-Мен  Кара-Суу районунун Жоош айыл өкмөтүнүн Мамажан айылында 1953-жылы  туулганмын. Ош мамлекеттик университетинин физика-математика факультетин бүтүп, мектепте мугалим болуп иштеп жүргөнүмдө 1974-жылы аскер кызматына чакырылдым. Ал кезде СССР убагы болгондуктан биздин мамлекеттен чакырылган уландар чет жактарга аскер кызматына милдеттүү түрдө жөнөтүлчү. Алардын катарында мен да Чехословакия жеринде кызмат өтөдүм. СССРдин аскердик борбордук тайпасынын мото аткычтар полкунун артиллериясында кызмат өтөдүм. Артиллериялык атууларды башкаруу приборун эсептечүмүн. Андан сырткары минометту кантип атуу керектигин үйрөнүп, башка аскерлерге көргөзүп берчүмүн. Ошол жылдары  аскерлердин борбордук тайпасы эӊ күчтүү тайпалардын бири болгондуктан, дивизиялык жана армиялык  машыгуулар  Чехословакиянын тоолорунда, талааларында  көп болчу. Аларга аябай көп каражат жумшалчу.

«Армиянын жакшы жактарын гана көрдүм»

- Чехословакияда жүргөнүмдө эч убакыт өтпөйт болчу, убакыттын канчалык жай өткөнүнөн ата-энемди, бир туугандарымды сагынуу сезимдерим абдан күчөйт. Кээ бир учурда ата-энемин айтканын кылбаган күндөрдү эстеп, өкүнөм... Аскерде жүрүп ата-энемин, бир туугандарымын кадыр-баркын билдим. Бирок тамак-аштан, кийим кечеден эч кыйынчылык болгон эмес. Армияда кездешчү «дедовщина»дегендерди көргөн жокмун, айтор, катуу тартип менен армиянын жакшы жактарын гана көрдүм.