Версия для печати
Понедельник, 18 Февраль 2019 05:16

Исматилла Сатинбаев: «Ооганда азаптуу күндөрдү көрдүк»

-1985-жылы Улуттук университеттин  биринчи курсунда окуп жатып аскерге баруу үчүн арыз таштагам. Ошол жылдары Афганистанда согуш  абдан катуу болуп жаткан болчу. Ошол жылы эле аскер кызматын өтөгөнү кеткенмин. 1985-жылы мага Ооган чегин аралап өтүүгө буйрук берилди. Буга чейин аскердик даярдык күжүрмөн тартипте жүрүп, согуштук тактиканы дурус сиӊирип алгам. 24785–аскер бөлүгүндө  зениттик дивизиянын зениттик взводунун командиринин орун басарлык милдетин алып, «Шилка» (ЗСУ-23-4) согуштук техникасынын командири болуп кызматымды баштагам. Ошол эле жылдын ноябрь айынын жыйырмасында согуш талаасына биринчи чыккан кезде запастагы командир болуп ок-дарылар жүктөлгөн «ГАЗ-66» атомашинасы менен  чыкканмын.  «ГАЗ-66» үлгүсүндөгү автомашинада бара жаткан колоннанын жүрүшү көпкө узабады. Катар жүрүп бараткан техникалардын арасындагы  машинанын алдынан  жарылган фугастык мина машинаны экиге бөлүп, ролду башкарган жоокердин денесин  майдалап кетти. Мен ошол замат эсимди жоготуп, окуянын кандай болгонун элестете албай калдым. Ошентип госпиталда он күндөй дарыланып, кайра өзүм өтөгөн жайга кайткам. 1986-жылдын күзүндө Андроб капчыгайында «душмандардан бошотулган участокторго кызыл туу илип, ыктыярдуу оогандардын катарынан армия түзүп, ок-дары куралдар менен камсыздап келгиле» деген буйрук берилген. Ал ишти аткаргандан кийин алты ай өткөн соӊ дагы алардын катарын жаӊы ооган жоокерлери менен толуктоо үчүн бараткан  оогандарды коштоп жөнөгөнбүз. Биз блокпостко барган кезде мурунку “Ыктыярдуу армиянын” бир да жокери жок болчу. Чыккынчы - эл болбойт дегендей, баары куралдары менен тоо-ташка  чыгып посту таштап душмандар тарапка өтүп кетишкен. Биз болсо «Шилка», БТР менен душмандарды атканбыз.  Бир убакта «Шилкага» келип жарылган гранатаметтун чачырандылары колума келип кадалгандай болду. Колдорумдун жансыз кыймылына карабай автоматты  басып  душмандарды ата бердим. Ошол кезде колдорум бир аз жабыркап калгандыктан госпиталда дарыланып чыгып, кайра согуш талаасында  канчалаган кыйынчылык күндөрдү көрдүм. Ал күндөрдү эстесем жүрөгүм ооруп кетет. Андай азаптуу күндөр,  согуш эч убак кайталанбасын.

Окулду 543 жолу