5-февралда Ош шаарынын 2019-жылга бекитиле турган бюджети коомдук угууга коюлду.

Коомдук угууга Ош шаардык Кеӊешинин төрагасы Жапар Ормонов, биринчи вице-мэр Саибжан Турдуев, бюджет, экономика жана өнөр жай маселелери боюнча туруктуу депутаттык комиссиянын төрагасы Акбарали Батыров,  шаардык Кеӊештин депутаттары, бейөкмөт уюмдардын өкүлдөрү, мекеме-ишканалардын жетекчилери, шаар тургундары менен ММК өкүлдөрү катышышты.

«Быйыл бюджет 187 млн. 448 миӊ сомго көбөйдү»

Талкууда шаардык Кеӊештин депутаты Ж. Ормонов бюджеттин бөлүнүшү тууралуу маалымат берди.

Ош шаарынын бюджети өткөн жылга салыштырмалуу 20 пайызга өсүп, 1 млрд. 127 млн. 634 миӊ сомду түзүүдө. Бул көрсөткүч 2018-жылга салыштырмалуу 187 млн. 448 миӊ сомго көп.

Быйыл билим берүү, капиталдык курулуш, жолдор башкармалыгынын  бюджети көбөйтүлгөн. Тактап айтканда, шаардык капиталдык курулуш башкармалыгына 120 млн. 300 миӊ сом, жолдор башкармалыгына 83 млн. сом, билим берүү тармагына 378 млн. 673,6 миӊ сом  бөлүнөрү бюджеттин долбоорунда каралган.

Мындан тышкары маданият жана спорт тармагын каржылоого 74 млн. 762 миӊ сом каралууда. Анын ичинде “Алай” футбол клубуна 19 млн. 500 миӊ, “Сулайман-Тоо” волейбол клубуна 3 млн. 900 миӊ сом каралган.

Волейбол клубун ачууну шаар мэри Таалайбек Сарыбашов демилгелеп, шаардык Кеӊеш колдоп берген.

Шаар мэри Таалайбек Сарыбашов бюджет максаттуу иштетилип, шаардагы көйгөйлөрдү чечүүгө басым жасалаарын айтты.

Жапарбек Ормонов:

«Коомдук угуунун максаты - элге маалымат берүү, бюджеттин ачык-айкындуулугуна жетишүү»

-Коомдук бюджеттик угуу биздин шаарда жыл сайын үзгүлтүксүз өткөрүлүп келет. Бюджеттик угууларды өткөрүүнүн максаты - бюджеттин каражаттарын кайсыл багыттарга жумшалуусу боюнча элге кеӊири маалымат таратуу менен бюджеттин ачык-айкындуулугуна жетишүү. Ошондой эле кызыкдар тараптардын катышуусу менен көйгөйлөрдү эл алдында кеӊири талкулоо болуп саналат.  Бул өз кезегинде бюджеттик каражаттардын калктын кызыкчылыгы үчүн пайдаланып жаткандыгына ишенимдүү болууга мүмкүнчүлүк берет.

 Ж.Ормонов ошондой эле Ош шаарынын 2019-жылдагы бюджетинин өзгөчөлүлүгүнө токтолуп, быйылкы жылдагы бюджетте шаардык капиталдык курулуш жана жолдор башкармалыктарынын курулуш иштерине былтыркы жылга салыштырганда көп акча каралып жаткандыгын, Олимп, Киров жана С.Макаренко атындагы орто мектептери жана «Каркыра» бала бакчасынын каржы жагы Ош шаардык билим берүү башкармалыгынын каржы тутумуна бириктирилип, бул өз кезегинде билим берүү тармагына бөлүнүп жаткан акча каражаттарын туура, эффективдүү пайдаланууга мүмкүнчүлүк берерин айтып өттү.

Жапарбек Ормонов шаар тургундарынын кайрылууларын эске алып, алардын сунуштарын да жакында боло турган сессиянын күн тартибине киргизүүнү тапшырды.

Коомдук угууда Ош шаарынын 2019-жылга бюджетинин долбоору тууралуу шаардык Кеӊештин бюджет, экономика жана өнөр жай маселелери боюнча туруктуу депутаттык комиссиясынын төрагасы Акбарали Батыров бюджеттин долбоорунун приоритеттүү багыттарына, негизги аспектилерине, киреше жана чыгаша бөлүктөрүнө кеӊири токтолду.

Акбарали Батыров, шаардык Кеӊештин бюджет, экономика жана өнөр жай маселелери боюнча туруктуу депутаттык комиссиясынын төрагасы:

«Шаардын бюджети 1 127 634 сомго аныкталды»

-2019-жылга жергиликтүү бюджеттин киреше көлөмү (бюджеттик мекемелердин атайын каражаттарын кошкондо) 2018-жылдын бекитилген бюджетине салыштырмалуу 119,9 % га өсүп, же болбосо 187 448,0 көбөйүп, 1 127 634  миӊ сомго аныкталды.

Ал эми бюджеттин чыгашалар бөлүгү 2019-жылга атайын каражаттарды кошкондо 1 127 634  сом өлчөмүндө белгиленип, 2018-жылга салыштырмалуу 187 448  миӊ сомго көп каралууда.

“Интербилим” коомдук уюмунун Оштогу жетекчиси Г. Мамасалиева Ош шаарынын 2019-жылдын бюджетинин долбоору боюнча өткөн жылга салыштыруу менен баяндама  жасады.

«Биолакт  маселесин кайра талкууладык»

-Ош шаарынын спикери Ж.Ормонов дайыма өзүнүн оперативдүүлүгү менен айырмаланып турат. Коомдук угууда сүт ашканасына байланышкан маселе боюнча ар кандай пикирлер айтылган болчу. Бюджеттик угуудан кийин эле бизди кабыл алып, 2 жашка чейинки балдарга берилүүчү сүт азыктарын натыйжалуу реализациялоо маселесин кайрадан талкууладык. Бул маселе оӊ жагына чечилет деп турабыз.

 Жыйынтыгында

Негизги баяндамачылардан кийин залдагы катышуучулар Ош шаарынын 2019-жылдагы бюджети боюнча кызыккан суроолорун беришти. Суроолор кагаз жана оозеки түрүндө берилип, жеринде жооптор берилди. Ал эми кагаз түрүндөгү суроолор шаар мэриясы менен биргеликте каралып, жооптору «Ош шамы» гезити жана сайттар аркылуу берилери айтылды. Коомдук угууда айтылган сунуштар Ош шаардык Кеӊешинин кезектеги сессиясында Ош шаарынын 2019-жылдын бюджетин кароодо эске алынаары белгиленди. 

Масим Турсунбекова