2020-жылдын 16-октябрында М.М.Адышев атындагы Ош технологиялык университетинде экономика илимдеринин доктору, профессор, билим берүүнүн мыктысы, маркум Узенбаев Расулбек Аширбековичтин 60 жылдык мааракесине арналган  "Санариптештирүү шартында бухгалтердик эсеп, анализ жана аудиттин абалы: көйгөйлөр жана өнүгүүсүнүн келечеги» аттуу эл аралык илимий-практикалык онлайн конференциясынын пленардык отуруму жана секциялык иштери болуп өттү.

Конференциянын уюштуруучулары катары М.М.Адышев атындагы Ош технологиялык университети, Борбордук Азия өлкөлөрунун бухгалтер жана аудиторлорунун Ысык-Көл форуму жана Ош мамлекеттик университети.

Конференциянын ишине Россия жана Борбордук Азия өлкөлөрү: Өзбекстан, Казакстан, Тажикстан, Кыргызстандын белгилүү экономист-окумуштуулары, жаш аспиранттар, магистранттар, докторанттар, окуу жайлардын ректорлору, КРнын Жогорку аттестациялык комиссиясынын төрайымы, Мамлекеттик финансылык рынокту жөнгө салуу жана көзөмөлдөө кызматы, окуу жайлардын окутуучулары жана студенттери катышышты.

Пленардык отурумда модератор катары Ош ТУнун бухгалтердик эсеп жана аудит кафедрасынын профессору, э.и.к.. доц.Абдиев Мурат Журатович алып барды. Конференцияны негизги уюштуруучусу Ош ТУдан,ректор, т.и.д, проф.Абидов Абдыкадыр Омарович жана уюштуруучу- «Борбордук азия өлкөлөрунун бухгалтер жана аудиторлорунун Ыссык-Көл форуму» коомдук бирикмесинин директорунун атынан, жооптуу кызматкери э.и.к., доц.Султаналиева Бегайым Абдыбековна сөз сүйлөшүп, конференцияны жемиштүү өткөрүүгө жана катышуучуларга ийгиликтерди каалады.

Пленардык отурумдун жүрүшүндө э.и.д, проф. Низомов С.Ф "Башкаруу системасында башкаруучулук көзөмөлдүн теориялык жолдору жана концептуалдык чек аралары» менен э.и.д., проф. Маткеримова А.М «Башкаруу эсеби системасында башкаруучулук көзөмөлдүн элементтерин калыптандыруу» деген темада баяндама жасашты.

Эл аралык илимий-практикалык конференциянын пленардык отуруму  аяктаган соӊжыйындын катышуучулары Ош ТУнун башкы имараттын 4-кабатында жайгашкан "э.и.д, проф. Узенбаев Расулбек Аширбекович атындагы инновациялык изилдөөлөр борбордун" ачылыш аземине күбө болушту.

Аталган борбордо Ош ТУнун ректору, проректорлор,  факультеттин деканы, устаттары, шакирттери жана бир туугандары сөз сүйлөп, аны эскеришип, бул борбордун алкагында жыл сайын салттуу түрдө иш чараларды өткөрүп турууну белгилеп кетишти.

Расулбек Аширбековичтин жаркын элесине арналган Абдиев М.Ж. тарабынан даярдалган “Күмүш куржун (ата мурас)” китептин бет ачары болду жана агайдын ой толгоолору, ырлары жөнүндө сөз болду.

Белгилеп кетсек, Р.А.Узенбаев 6 аспиранттын жана 2 докторанттын илимий иштерине жетекчилик кылуу менен анын жетекчилиги менен 1 кандидаттык диссертация Ж.Баласагын атындагы КУУнун жана Б.Ельцин атындагы КРСУнун астындагы диссертациялык кеӊеште ийгиликтүү корголуп, 2 кандидаттык диссертация коргоо алдында турат.

Илимий педагогикалык ишмердүүлүгүндө 3 монография, 60тан ашуун илимий макалалары, 30дан ашуун окуу-методикалык иштери басылып чыккан. Илимий макалалары АКШ, Түркия, Россия, Казакстан, Тажикстан өлкөлөрүндө жана жергиликтүү басылмалардан жарык көргөн.

Расул Аширбекович ОшТУда кафедра башчысы, декан кызматтарын аркалоо менен материалдык-техникалык базаны, окуу адабияттары менен камсыз кылуу, окутуунун заманбап технологияларын колдонуу, илимий потенциалык көтөрүү, сырткы байланыштарды күчөтүү, бүтүрүүчүлөр жана иш берүүчүлөр тыгыз иш алып баруу боюнча чоӊ жумуштарды жасаган.

Өлкөбүздүн экономика багыты, анын ичинде бухгалтердик эсеп жана аудит боюнча илимий изилдөө ишмердүүлүгүн өнүктүрүү, окуу жайлар аралык байланыштарды күчөтүү боюнча зор салым кошкон.