Версия для печати
Вторник, 01 Октябрь 2019 05:18

Ош шаардык Кеӊешинин кезектеги XXII сессиясы болуп өттү

Ош шаардык Кеӊешинин кезектеги XXII сессиясына 45 депутаттын ичинен 38и катышып, Ош шаардык Кеӊешинин төрагасы Жапарбек Ормонов өзү алып барды.

Төрага сессиянын жүрүшүндө шаарыбыздагы жетишкендиктер жана ийгиликтер жөнүндө айтып, “Бир жакадан баш, бир жеӊден кол чыгарып” элибизге жакшы шарттарды түзүүгө баарыбыз биргеликте аракет кылууга чакырам деп белгиледи. Ошондой эле депутаттык курамда “Мекеним Кыргызстан” партиясынан Абдырахманов Оенбек Эмиловичтин ордуна Раимов Эмилбек Жеӊишбековичке мандат берилгендигин билдирип, иштерине ийгиликтерди каалады.

Сессиянын жүрүшүнө бир топ өзгөрүүлөр киргени маалым болду. 2019-жыл «Аймактарды өнүктүрүү жана санариптештирүү» жылына карата ар бир эл өкүлүнө чип тапшырылган. Депутат ал чипсиз сессияга келсе микрафону жанбайт жана добуш берүү укугу берилбейт. Добуш берүү системасы да автоматташтырылып, компьютердин негизинде жүргүзүлөт. Андан сырткары сессия өтүүчү залга эки видео-байкоо орнотулганын төрага маалымдады.

Сессиянын күн тартибинде 9 маселе каралды

1. 2018-жылдын жыйынтыгы менен Ош шаарынын социалдык, экономикалык абалы жана 2018-жылга бекитилген жергиликтүү бюджетинин аткарылышы жөнүндө.

2. 2019-жылдын 6 айынын жыйынтыгы менен Ош шаарынын социалдык, экономикалык абалы жана бюджетинин аткарылышы боюнча Ош шаарынын мэринин отчету жөнүндө.

3. Жылуулук-энергетикалык комплекс мекемелеринин 2019-2020-жылдарга карата күз-кыш мезгилине карата даярдыгын кароо.

4. Ош шаардык саламаттык сактоо мекемелеринин калкка көрсөтүп жаткан кызматынын натыйжалуулугу жөнүндө.

5. Ош шаарынын мэриясынын жол башкармалыгы тарабынан аткарылып жаткан иштер жөнүндө.

6. Депутаттардын Ош шаардык Кеӊешинин 2007-жылдын 10-августундагы «Ош шаарындагы курулуш жана жерди пайдалануу эрежелери жөнүндөгү» №248 токтомуна өзгөртүү киргизүү.

7. Ош шаарынын айрым аймактарынын функционалдык чөлкөмдөштүрүүсүн өзгөртүү жөнүндө.

8. Бюджеттик акча каражаттарды бөлүп берүү жөнүндө.

9. Ош шаарынын прокуратурасынын Ош шаардык Кеӊешинин 2018-жылдын 20-июнундагы №129 токтомуна карата каршы пикири жөнүндө маселелер каралды.

Күн тартибинде көрсөтүлгөн маанилүү 9 маселенин ичинен 2018-жылдын жыйынтыгы менен Ош шаарынын социалдык-экономикалык абалы жана 2018-жылга бекитилген жергиликтүү бюджетинин аткарылышы жөнүндөгү маселе, 2019-жылдын 6 айынын жыйынтыгы менен Ош шаарынын социалдык-экономикалык абалы жана бюджетинин аткарылышы боюнча Ош шаарынын мэринин отчету, жылуулук-энергетикалык комплекс мекемелеринин 2019-2020-жылдарга карата күз-кыш мезгилине даярдыгы, Ош шаардык саламаттыкты сактоо мекемелеринин калкка көрсөтүп жаткан кызматынын натыйжалуулугу жөнүндөгү маселелер эл өкүлдөрү тарабынан кызуу талкууланды. Күн тартибине шаардык ипотека боюнча маселени киргизүү сунушу түшүп, бирок аны кийинки сессияда кароого калтырышты.

Ош шаардык Кеӊешинин төрагасы Жапарбек Ормонов:

“Ипотека боюнча кийинки сессияда каралат”

- Ош шаарынын кезектеги XXII сессиясында негизги маселе Ош шаарынын мэринин отчету, кышкы даярдык жана медицина тармагынын бүгүнкү абалы. Өзүӊүздөр күбө болгондой ипотекага тийиштүү маселени күн тартибине кошууну сунушташты, бирок аны кийинки кароого калтырдык. Себеби бул жөнөкөй тема эмес, эл менен бирге талкуулап анан сессияда карообуз керек. Биз азыр бул теманы талкуулай турган болсок бир чечимге келип токтом кабыл алуубуз керек болот. Элдин пикирин укпай туруп андай кылганыбыз туура эмес болгондуктан, кийинки сессияга калтырууну чечтик. Ипотеканы берүү боюнча өзүнчө жобо бар, ал бүгүнкү күндө иштелип жатат. Созулуп жаткан маселе жердин жоктугу болуп жатат. Алдыда жеке ишкерлер менен сүйлөшүп, жерин алып биргеликте иш алып баруубуз мүмкүн деген маселелер болууда. Мамлекеттик орган болгондон кийин жеке ишкерлердин ипотекалык багытынан төмөн жасап берүүбүз керек. Ушундай максатта коомчулук менен чогуу талкуулап чечим чыгаруубуз керек.

Дагы бир көпчүлүктү кызыктырган маселе кышка даярдык боюнча өкмөттөр аралык комиссия келип түштүк аймагынын кышка даярдыгын текшерип кетишти. Алардын жыйынтыгы боюнча Ош шаары жогорку баага ээ болду. Бул маселени биздин туруктуу комиссия да карап чыкты, айрым кемчиликтер бар бирок аларды кышка чейин туураласа болот.

Бардык маселелер эл өкүлдөрү тарабынан кызуу талкууга алынып, шаарда аткарылып жаткан иштер боюнча тийиштүү мекеме-ишканаларга сындар да, мактоолор да айтылды. Шаар мэринин, жолдор башкармалыгынын иштерине жогорку баа берген эл өкүлдөрү болду. Аткаруу бийлигине сунуштар берилип, милдеттенмелер жүктөлдү.

Уулбү Каныбекова

 

Окулду 442 жолу