Ош шаардык Кеӊешинин IV чакырылышынын  кезектеги XIX сессиясы болуп, анда 8 маселе каралды. Сессияга Ош шаарынын мэри Таалайбек Сарыбашов, шаардык Кеӊештин төрагасы Жапарбек Ормонов, жергиликтүү Кеӊештин депутаттары жана бардык мекеме-ишканалардын жетекчилери катышты.

Күн тартибине 8 маселе коюлду

Күн тартибине 8 маселе коюлуп, кеӊири талкууланды. Алар:

- Ош шаарынын 2019-жылга бюджетин жана 2020-2021-жылдарга болжолун, 2019-2021-жылдарга Ош шаарынын социалдык-экономикалык көрсөткүчүнүн болжолун бекитүү жөнүндө;

- Ош шаарынын 2018-жылга бекитилген жергиликтүү бюджетине киргизилген өзгөртүүлөрдү жана толуктоолорду бекитүү жөнүндө;

- Мамлекеттик салык кызматынын Ош шаары боюнча башкармалыгынын жарандардын кайрылуулары жана арыздары боюнча жүргүзүп жаткан иштери жөнүндө;

- Ош регионалдык шааркуруу жана архитектура башкармалыгы тарабынан аткарылып жаткан иштер жөнүндө;

- Ош облусу боюнча кызматтын иш аракетин координациялоо милдети жүктөлгөн Ош шаардык оорулардын алдын алуу жана мамлекеттик санитардык-эпидемиологиялык көзөмөлдөө борборунун, Ош шаардык ветеринардык жана фитосанитардык коопсуздук боюнча мамлекеттик инспекциясынын жана Ош шаардык мамлекеттик залалсыздандыруу бекетинин иштеринин натыйжалуулугу жөнүндө;

- Ош шаарындагы коомдук транспорттун бардык түрлөрүндө жүргүнчүлөр үчүн жол акынын тарифин өзгөртүү жөнүндө;

- «Ош шаарынын муниципалдык менчигиндеги обьекттерге укуктарды берүү тартиби» жөнүндө;

- Ош шаардык Кеӊешинин кээ бир токтомдоруна жана айрым токтомдордун тиркемелерине өзгөртүүлөрдү жана толуктоолорду киргизүү жөнүндө;

«Жергиликтүү өз алдынча башкаруунун мыктысы» аталышты

Сессиянын башталашында сыйлык тапшыруу салтанаты болду. КРнын Өкмөтүнө караштуу жергиликтүү өз алдынча башкаруу иштери жана этностор аралык мамилелер боюнча мамлекеттик агенттигинин «Жергиликтүү өз алдынча башкаруунун мыктысы» төш белгиси менен Ош шаардык Кеӊешинин депутаттары Б.Э.Каналиев, С.Н.Мирзаев, А.Т. Батыров, Б.И. Омуралиева, А.А.Осмонов, Р.А.Турдуев, А.Турдубай уулу, Ош шаардык Кеӊешинин аппаратынын башкы адиси З.З.Наримбетов сыйланышты. Ал эми агенттиктин ардак грамоталары менен Э.С. Туленбаев жана А.А.Салиева сыйланышты.

Шаар бюджети былтыркы жылга караганда 20%га өскөн

Алгач Ош шаарынын 2019-жылга бюджетин жана 2020-2021-жылдарга божомолун, 2019-2021-жылдарга Ош шаарынын социалдык-экономикалык көрсөткүчтөрүнүн болжолун бекитүү жөнүндө маселе каралды. Буга чейин шаар бюджети коомдук угууга коюлуп, талкуудан өткөрүлгөн. Аны шаардык Кеӊештин депутаттары бир добуштан колдоого алып бекитип беришти.

Саибжан Турдуев, Ош шаарынын биринчи вице-мэри:

- 2019-жылга жергиликтүү бюджеттин киреше көлөмү (бюджеттик мекемелердин атайын каражаттарын кошкондо) 2018-жылдын бекитилген бюджетине салыштырмалуу 19,9 % га өсүп, же болбосо 187 448,0 көбөйүп, 1 127 634, 0 миӊ сомго аныкталды. Анын ичинен:

- салык кирешелери 982 091,0 миӊ сомду (87,1% жалпы бюджеттин көлөмүндө) түздү;

- салык эмес кирешелери 65 300,0 миӊ сом (5,8% жалпы бюджеттин көлөмүндө) түздү;

 - бюджеттик мекемелердин атайын каражаттары 80 243,0 миӊ сом (7,1% жалпы бюджеттен) түздү.

Бюджеттин чыгашалар бөлүгү 2019-жылга атайын каражаттарды кошкондо 1 127 634,0 миӊ сом өлчөмүндө белгиленип, 2018-жылга салыштырмалуу 187 448,0 миӊ сомго көп. Бул маселе шаардык Кеӊештин депутаттары тарабынан талкууланып, колдоого алынды.

Тактап айтканда, Ош шаарынын быйылкы бюджети 1 127 634, 0 миӊ сом болуп бекитилди.

Жапар Ормонов, шаардык Кеӊештин төрагасы:

«Шаардын бюджети жылдан жылга көбөйүүдө»

- 2019-жылга каралган бюджеттин 41 пайызы социалдык тармакка жумшалып жатат. Ош шаарынын бюджети жылдан жылга көбөйүүдө. Быйылкы жылы бюджеттин  көлөмү 20 пайызга өскөн. Мындан сырткары былтыркы жылы жол курулуш башкармалыгына 20 миллион сом бөлүнсө, быйыл 80 миллион сом акча каражаты бөлүндү. Ал эми капиталдык курулуш тармагына былтыркыга салыштырмалуу 100 миллион сом көп акча каражаты каралды.

Окуучулардын жол акысын көтөрүү маселеси

Отурумда мындан сырткары каралган маселелердин орчундуусу мектеп окуучуларынын жол акысын беш сомго көтөрүү сунушу болду. Айрым эл өкүлдөрү аталган сунуштарды колдосо, айрымдары каршы чыгышты. Жыйынтыгында жол акыны көтөрүү маселеси кийинки отурумга калтырылды.

Акбарали Батыров, шаардык Кеӊештин депутаты:

«Айдоочуларга рахмат айтышыбыз керек»

- Жол акыны көтөрүү маселесинде эки тарапты карашыбыз керек. Биринчиси, аз камсыз болгон, көп балалуу үй-бүлөлөр болсо, экинчи тарабы окуучуларды маршруттук таксилердин албай коюп жатканы. Биздин сунуш, аз камсыз болгон үй-бүлөлөрдү каттоого алып, ошол үй-бүлөдөн үч же төрт баланы акысыз ташууну колго алсак. Себеби, айдоочулар бир сомдон качып, мектеп окуучуларын алышпайт. Суукта караӊгыга чейин көчөдө калып кеткен окуучулардын ата-энелери «10 сомго чейин болсо да макулмун, баламдын коопсуздугун камсыздап бергиле» деп кайрылышкан. Биз жөнөкөй эле жаранды окуучуларды 1 сомдон ташы деп милдеттендирип койдук. Алар жеке менчик экенине карабай кызмат кылып жатышат. Бул үчүн айдоочуларга рахмат айтышыбыз керек. Автобус, троллейбустарды 1 сом бойдон калтырып, маршруттук таксилердикин көтөрүп берсек жакшы болмок.

Сессиянын жыйынтыгында күн тарбинде каралган маселерден тиешелүү токтомдор кабыл алынды.

 Бактыгүл Калдарбай кызы

Фото: Сыдык Токонов