Кезектеги макалабызда 12 аймактык кеӊеш бириктирилип, алты муниципалдык башкармалык болуп түзүлгөн түзүмдөрдүн бири №1 Туран муниципалдык аймактык башкармалыгы боюнча баяндоону эп көрдүк. Аталган МАБдын жетекчиси Равшан Мирзабаев жети ай аралыгындагы региондорду өнүктүрүү жана өлкөнү санариптештирүү жылына карата аткарылган жана аткарыла турчу иш аракеттери боюнча кенен айтып бермекчи.

38 миӊ калкы бар МАБ

№1 Туран муниципалдык аймактык башкармалыгында 6543 кожолук, 58 көп кабаттуу үй, 1287 батир, 5256 жеке менчик үй, үч бала бакча, үч мектеп, эки саламаттыкты сактоо мекемеси, бир китепкана, эки балдар ойноочу аянтча, үч спорт зал, үч кичи футбол аянтчасы, тогуз спорт секция, 41 аптека, эки авиакасса жана 127 соода түйүндөрү жайгашкан. Ошондой эле 38 миӊге чукул калк жашайт.

Улуттук түзүмү

Ондон ашуун улуттун өкүлдөрү жашаган Туран муниципалдык аймактык башкармалыкта кыргыздардын саны 15765 болсо, өзбектердин саны 20391, орус-354, татар-122, тажик-63, уйгур-158, түрк-78, казак-14, корей-9, немис-7, украин-11, дунган-28 жана башка улуттардын 251 жашоочусу түтүн булатып келет.

«Ош шаарынын мэриясынан региондорду өнүктүрүү жана өлкөнү санариптештирүү жаатында келген каттар, протоколдук тапшырмалар өз убагында аткарылып жатат»,- дейт Равшан Мирзабаев:

«Жарык жашоо – жаркын келечек»

- Ишибизди жарыктандыруудан баштадык. Анткени жарык жашоо жаркын келечек дейт эмеспи, жеткиликтүү санариптештирүү үчүн биринчи орунда электр тармагын жакшыртуу керек. Буга байланыштуу, аймактык башкармалыкта Дача участогун электр чубалгылары менен жаӊыладык. Ошондой эле жыйырма көчөнү жарыктандырып, 200дөй жол чырак койдук. Алдыда дагы бир топ көчөлөрдү жол чырак менен камсыздоо, эскилиги жеткен трансформаторлорду жаӊылоо пландалып жатат.

«Алгылыктуу иштер элдин колдоосу менен ишке ашырылды»

- Июль айында Төлөнов көчөсү менен Ишматова көчөсүнүн кесилишинде элдин колдоосу менен элүү метр лоток орноттук. Мындан сырткары Солнечная көчөсүнө 800 метр аралыкка таза суу тартылды. Демөөрчүлөр тарабынан 40 миӊ сомго Королева көчөсүнө 105м2 тротуарга таман таш жаткырылды. Набережная көчөсүнө 6 миӊ метр шагыл төгүлүп, Колос, Семейная, Ирригатор көчөлөрүнө таза суу тартылды. Борбордук жана Колос көчөлөрүнө жети электр мамыча орнотулду. Бир топ алгылыктуу иштер элдин колдоосу менен ишке ашырылды.

«Окуу жылы аяктаса бош калышпасын деп…»

- Окуу жылы аяктаган соӊ балдардын убактысын текке кетирбөө үчүн «Интербилим-Ош»    бейөкмөт уюму менен биргеликте 14 жаштан 17 жашка чейинки өспүрүм балдарга, социалдык коргоого муктаж жана ар түрдүү улуттардын өкүлдөрү катышкан жайкы демократия «Жаш аракет» лагерин уюштурдук. Лагерь улуттар аралык достукту бекемдөөгө, балдардын этика-эстетикалык билимин жогорулатууга, кенен чөйрө менен аралашып, тил табышып, өз ойлорун орундуу айтып бере алууга үйрөтүү максатында уюштурулду. «Жаш аракет» жайкы демократия лагерине жалпы жүз миӊ сом өлчөмүндө инвестиция тартылып, лагердин жалпы катышуучуларына эки маал тамак жана демократиянын негиздерин, толеранттуулукту, медиа сапаттуулукту жогорулатуу сабактары окутулду. Лагерь жалпы жонунан эки айга созулду. Дал ушул өӊүттөгү максат менен мэрибиз Таалайбек Сарыбашовдун демилгесинде «Бактылуу балалык» деген да лагерь уюштурулду. Мындан башка бир канча иш чаралар өткөрүлдү.

«МАБда юридикалык консультация көрсөтүү колго алынды»

- Жеке демилгенин негизинде №1 Туран МАБда юридикалык консультация көрсөтүү колго алынды. Бул кызмат Туран кичи районундагы тургундар үчүн акысыз, жеткиликтүү ишке ашырылууда. Азыркы күндө жыйырма адамга юридикалык маалымат берилди.

Ар кандай жашоочулар жашагандыктан, тазалыкты сактоо кыйынга турат. «Ош-Тазалыктын» техникасы жетишсиз, эски болгондуктан ар бир кварталдык комитетте беш адамдан турган комиссия түзүп, саркынды сууларды чыгарбоо, жашаган жерибизди акыр-чикирден таза кармоо боюaнча ар бир үйгө түшүндүрүү иштерин жүргүзүп, маал- маалы менен ишембилик өткөрүп, бат-баттан көзөмөл жүргүзүп турабыз. Өзүӊүздөргө белгилүү болгондой, биздин башкармалыкта канализация жок. Бул өтө чоӊ көйгөй. Саркынды сууларды жок кылуу үчүн канализация куруу абзел.

Буюрса, «Ош-Тазалык» ишканасы жаӊы техника менен камсыздалып, тазалыкка болгон түйшөлүү аз да болсо жеӊилдеп калды. 

«МАБдын коомдук алдын алуу борборунун кеӊсеси курулууда»

Коомдук алдын алуу борборунун кеӊсесин куруу үчүн «Эл аралык толлеранттуулук үчүн» фонду жана «SAFERWORLD» менен биргеликте коомдук коопсуздукту сактоо үчүн иш чаралар өткөрүлүп, сметасы түзүлүп, жакын арада кеӊсенин курулушун баштоо боюнча иш жүргүзүлүп жатат. Түзүлгөн сметанын негизинде кеӊсенин курулушуна 2 миллион 789 миӊ сом каржыланары аныкталды. Аныкталган каражаттын отуз пайызын Ош шаарынын мэриясы каржылап бермекчи. Айтор, жеке демөөрчүлөр тарабынан да бир топ жардамдар берилүүдө.

Нурсулуу Калмурат кызы

Фото: Сыдык Токонов