Автоунааларга жалтырата түс берүү, эскисин бир күндө жаӊы кылып жасап чыгаруу бүгүнкү күндө өтө актуалдуу. Унаанын түсүн өзгөртүү же айрым элементтердин бетиндеги кемчиликтерин жабуу жана андан арылуу бир караганда оӊой эмес. Унааларды сырдоо технологиясы - бул ары түйшүктүү процесс десек туура болчудай. Аябай тактыкты талап кылган сырдоо технологиясы жөнүндө азыноолак кеп кылабыз.

“Унааларга түс берүүчү боектордун түрлөрү абдан көп”

21 жаштагы каарманыбыз сырдоо технологиясын Орусиядан үйрөнүп келген. Ал бул жумушту өтө кылдаттык менен жасоо керектигин кошумчалап, учурда бул кызматка суроо-талап жогору экенин билдирди. 

-Автоунааларды сырдоону 18 жашымда Москвадан үйрөнүп келгем. Буюрса, үч жылдын жүзү болду. Шаарда атайын автоунааларды сырдоочу борбор ачып иштетип келем. Кошумча мастерлер дагы бар.

Учурда унааларга түс берүүчү боектордун түрлөрү көп. Эки боекту деле бири-бирине аралаштырып башкача түстөгү краска чыгарып койсо болот. Боектун өндүрүлгөн жерине карап суроо-талап ар түрдүү. Айрымдары Кытайдан келгенди сураса, бирөөлөр Германиянын боегун сурашат. Баасына жараша сапаты да башка болот. Бирок, биз Италиянын краскасын чачабыз. Анын 100 граммы 270 сом турат. Жумушуна жараша деталдары 3 миӊ сомдон жогору болот.

“Нормага ылайык үч жылда бир машинага боек берилип турушу керек”

-Кардарлар көбүнчө автоунааларынын өӊү өчүп калганда, сүзүп же уруп алып, краскасы түшүп калганда кайрылышат. Заманбап тил менен айтканда машиналардын “макияжы” деп койсок болот. Негизинен нормага ылайык боек үч жылда бир машинага берилип турушу керек. Ушул жана башка себептерден улам бизге кайрылып турушат.

“Түсүнө жараша түрдүү көлөмдө боектор керектелет”

-Жеӊил унааларга ар түрдүүчө колдонулат. Түстөргө жараша. Кара түстө бир литр боек жетет. Күмүш түстө эки литр керектелет. Ар түс ар башка көлөмдө чачылат. Себеби түс жакшы чыгып, ойдогудай болуусу үчүн. Сырдоо аябай татаал, майда жумуш. Мындан кетирген кичинекей ката чоӊ катага барабар. Ошондуктан катасыз, так аткарганы аракет кылабыз. 

Эӊ мыкты сапаттагы боектор...

-Эӊ жакшы боектор Италия менен Германияныкы. Кытай чыгарган боектун 100 граммы 150 сомду түзсө, Германиянын боегу 250 сом турат. 

Канча убакытта даяр болот?

-Эртеден кечке чейин машинанын боек тийбей турган жерлерин, терезелерин жаап, жууп тазалап даярдайсыӊ. Кечке маал саат 6ларда чачып баштасаӊ саат 10дорго бүтөт. Саат 10дон кийин бокска (унааларды сырдоочу жай) эч ким кирбеши керек. Ал жерде жарым күн турушу зарыл. Эрте менен келсеӊ даяр болуп калат. Анан кожоюнуна бере берсе болот. Бир жума өткөн соӊ өӊүн чыгарып, жалтыратып (полировка) беребиз.

Жаӊы боектор да күн өткөн сайын эски боегуна окшоп билинбей калат. Заводдо чачылган боек унаа эч нерсе болбой, урулбай, түз турган маалында чачылат эмеспи. Анда эч кай жеринде шпатлевка болбойт. Ал эми биз оӊдой турган жерлерин оӊдоп, түздөп анан боекту чачабыз.

“Дөӊгөлөктөрдөгү дисктер, бамперлер да боелот”

-Андан сырткары унаанын түбүнө антикор менен чачабыз. Аны чачкандан кийин унааны түбүнө канча суу тийбесин ал чирибейт. Сырдоодо унаага толугу менен боек чачуу же кайсы бир элементин гана боео жолу бар. Унаанын сырткы көрүнүшүн толугу менен жаӊыртуу керек болсо, жогоруда айткандай толук боек жасалат. Ал капиталдык ремонттон өтүп, кырсыктан олуттуу сокку алгандан кийин же унаа гаражда көптөн бери дат басып турганда чачылат.

Жарым-жартылай оӊдоо (мисалы, оюкту түздөө) унаанын белгилүү бир бөлүгүн сырдоону талап кылышы мүмкүн. Мында боек чачуу технологиясы дээрлик бирдей. Бул жерде эӊ негизгиси боектун так тандалышы. Бирок бул үчүн керектүү аянттын тегерегине чапталган атайын трафарет кесилет. Бул трафарет сырдала турган аянттан бир аз чоӊураак болушу керек. Тасма машинанын калган бөлүгүн коргоо үчүн колдонулат. Адистер унааны сырдоону өз алдынча аткарууну сунушташпайт. Анткени билинбеген катачылык чоӊ көйгөйдү жаратышы мүмкүн. 

Ошондой эле бул жаатта тажрыйбадан тышкары иштөө үчүн атайын шаймандар керек болот. Ар бир керектелүүчү нерселерди ыгы менен колдоно билүү да маанилүү.

Алардын негизгилери:

-Олифа, боек, лак;

-краскопульт (боек чачуучу пистолет)

-ным жана май чогултуу үчүн компрессор жана чыпкалар

-шпатлевка

-грунтовка

-курулуш фени ж.б.

Жумагүл Кочкорбай кызы