Июль айында Кытай Эл Республикасынын башкы консулдугунун чакыруусу менен Ош шаардык Кеңешинин төрагасы Жапарбек Ормонов жетектеген депутаттардын тобу Кытайга расмий сапар менен барып келишти.

Расмий иш сапарда Пекин шаарында Кытай коммунисттик партиясынын борбордук комитетинин эл аралык бөлүмүнүн тышкы иштер департаментинин башчысы мырза Чжао Лэй менен жолугушуп, борбордук комитеттен эл аралык байланыш боюнча жалпы маалымат алышты.Жолугушуунун жүрүшүндө Кытай Эл Республикасы менен Ош шаарынын ортосунда билим берүү тармагында жакшы жетишкендиктерге жеткенин жана көптөгөн студенттер Кытай жергесинде билим алып жатканы айтылды. Мындан сырткары экономиканы, медицинаны, билим берүү жана башка тармактарды өнүктүрүү максатында байланыштарды мындан да өркүндөтүү жөнүндө сөз болду.

Иш сапардын алкагында оштук топ  Ханчжоу шаарынын Эл өкүлдөр жыйынынын төрагасы Ван Цзин Цай менен жолугушту. Жергиликтүү өкүлчүлүктүү органдарынын иштөө ыкмалары менен таанышышты. Мындан сырткары жергиликтүү эл өкүлдөрүнүн мыйзам чыгаруу, аны ишке ашыруу жана башка иштери боюнча кенен маалымат алышты жана ушул жолугушуу эки шаар арасында ар тараптуу байланыштардын башталышына себеп болору айтылды.

29-июлда “Ошшаарсууканал” муниципалдык ишканасынын саркынды сууларды тазалоочу бекетинин ачылуу аземи болду. Ага Ош шаарынын биринчи вице-мэри Замирбек Аскаров, Швейцария өкмөтүнүн экономика боюнча мамлекеттик секретариатынын өкүлү Франсуа Саламе, Европалык реконструкциялоо жана өнүктүрүү банкынын Борбор Азия аймактары боюнча башчысы Нейл Макейн, мекеме-ишканалардын жетекчилери жана шаар тургундары катышты.

Биринчи вице-мэр Замирбек Аскаров бекеттин 40 жылдан ашуун убакыттан бери каралбай келгенин айтып, саркынды суу тазалоочу бекетти калыбына келтирүүдө чет элдик уюмдардын жана өлкө башчысы Алмазбек Атамбаевдин салымы чоң экендигин билдирди.

 -“Каражаттын бир бөлүгү кубаттуулугу 80 миң.м3 болгон II кезектеги механикалык тазалоо бөлүгүн реконструкциялоого жумшалды. Мындагы заманбап жабдуулар Орто Азияда жок, биринчи жолу бизде курулду. Натыйжада, бүгүнкү күнгө чейин саркынды суулар, адам күчү менен тазаланып келген жумуштар толугу менен автоматташтырылды. 2014-жылы Президент тарабынан I кезектеги саркынды сууларды тазалоо бекетин капиталдык ремонтоо жана ишке киргизүү максатында 9 млн. сом акча каражаты бөлүнүп берилген. Бул иш аракеттер саркынды суу тазалоо бекетинин өндүрүмдүүлүгүн дагы 20 миң куб көрсөткүчүнө арттырат. Ошондо бул аталган өндүрүштүк обьектибиздин кубаттуулугу 100 миң куб. көрсөткүчүнө жетет”,- деди З.Аскаров. 

 Белгилей кетсек, I кезектеги кубаттуулугу күнүнө 20 миң м3 саркынды сууларды тазалоочу бекети 1965-жылы курулган, II кезеги 1977-жылы курулуп, ошол мезгилден бери бир дагы капиталдык ремонттоо, жабдууларды алмаштыруу, имараттарды ремонттоо иштери жүргүзүлбөгөн. Саркынды сууларды тазалоо иштери адам күчү менен гана жүргүзүлүп келген.

27-июлда Өзгөн көчөсү ачылды. Ушуну менен Навои көчөсүндөгү көпүрөнүн курулушунун жыйынтыктоочу 3-этабы бүттү. Жаңы көчөнүн ачылыш аземине шаар мэри А.Кадырбаев, шаардык Кеңештин төрагасы Ж.Ормонов, шаардагы жетекчилер, аксакалдар, ардактуу атуулдар жана жашоочулар катышты.

Мэр Айтмамат Кадырбаев бул көчөнүн ишке берилиши менен көчөнүн жашоочуларын куттуктап, буларга токтолду:

-Мына ушинтип бүгүн көпүрөнүн курулушунун 3-этабы аяктады. Бул жаңы көчөнүн курулушунун баасы 13 млн. 25 миң 300 сом, ал эми тендердик баасы - 9 млн. 600 миң сомду түздү. Жолдун узундугу 345 м, кеңдиги 13 м. Бул жол борбордук базардын айланасындагы жол кыймылын бир топ жеңилдетет деп ойлойбуз. Анткени шаарыбызда учурда 68 миң автоунаа расмий катталган. Бул биздин көчөлөргө эки эсе көптүк кылат.

Ачылыш аземде Айтмамат Кадырбаев курулушка өз салымын кошкон алдыңкы курулушчуларга ыраазычылык баракчаларын тапшырды.

18-июлда “Азия балдары” 6- эл аралык спорт оюндарында дзю- до боюнча биринчиликти алып жеңиш менен кайткан Айбек уулу Кубанычты Ош аэропортунан салтанаттуу тосуп алышты.

Жеңүүчүнү жана машыктыруучусун Ош шаарынын мэри Айтмамат Кадырбаевдин атынан мэриянын өкүлдөрү, машыктыруучулар жана спортчулар жылуу куттукташып, калпак кийгизип, чапан жабышты.

 Белгилей кетсек, бул эл аралык оюнга 36 өлкөдөн 4 миңден ашык жаш спортчулар катышып, спорттун 22 түрүнөн мелдешишкен.