28-январда  №1 “Жибек” балдар бакчасынын заманбап эмеректерин жаңылоо жана материалдык-техникалык базасын камсыздоо иштерин көргөзүү иш чарасы болду. Иш чарага Ош шаарынын вице-мэри И. Эргешов, Ош шаардык билим берүү башкармалыгынын башчысынын орун басары Ж. Байзаков, ата- энелер комитетиин өкүлдөрү жана тиешелүү тармактын өкүлдөрү катышты. Анда жаш жеткинчектер келген конокторго  ыр-бийлерин тартуулашып, ыраазычылык сөздөрүн айтышты. №1 “Жибек” балдар бакчасы жаңы, заманбап эмеректер жана техникалык базасы толугу менен камсыздалып колдонууга берилди. Мындан сырткары 2013-жылдан бери бала бакчанын чатыры, терезелери, дарбазасы, жаңы эмеректер жана ички бөлмөлөрү толук капиталдык ремонттон республикалык, жергиликтүү бюджеттен жана АРИС уюмунун колдоосу астында өткөрүлдү. Эскерте кетсек, №1 ”Жибек” балдар бакчасы 1926-жылдан бери иш жүргүзүп келет. Бир кылым тарыхы бар бакчада ушул кезге чейин 7 миңден ашуун балдар тарбияланган. Ушул эле бакчада кыргыздын улуу жазуучусу Ч. Айтматов да 1932-34-жылдары тарбияланган.

2016-жылдын 5-февралында саат 10:00дө Ош шаардык мэриясынын чоң жыйындар залында «Ош шаарынын жергиликтүү бюджетинин 2016-жылга карата долбоорун» талкуулоо боюнча коомдук угуу өтөт. Буга чейин жарыялангандай 2016-жылдын 2-февралында боло турган коомдук угуу жүйөлүү себептер менен 2016-жылдын 5-февралына которулду.

Ош шаардык Кеңеши Ош шаарынын тургундарын коомдук угууга активдүү катышууга чакырат. 

23-январда улуу талант Рыспай Абдыкадыровду эскерүү кечеси өттү. Ага катышкан шаардын биринчи вице-мэри З. Аскаров Рыспай өзү ыр дастан экенин, ырлары бүгүн да ырдалып жатканын, жүрөктөрдө жашай берерин билдирди. Залкар таланты эскерүүгө келген маданият кызматкерлери, замандаштары, ырчы, обончулар Рыспай Абдыкадыров тууралуу сонун ойлорун айтып, ырчылар ырларын ырдашты. Рыспай Абдыкадыров тирүү болгондо 75 жашка чыкмак. Бирок анын ырлары кылымдарга жашай бермекчи.  

22-январда Ош шаардык Кеңешинин бюджет, экономика жана финансы маселелери боюнча туруктуу депутаттык комиссиясы шаардын бюджетин талкуулады. «2016-жылга республикалык бюджет бекитилип болгон. Бүгүнкү күндө жергиликтүү бюджеттер бекитилүүдө. Ош шаары учурда бекитүү алдында турабыз. Буга чейин жергиликтүү бийлик киреше, чыгаша каражаттарын бир катар карап, бүгүн шаардык Кеңешке талкууга коюп жатат. Бир топ жетекчи, өкүлдөр менен биргеликте макулдашып, кайсы тармакка туура чечилди, кайсы тармакка кем болуп калды, баарын бирге чечебиз. Быйылкы жылда өткөн жылга салыштырмалуу 104 млн.го көп каралып жатат. Былтыры, 930 млн. каралган болсо, бул жылда 1 млрд. 34 млн. сом карап, бекитип жатабыз. Алгач Финансы министрлиги менен макулдашып, андан соң чыгаша, киреше бөлүктөрү эсептелип чыгат. Ошонун негизинде карап чыгабыз»,-дейт бул тууралуу бюджет комитетинин төрагасы Бекмырза Эргешов.