Версия для печати
Вторник, 01 Октябрь 2019 05:12

Мукарамхан Меӊдибаева, жеке ишкер: «19 жашымда ишкерликти баштагам»

- Ийгиликке жетүү ар бир адамдын өзүнөн көз каранды. Мен эс тарта электе атам каза болгон экен, алты жашка чыкканда апамдан айрылдык. 7 бир тууган жетим калдык. Мен 6 жашта болсом, менден кийин бир сиӊдим, бир иним бөбөк боюнча кала берди. Турмуштун оор күндөрүн башыбыздан өткөрдүк. 6 жашка чейин апам жакшы тарбия берген экен. Эмнегедир мага аябай ишенчү. Бир жакка жумшаарда да менден чоӊ эжелеримди калтырып «Мира кызым аткарып келет» деп жиберчү. Мага ишенип тапшырган ишин ушунчалык жоопкерчилик менен жыйынтыгын апам көрүп кубансын, мага дагы жакшы кебин айтсын деп майын чыгара кылып келчүмүн. Апам мени чечкиндүүлүккө, өзүмө, күчүмө, аракетиме ишенген кыз кылып тарбиялаптыр. Совхоздо, райОНОдо иштедим. Айлык аз, жетиштире албай 19 жашымда 1 сом акчам жок бир жеӊемди ээрчип Казакстанга коммерция кылганы кеттим. Алгачкы 7-8 айда 29 000 теӊге каражат топтоп, кубанганым али да эсимден кетпейт.

«Жакшы адамдарга туш кылган жашоомо ыраазымын»

- 16 жыл Астанада жашадым. Бул жылдар бөтөн өлкөдө, бизнес жолунда оӊой күндөр болгон жок. Жаштайымдан адамдардын тилин таба билүүгө, аракетчилдикке, чоӊ маселелерди чечүүгө, кандай адам болбосун мамиле түзүп кетүүгө үйрөнгөндүктөн 16 жыл чоочун элде жашап, бутума турдум десем жаӊылышпайм. Ошол учурдагы өз жеримди, бир туугандай элимди сагынганымды азыр эстегим келбейт. Ушул күнүмдү куруу үчүн кыйынчылыктын баарына чыдаш керек болду. Турмуш куруп бир уулдун энеси болдум. Ошко келип бизнесимди уланта баштадым. Аял киши болгондуктан кооздоп кийингенди жакшы көрөт эмеспизби, хобби катары кийим дүкөнүн ачтым. Мындан сырткары ар тармакта соода иштерин жүргүзөм.

Жашоомдо жакшы адамдарга туш болуп келе жатам. Санаалаш дос, курдаштарга, туура жол көрсөткөн, бизнестин жолун жакшы билген «Жаш ишкерлер ассоциациясынын» мүчөлөрү болгон ага-инилерге, ыйман, адалдык, кайрымдуулук жагынан жана турмуштак сабактарды өтүп турган ыймандуу эже-сиӊдилерге жашоомдо бар экенине ыраазы болом. Менин личност катары өзүмдү өстүрүүмө көп себепчи болгон ушул инсандар десем жаӊылышпайм.

«Базарчы аялдар митайым болот деген сөз мени ардантат»

- Базарчы аялдар митайым болот деген сөз мени ардантат. Бул тармакка 19 жашымдан бери аралашып келе жатсам да менин мүнөзүм такыр өзгөрбөдү. Жашыкмын, боорукермин, ажылдаган адамдарды көрсөм сүйлөшүүнү токтотом. Бул мүнөзүмдү билгендер ар кандай жалгандарды айтып алдап көрүштү, алдап көргөнгө аракет да кылышты. Жаш кезимден жалгыз кыйынчылык көргөн үчүн кыйналып турган адамды карап турганга жүрөгүм чыдабайт. Бизнестин жолунда ар кандай адамдарды көрүп, ар кандай кырдаалга туш болосуӊ. Негизгиси эмгегиӊди баалап, мамлекеттик жетекчилер сыйлап жатса кубанат экенсиӊ. Мен сыяктуу аялдар шаарыбызда көп, бул ирет ошолордун арасынан мени тандап алганы үчүн Ош шаардык Кеӊешинин жамаатына жана «Жаш ишкерлер ассоциациясына» ыраазычылык билдирем.

 

Окулду 410 жолу