти жакшы окуп, өз күчү менен Ош мамлекеттик университетинин медициналык факультетине жогорку балл менен кабыл алынган. Жогорку даражадагы анестезиолог, реаниматолог. Жаш болсо да мыкты жетишкендиктери үчүн өкмөттүн сыйлыктарына ээ болгон. Учурда  кандидаттыгын жактоону көздөп, илимдин үстүндө иштеп жаткан кези. Yй-бүлөлүү, 6 баланын атасы.

«Туугандар мени «атаӊа окшошсуӊ» дешет»

- Ата-энем Өзгөн районунун Жалпак-Таш айылынан болушат. Атам Ош шаарында ревизор болуп иштеп калгандыктан, биз Ошто төрөлүптүрбүз. Бирок атам бизди айылдын иштерин билип чоӊоюшсун, турмушка бышсын, кыргыздын нукура жашоосун башынан өткөрүшсүн деп каникул болор замат айылга алып барып койчу. Ал жакта чөп чаап, мал кайтарып, эгин карап, айыл турмушун толук көрүп өстүк. Атам 20 жылдай ревизор болуп иштеди. Андан сырткары көп жыл жетекчинин орун басары болуп эмгектенди. Өкмөттүн акчалары кайдан келип, кайда кетип жатканын жакшы билгендиктен, мамлекеттин акчасын жеген жетекчилердин жазаларын көргөндүктөн, «мамлекеттин казынасына, акчасына тийбегиле, алдабагыла, уурдабагыла. Эл менен мамилеӊер түз болсун» деп көп айтчу. Ойлосом атам бизди жаштайыбыздан эле жетекчиликке тарбиялаган экен. 2003-жылы оорудан улам каза болду. Биздин ийгиликтерибизди, ата тарбиясы менен иш алып барып жаткандарыбызды көрбөй калды. Туугандар, атамды жакшы тааныган кишилер мени «атаӊа окшошсуӊ» дешет. Ал эми апам көп жыл почта кызматкери болуп иштеген. Азыр төрүбүздүн көркү болуп ардактуу эс алууда.

«Орто билимди 3 мектептен алгам»

- Атам жакшы кызматта иштегендиктен балалыгыбыз жакшы көз ирмемдер менен өттү. 1986-жылы 1-класс болуп, Гагарин атындагы мектептин босогосун аттагам. Ал жерде 3-класска чейин окугандан кийин үй-бүлөбүздө адам саны көбөйгөнгө байланыштуу мамлекет атама Төлөйкөн кичи районунан 3 бөлмөлүү батир берген. Ал жакка көчүп кетип, окуубузду «Кыргызстандын 60 жылдыгы» мектебинде уланттык. Ал жерде 7-класска чейин окуп, анан Керме-Тоо мектебинде билим алып, окууну аяктадым. Кесип тандоодо медицина тармагына токтолуп, экзаменде жогорку балл менен окууга кабыл алынгам. Жогорку окуу жайды 2001-жылы аяктап, ошол эле жылы Бишкектеги дарыгерлердин билимин өркүндөтүү жана кайра даярдоо институтунда 2 жыл окуп, анестезиология жана реанимация боюнча клиникалык ординатурамды окуп келгем.

«Бир туугандарымдын ичинде таланттуулар көп»

- Yй-бүлөдө 10 бир тууганбыз. 4 уул, 6 кыз. Эки агам, бир эжем, бир иним, беш карындашым бар. Бир агам юрист, бир агам экономист, иним бизнес тармагында жүрөт. Эже, карындаштарым үй-бүлөлүү. Балдары, жолдоштору менен бактылуу өмүр сүрүп жатышат. Атам комузду аябай жакшы чертчү, кээде ырдап калчу. Ошондон уламбы, бир туугандарымдын арасында таланттуулар көп. Агаларым аябай жакшы ырдашат, аккордеондо, ямаха, пианинодо ойношот. Негедир мага ошондой талант буюрбаптыр.

«Балдарымдын жакшы маанайынан, күлкүсүнөн эс алам»

- 2006-жылы үйлөндүм. Келинчегим Жазгүл Сулайманова Кара-Суу районунан болот. 1-курста окуп жатканында эле таанышып, жылдызыбыз келишип  үйлөнүп алгам. Аябай жакшы жердин кызы. 2-курс болгон кезинде эгиз төрөп, бала караш керек болуп окуусун токтотуп турганбыз. Азыр 6 балабыз бар. Чоӊдору - эгиз кыздарым 6-класста окушат. Келинчегимдин окуусун кайрадан уланттык, азыр студент болуп билимин жогорулатып жаткан кези. Менин жумушумду түшүнүп, үйдөгү тиричиликти кылып, 6 баланы татыктуу багып жатканына ыраазы болом. Жумуштан чарчасам бала-чакам менен бир дасторкондо отуруп, алардын жакшы маанайын, күлгөнүн көргөндөн сонун эс алам. Убактымдын көбү жумушума арналганы менен оюмда көбүнчө балдарымдын тарбиясы, билими, келечеги болот. Жакшы адам болуп чоӊоюшса экен деп көп ойлоном. Алардын билимине, кошумча сабактарына жакшы маани берем. Музыка жакшы нерсе го, эгиздеримдин бири комузга, бири скрипкага барат. Ал эми уулум спорт боюнча машыгат. Андан кийинкилери кичинекей.

«Күндүзү да, түнү да иштеген учурлар болду»

- 2003-жылы облустук оорукананын анестезиология жана реанимация бөлүмүнө врач-дарыгер болуп жумушка кирип, ал жерде 2012-жылга чейин иштедим. 2012-жылы бул жерге Абдымомунов Токтомамат Сапарович жетекчи болуп келип, мени орун басарлыкка чакырган. Ал киши өтө билимдүү, иштин көзүн билген, үлгүлүү жактары көп адам эле. Андан тажрыйба топтоп калуу, тарбия алуу максатында сунушун кабыл алып, бул жакка орун басар болуп келгем. Ошол эле убакта облустук оорукананын анестезиология жана реанимация бөлүмүндө түнкү кезекке күзөтчү дарыгер болуп иштегем. 2014-жылы  Токтомамат Сапарович катуу оорудан улам көз жумду. Ордуна 9 ай милдетин аткаруучу болуп иштедим. 2015-жылы июль айында жетекчилик кызматка дайындашты. Мына ошондон бери директорлук кызматты аркалап келе жатам.

Учурунда дүӊгүрөп, жалаӊ гана атка минерлер дарыланчу бул оорукана бир кездерде сынын жоготуп, каралбай, адам баспай жаман абалга келген. Аны маркум Токтомамат Абдымомунов бир аз алдыга сүйрөп келе жатып, оорудан улам каза болуп кете берди. Ал эми азыркы учуру көз кубантарлык. Дарыланат элем деп оорукананын эшигин каккан бейтаптар батпай, кезегин күтүшүп, убакыт санап калган учур.

«Токтомамат Сапаровичтен көп тарбия алдым»

- Токтомамат Абдымомунов жетекчи болуп келгенде бул жер такыр каралбай калган эле. Дарыланууга эч ким келбей, жумуш системасы, оорукананын ичи, сырты баары өтө начар абалга келип калган экен. Токтомамат Сапарович көп жерге сөзү өтүмдүү, абройлуу киши болгондуктан Ош-Жалал-Абадды калыбына келтирүү дирекциясынан бир аз каражат бөлдүрүп оӊдоп-түзөө иштерин баштаганбыз. Ал кишиден көп тарбия алдым, менеджерликти, жакшы жетектөөнү үйрөттү. Азыр кудайга шүгүр, акырындык менен алдыга жылып, өзү каражат таап, өзүн камсыздаган абалга жетип калдык. Алдыда дагы чоӊ пландарыбыз бар. Эӊ алдыӊкы ооруканалардын катарына жетүүгө аракет кылабыз. Кызматты ишенип тапшыргандан кийин элдин ишенимине ээ болуубуз керек.

Уулбү Каныбекова

Фото: Сыдык Токонов

(Айрым сүрөттөр каармандын жеке архивинен алынды)