Билим берүү (68)
Ош шаардык билим берүү башкармалыгынын жасап жаткан иштери эл өкүлдөрүнүн жана шаар башчыларынын кызуу талкуусунда болуп жатат. Бул татаал тармактуу башкармалык болгондуктан анда чечилбеген маселе, көйгөйлөр көп. Башкармалыктын жетекчиси Авазбек Асановдун айтуусунда бул маселелердин келип чыгуусу да, аны чечүү жолдору да акча каражатына келип такалат.
- Агай, билим берүү өлкөдөгү негизги социалдык жагдай болуп эсептелет. Ош шаарында да бул жаатта бир топ маселелер бар. Алар тууралуу ачык-айкын маек курсак жакшы болмок…
- Ооба, сессияда, координациялык жыйындарда «чү» дегенде эле Ош шаардык билим берүү башкармалыгы сынга алынып жатат. Бул тармакта кандай көйгөйлөр, маселелер бар экенин, алардын чечилбей жатканын себептерин бизге «оӊдосоӊор болот» деп сунуш кылып отурган адамдардан жакшы билебиз. Биздеги көйгөйлөр экиге бөлүнөт. Жергиликтүү башкармалыкка, тактап айтканда, мэрия менен билим берүү башкармалыгына тийиштүү, экинчиси мамлекетке байланыштуу көйгөйлөр. Кээ бир адамдар буларды чаташтырып, мамлекеттик деӊгээлдеги көйгөйдү да менден талап кылып, «эмне үчүн карабайсыӊ?» дей беришет. Андай учурда «бул маселелер меники эмес, мамлекет чечиши керек» деп жетекчи катары айта албайсыӊ.
Билим берүүнүн сапатсыздыгынын биринчи көйгөйү - мектептерге бөлүнгөн акча каражатынын аздыгы. Эмгек акы аз болгондуктан жакшы мугалимдер башка жумуштарга кетип калып жатат. Чыдап иштеп жаткандарынын жакшы билим берүүгө көӊүлү жок. Мугалимдер алган айлыкка мен кол коюп отурган адаммын. Директорлор орточо эсеп менен 13-14 миӊ сом айлык алат. Директорго караганда көбүрөөк айлык алган 3-4 гана мугалим болот. Калганы баары 8-9 миӊ сомдон алышат. Турмуш шарты түптөлүп калгандар эптеп көз жумуп иштеп жатышат. Ал эми бала-чака багыш керек болгон жакшы кадрлар жеке менчик мектептерге же Орусияга кетип калып жатат.
Экинчи көйгөй – мектептердин материалдык-техникалык базасы. Биздин министрлик республикалык бюджеттен 700 миллиондон ашык акча алабыз. Мунун негизги бөлүгү эмгек акы менен соцфондго кетет. Калганы мектепке компьютер, китеп, буюм сатып алуу деген статьяларыбызга каражат жетпейт. Мектептерибиздин баарын компьютер менен камсыздай албай келебиз. Окуучулар отурган стол, парталар да союз мезгилиндеги боюнча. Жаӊы стандарттагы китептерге жетпей жатабыз. Китептин жетишсиздигинен китептер электрондук багытка өткөн. Себеби сабак толугу менен компьютер, интернет аркылуу болгондуктан китепти ошол жерден окуй беришет деген максат болгон. Бирок ал колдогу китептин ордун баса албайт экен. Колдо китептин жоктугу бир топ көйгөй жаратканда бир группа мугалимдер секциялык иште бул маселени айтышып, жыйынтыгында сабактын программаларын китепче кылып чыгарып, 3-4 мектепке таркатышат. Андан менин кабарым жок эле, бул окуя депутаттарга жетип, «эмне үчүн мыйзамсыз китеп сатышат» дешип иш бир топ татаалдашты. Ошол иш «коррупция, пайда көрүү жолу» деп аталды. Мектепте чоӊ жыйында ата-энелердин, мугалимдердин сунушу менен «Камкорчулар кеӊеши» түзүлгөн. Алардын курамы ата-энелерден турат. Мектепке керек болгон нерсени камкорчулар кеӊеши көтөрүп чыгып, ата-энелерден акча топтоп мектепке жардам берет. Атайын кабинети, эсепчиси, фонду болот. Мектепке керектүү нерсе камкорчулардын чечими менен гана алынат. Каражат жетпесе ата-энелерге кайрылып, колдорунан келген суммада жардам берүүлөрүн суранышат. Мектептин мугалими же директору өз алдынча окуучулардан акча жыйната албайт. Алар керектүү нерсесин алып бергиле деп камкорчу кеӊешке гана сунуш бере алат.
- Мыйзам түзүлгөнү менен мектепте, бала бакчада тарбиячылар, мугалимдер акча жыйнаган учур көп эле кездешет. Бирок ата-энелер да сыздаганы менен ачык айтышпайт. Ата-энелерге ишеничтүү болуусу үчүн каражат жыйноо иштерин компьютерлештирип, башкармалыкка атайын “Элсом” же “balance.kg” сыяктуу электрондук капчык программа түзсөӊөр болбойбу?
- Жакшы нерсе бул. Биз буга чейин элсомду иштеткенбиз, бирок терминалдар бузула берип тажаткан. Анын үсүтүнө маянанын аздыгынан бизге күчтүү программист да иштегени келбейт экен. Бирок бул иштерди ойлоп жүргөм, сентябрь айына чейин ишке киргизүүгө аракет кылам. Азыр деле ата-энелер акча бергенде эсеп-дүмүрчөктү талап кылуулары керек. Ата-эне балдарына жардам берүүсү кажет. Анча-мынча 300-500 сомдон топтошсо көп көрүп ызылдап чыгышат. Бир жолу телевидение аркылуу катуу айткан сөзүм үчүн да бир топ кагуу жедим. Америкада, Германияда деги эле бардык өлкөдө ата-энелер балдарына жардам берет. А бизде эмнеге болбосун? Кээ бир ата-энелер колунда каражаты болуп турса да “мен эмнеге берет экенмин, мектеп өзү кылсын” дейт. Бул нерселер туура эмес да.
- Депутаттар рейд кылганда көп мектептердин абалын көрүп, аябай кейиген учурлар болот. Сиз айткан эмгек акыны көп бергенде эле бул маселелер чечилип, билим берүүнүн деӊгээли жогорулайбы? Ошол мектептин директорлорун алмаштыруу чарасын көрбөйсүздөрбү?
- Эмгек акысы жогоруласа мугалимдердин эмгеги бааланып, алган акчасына жараша мугалим да тытынып иштеп калат. Директорлорду алмаштыруу боюнча мен көп иштерди кылдым. Бирок андан да начар директор келип калуусу толук мүмкүн экен. Биз жалпы эле мугалимдерге аттестация өткөрдүк. Жыйынтыгында алдыӊкы балл алгандарды сыйладык, начар балл алгандардын баасын өзүнөн башка эч ким билген жок. Бул иштерибиз мугалимдердин 95 пайызына таасир берди.
- Учурда кандидаттыгын жактаган адамдар көп болууда. Ошолорго доцент, профессор деген наамдарды жөн эле ыйгарып койбой илимин жактаганына кошо билим берүүсү төмөн болуп жаткан мектептерге 2-3 жыл директор кылып, ошол жерде көрсөткөн ишинин жыйынтыгын көргөндөн кийин даражасын берсе жакшы болмок. Ушул идеяны министрликтин жыйындарында сунуштасаӊыз болобу?
- Мен да илим жактаган адаммын. Бул анча- мынча адамдар ойлогондой оӊой иш эмес. Анын үстүнө мектептерде айлык аз болсо ким ал жерге барып директор болмок эле. Бул идеяны ишке ашыруу менен илим жактаган адамдардын санын гана азайткан болбосок билим берүүгө эч кандай таасири тийбейт деп ойлойм. Маселе айланып келип эле мугалимдин эмгек акысына барып такалат.
- Ар бир адам өзүнүн үстүнөн иштеп, билимдүү, тажрыйбалуу, издеген мыкты кызматкер болсо аны жумуш менен акча ээрчийт. Айлык аз деп эптеп-септеп иштеген адам айлык көтөрүлгөндө жакшы иштеп кетет деп ойлойсузбу?
- Ушул парадокс мени кыйнаган маселенин бири. “Бул жерде жеке менчик мектеп ачылып жатат экен” деген кепти угарым менен жакшы мугалимдеримди эстеп “ушуну алып кетип калышпаса экен” дейм. Айткандай алып кетип калышат. Мен жыл сайын жакшы мугалимдердин санын көбөйтүүгө аракет кылам, а аларды башка жакка тартып кетишет. Жылына 10 жакшы мугалим башка жакка кетсе алардын ордуна жаш мугалимдер келет. Анын төртөө эки-үч айда эле чыдабай кетип калышат. Эмгек акыны канчалык жакшы төлөп берсек, ошого жараша талап кылып, алардын деӊгээлин жакшыртабыз.
- Мектептердеги көйгөйлөрдү долбоорлор, гранттар, инвесторлор менен иштеп жакшыртса болбойбу? Мисалы, ОшМУну Каныбек Исаков өзүнүн иш билгилиги менен университеттин абалын шаардын өнүгүүсүнө теӊдеп койбодубу?
- Мен өзүм ОшМУдан келгем. Университетте түрдүү тармакта бөлүм башчы, декан, проректор болуп иштеп, ар түрдүү эл аралык долбоорлорду жазууга катышып, Европа, Түркия менен болгон долбоорлорду жетектеп, грант алуу, анын пайдасын жакшы билген адаммын. Бул кызматка келгениме эки жылдан ашкан болсо ушул аралыкта бир топ долбоорлор менен иштеп, жакшы иштерди аткардык жана аткарып жатабыз. Орто билим берүү менен жогорку окуу жайды такыр салыштырып болбойт.
Уулбү Каныбекова
Жогорку окуу жайлар – орто билимдин жана атайын орто билимдин негизинде тереӊ пайдубалдуу билимге ээ жогорку квалификациялуу атайын адистерди даярдоочу окуу-тарбия мекемелери. Кырызстандагы жогорку окуу жайлардын саны 60дан ашык. Ал эми түштүктөгү жалгыз атайын адистештирилген юридикалык окуу жай бар. Ал Ош мамлекеттик юридикалык институт. Жылына 500гө жакын юристтерди тарбиялап чыгарган институттун түзүлгөнүнө аз эле убакыт болгон. Өзүн-өзү каржылаган институт контракттык негизде гана билим берет.
ОшМЮИ жөнүндө маалымат
ОшМЮИ өлкөнүн түштүгүндөгү жалгыз адистешкен юридикалык жогорку окуу жайы. Ал юриспруденция, соттук экспертиза жана укук таануу адистиктери боюнча күндүзгү, сырттан жана дистанттык технологияларды колдонуу менен сырттан окуу формаларынын негизинде адистерди даярдайт. Бүтүрүүчүлөргө юриспруденция багыты боюнча мамлекеттик үлгүдөгү бакалавр даражасындагы диплом берилет. Бул диплом менен бүтүрүүчүлөр сот, укук коргоо органдарында (ички иштер министрлигинде, мамлекеттик улуттук коопсуздук комитетинде, прокуратура, финансылык полиция кызматында, нотариат, адвокатура) ж.б. мамлекеттик органдарда жана мамлекеттик эмес уюмдарда иштей алышат. Юридикалык колледждин бүтүрүүчүлөрүнө укук таануу адистиги боюнча диплом берилет. Алар андан ары адистештирилген факультеттердин биринде окууну 2-курстан улантууга же юридикалык мекемелерде иштөөгө мүмкүнчүлүк алышат.
Абитуриенттер ОшМЮИге жалпы республикалык тестирлөөнүн жыйынтыгы менен конкурстук негизде 1-курска кабыл алынат. Юридикалык колледжге институтта уюштурулган экзамендердин жыйынтыгы менен кабыл алынат.
ОшМЮИнин факультеттери
• Сот-прокуратура;
• Адвокатура жана юстиция;
• Тергөө-криминалистика;
• Башкаруу жана укук;
• Укук жана ишкердүүлүк;
• Сырттан юридикалык окуу;
• Юридикалык колледж;
• Дистанттык технологияларды колдонуу менен сырттан окуу.
Профессордук-окутуучулук жамааты
Окуу жайда 200гө жакын профессордук - окутуучулук жамаат эмгектенет. Алардын ичинде 44 илимдин кандидаттары, үч илимдин докторлору бар. Мындан сырткары эл агартуунун мыктылары, сот жана укук коргоо органдарында иштеген бай тажрыйбага ээ болгон адистер билим берет.
Материалдык-техникалык базасы
ОшМЮИнин мезгил талабына жооп берген үч окуу имараты бар. Заманбап техникалык каражаттар менен жабдылган окуу аудиториялары, лабораториялары, компьютердик класстар, криминалистика полигону жана спорттук залы институттун өзгөчөлүгүнө дал келет.
ОшМЮИде жети компьютердик класс-лабораторияда студенттер токтом маалымат-укуктук системасы менен интернет жана Wi-Fi байланышын акысыз колдонушат.
ОшМЮИ алыскы райондордон келген студенттерди бардык шарттарга жооп берген жатакана менен камсыз кылат. Заманбап үлгүдөгү сот отурумдар залында сот процесстери өткөрүлүп турат. ОшМЮИнин жетиштүү китеп фонду түзүлүп, үч китепкана окуу залдары менен электрондук китепкана өз ишин жүргүзүүдө.
Студенттик жашоо
ОшМЮИде ар түрдүү маданий коомдук жана тарбиялык иш-чаралар тынымсыз өткөрүлөт. Ошондой эле ден соолукту чыӊдоо максатында спорттун бир топ түрлөрү боюнча машыгуу залдары, студенттердин ар тараптуу калыптануусу үчүн атайын түзүлгөн борборлор, дискуссиялык клубдар иш алып барат. Азыркы учурда институтта дүйнөнүн чемпиондору, спорттун чеберлери, шаардык, облустук жана республикалык деӊгээлде өткөрүлгөн конкурстардын жеӊүүчүлөрү жана таланттуу улан-кыздар билим алышууда.
Окуу мөөнөтү:
Күндүзгү окуу формасы боюнча:
- жогорку бакалавр (Юриспруденция) — 4 жыл;
- соттук экспертиза — 5 жыл;
- 9-класстын билими менен (юр. колледж) – 2 жыл 10 ай;
- 11-класстын билими менен (юр. колледж) – 1 жыл 10 ай.
СЫРТТАН окуу формасы боюнча:
- жогорку билим базасында — 2,5 жыл;
- дистанттык окуу — орто билими менен – 5 жыл;
- 11-класстын билими менен (юр. колледж) – 2 жыл 4 ай.
- магистратура — 2,5 жыл.
Байболот Абытов, илимий иштер жана эл аралык байланыштары боюнча проректор:
«Максатыбыз - сапаттуу билим берүү»
- Бизде жалаӊ гана юристтер бир нече багытта даярдалат. Институттун түзүлгөнүнө аз болгонуна карабастан эл аралык деӊгээлде да өз аброю бар. Орусиянын бир катар салмактуу университеттери, Кытай, Казакстан өлкөрлөрүндөгү университеттер менен келишимдер түзүлгөн. Биздин окутуучулар, студенттер тынымсыз тажрыйба алмашып турушат. Айрыкча илимий практикалык байланыштарыбыз бекем. Негизги максатыбыз билим алууга умтулган студенттерге сапаттуу билим берүү. Бүгүнкү күндө бардык шарттар түзүлүп, заман талабына ылайык билим берүү системи негизделген. Сөзүм куру болбошу үчүн айтып өтөйүн. Студенттердин экзамен тапшыруусу, контракт төлөөсү бүт электрондоштурулган. Мисалы, студенттен АВН системинде компьютер аркылуу экзамен алынат. АВНге түшкөн натыйжаны студент эмес мугалим да оӊдоп-түзөө киргизе албайт. Себеби, база борбордо түзүлүп, ошол жактан гана оӊдоого мүмкүнчүлүк каралган. Бул система мугалим менен студенттин ортосундагы коррупцияны жоюуга чоӊ өбөлгө. Мындан сырткары атайын компьютердик борборубуз бар. Студенттер каалаган убагында кирип интернет тармагын колдоно алышат. Окуу усулдук базабыз, окуу тарбия иштери тиешелүү нукта жүргүзүлөт.
«Ар бир окуу корпуста адабият фонду түзүлгөн»
- Студенттер үчүн бардык шарттар түзүлгөн. Анткени, сабаттуу юристтер бүгүнкү күндүн талабы. Китеп фондубуз бар. Ар бир окуу корпусунда жана жатаканада студенттерге керектүү тиешелүү предметтер боюнча камсыз болгон адабият фонду түзүлгөн. Мындан сырткары спорт тармагында ийгилик жаратууну каалаган студенттер үчүн да мыкты шарттар түзүлгөн. Бир эле биздин окуу жайдын атынан эмес, өлкөнүн атынан чет жактарга чыгып ийгилик жараткан студенттерибиз көп. Алардын бири Төрөхан Багынбай уулу. Өзүӊүздөр билесиздер Азия оюндарында алтын медаль тагынып келди. Учурда магистратурада биринчи курста окуп жатат. Бүгүнкү замандын талабына ылайык, юриспруденция багытындагы жогорку квалификациядагы адистерди даярдоо биздин негизги миссиябыз, милдетибиз. Окутуучулук жамаат бул милдетти толугу менен аткарып жатат.
Бактыгүл Калдарбай кызы
Фото: Сыдык Токонов
«Менталдык арифметика» шаардагы мектептерде гана эмес, алыскы айыл жерлеринин мектептеринде да өнүгүп, окуучулар бул боюнча дүйнөлүк олимпиадаларга катышып, ийгилик жаратышууда. Буларга күбө болгон көп ата-энелерди «Бул кандай илим? Балдардын аӊ-сезимин такыр башка тарапка буруп салбайбы?» деген тынчсыздануу ойлор кыйнап жатат.Дегеле менталдык арифметика деген кандай окутулууда бул тууралуу Ноокат районунун Кыргыз-Ата айыл өкмөтүндөгү Т.Темиралиев атындагы орто мектептин менталдык арифметика боюнча мугалими Мунира Ысакова кеӊири айтып берет.
- Мунира айым, менталдык арифметика деген эмне? Бул илимди кайдан өздөштүргөнсүз?
- Менталдык арифметика 4 жаштан 16 жашка чейинки балдардын интеллектуалдык ой жүгүртүүсүн өстүрүүчү ыкма. Мен 2018-жылдын февраль айында Бишкектеги «Академия роста» аттуу окуу борборунун тандоосунан өтүп, бул илим боюнча окуу курсун аяктап келгем. Өткөн жылдын март айынан баштап балдарга сабак бере баштадым. «Академия роста» окуу борбору мугалимдерге компьютерге программа киргизип беришкен. Балдар мисалдарды колдору менен жана эч нерсе колдонбой көзү менен бир жерди тиктеп турган абалда ой жүгүртүү аркылуу чыгара алышат.
- Менталдык арифметиканы үйрөнүүнүн этаптары же баскычтары кандай?
- Балдар 10-12 баскычтан турган окутуудан өтөт. Эреже боюнча ар бир баскыч 3-4 айга созулат. Сабактар жумасына 1-2 жолудан болуп, натыйжада 1-1,5 жылда бала 4-5 орундуу сандардан турган ар кандай эсептерди чыгарганга үйрөнөт. Бирок биз мектептин программасына карап, жетекчилер менен кеӊешип иш план түзөбүз. Ага карап этептарга бөлүп алам.
- Буга ар бир эле бала жөндөмдүү боло алабы?
- Албетте, башка сабактардан өзгөчөлүгү аябай чоӊ. Эске тутуусу начар, башка сабактарга кызыгуусу жок, ой жүгүртүүсү төмөн балдарды мээсин иштетүүгө машыктыруу иретинде окутса болот. Негизинен сабакта балдар абакус куралы аркылуу мисалдарды бат эсептөөгө үйрөнүшөт. Эӊ алгачкы кытай эсептегич таштары чоподон болгон. Абакусту тапканга чейин бул куралды «соробан» деп аташкан. Тарыхый материалдарга ылайык, абакус менен иштөө боюнча эӊ байыркы китеп «Арифметика» деп аталган. Алгач бала абакустагы шуручаларды эки колунун жардамы менен жылдырып мисалдарды иштөөгө үйрөнөт. Акырындап иштеп менталдык картага өтөт. Ошол шуручаларды өзүнүн оюнда жылдырып жаткандай элес менен иштөөгө көнөт. Бара-бара мисалдарды оозеки, башкача айтканда, визуалдык түрдө чыгара баштайт.
- Көп ата-энелерден «Менталдык арифметика балдарга зыян экен. Көчөдө бара жатып деле колдорун кыймылдатып эсеп чыгарышат. Психиканы такыр буруп коет окшойт» деген пикирлерин угуп жатабыз...
- Сабак учурунда көбүрөөк манжалар менен алектенибиз. Сабакка катыша баштаган ар бир балага бул ыкмалар кызыктуу болот. Бир гана бул ыкма эмес, ар бир жаӊы нерсени кабыл алуу балага кызык көрүнөт. Балдар сабактан чыккандан кийин да башка досторуна өзүндөгү жаӊылыкты айтат жана көрсөтүп берет. Аларды таӊыркатып колдору менен эсепти бат чыгарып коет. Мындай учурларды көп эле байкап жүрөм. Бирок өзү менен өзү болуп, башка дүйнөгө кирип, манжалары жана эсеп менен гана алек болуп, адаттан тышкары болгон коркунучтуу абалга кептелген баланы байкай элекмин. Бул сабак окуучунун психикасына эч кандай терс таасирин тийгизбейт, зыян жагы жок. Тескерисинче, пайдалуу жагы абдан көп. Балдар бул ыкма менен мисалдарды бат эсептөөгө катар китепти шар окуганды, эске сактоону, фотографиялык эс- тутумун жогорку деӊгээлде өнүктүрө алат. Мисалы, көп балдар ыр жаттаганда эсине тута албай кыйналышат. Ал эми менталдык арифметиканы өздөштүргөн бала тексттерди, ырларды бат жаттап, бир көргөн адамдын элесин да эсине сактап кала алат. Балдар сабакта бир эле учурда ырдап жатып, жанылмач да айтууга үйрөнүшөт. Скакалка ойноп жаткан учурда топту чикитип мисал чыгара алышат. Илимде так көрсөтүлгөн баладагы өнүгүүнү айта кетсем:
Өз алдынча чечим кабыл алуу жөндөмдүүлүгү
Көӊүл бөлүү концентрациясын
Сүрөткө тартып алгыдай эс тутум
Маалыматты тез кабыл алуу
Өзүнө ишеним
Чыгармачылык аӊ-сезим
Окуудагы ийгиликтер
Элестетүү жана көрсөтүп берүү
Менталдык арифметикада окуган ар бир бала булардын баарына жөндөмдүү боло алат дегенден алысмын. Ар кимдин кабыл алуусу ар баша болорун да унутпашыбыз керек.
- Анда баш мээде кандайдыр бир өзгөрүү болот экен да?
- Негизинен бул ыкманын өзү баш мээнин эки жарым шарларын бирдей иштетет. Мисалы, сол жак мээ логикага, сүйлөөгө, анализ, рационалдуулукка жооп берсе, оӊ жак мээ кыялдарга, элестетүүгө жооп берет. Ал эми эки мээнин теӊ иштөөсү укмуштай ийгиликтерге жеткирет. Балдар сабактын этаптарын окуу аркылуу эки мээни бир учурда иштетүүгө жөндөмдүү болушат.
- Силердин окуучулар бул илимди кандай кабыл алышууда?
- «Академия роста» окуу борбору тынымсыз окуучулар арасында олимпиада өткөрүп турат. Мен балдарга билим бере баштагандан 3 ай өтүп, Чолпон-Ата шаарында эл аралык олимпиадага 5 окуучумду алпардым. Өлкөнүн бардык аймагынан барган 600 окуучунун арасынан 2 окуучум 1-орунду, 3 окуучум 2-орунду багындырды. Анын негизинде 3-класста окуган Талипжанова Айчолпон аттуу окуучум Дубайда өтүүчү дүйнөлүк олимпиадага жолдомо алып, ал жакта 15 мамлекеттен катышкан 1500 окуучунун ичинен да 1-орунду багынтып, менталдык арифметика боюнча чемпион аталды. Дагы бир окуучум Ибрагимова Диана Анталия шаарына барып 2-орунду ээледи. Ош облусунун аймагында өткөн олимпиадада Сатыбалдыева Имрана аттуу окуучум чемпион аталды. 24-мартта Кушбаков Арген аттуу окуучум Ташкентте өткөн эл аралык олимпиадада 3-орунду ээледи. Булар менин жана окуучуларымдын аз убакыттын ичиндеги ийгилигибиз болду. Бул жыйынтык менен биздин окуучулар менталдык арифметиканы кызыгуу менен кабыл алып, окушууда деп айта алам.
-Маегиӊизге рахмат, мыкты окуучуларды тарбиялап, окута бериӊиз.
Уулбү Каныбекова
Окумуштуу, жазуучу Сулайман Рысбаев: “Мен жазган “Алиппеден” 21 жылдан бери балдар тамга таанып келишет”
Понедельник, 25 Февраль 2019 04:09 Автор Бекмурат
Алгачкы кыргыз алиппеси 24 тамгадан түзүлүп, 1924-жылы 15-февралда илимпоз, педагог И. Арабаев тарабынан Ташкентте жарык көргөн. Андан кийин да бир топ “Алиппе” китептери даярдалып, далай билимдүү кишилердин тушоосун кескен. 1998-жылы чыгып, азыркы кезге чейин кыргыз элине тамга таанытып, сабатсыздыгын жоюп, окуганга, жазганга үйрөткөн, көргөндө балалыкты эске салган“Алиппе” китебинин автору Рысбаев Сулайман агай менен Ош шаарында кезигип калдык.
“Мектепке 10 чакырым жолду жөө басып барчубуз”
-Балалыгым Токтогул районунун алакандай Сары-Камыш айылында өттү. Чоӊ үй-бүлөдө өстүм. Чоӊ атам, чоӊ апам, ата-апамдар менен бактылуу жашадык. Апам Букен он бир баланы төрөп-өстүрдү. Мен экинчисимин. Балалык кездеримди эстегенде бийик тоолор, жашыл жайлоо, тунук булак, жер жайнаган түркүн гүлдөр, чыбык ат минип тай чаап ойноп жүргөн түздөр элестейт. Жазында мал айдап, боз үйлөрдү жүктөп алып көчүп чыкчу жайлоолор, кайрадан күзүндө кончу кыштоолор ошондогудай эсте. Чоӊ атам Рысбай жазында буурсун менен жер чийип, соко кармап, чөп чаап, чарчабай мал багып жүргөнү көзгө тартылат. Чоӊ апам Таажыбү боз үйдү мыктылап тикчү. Оймолоп шырдак оюп, түрдүүлөп ала кийиз жасап, кооздоп өрмөк согуп, элдик ырларды, жомокторду келиштире айтып, ооз комузду мыктап чертет эле. Атам Казыбай, апам Букен айылдын эӊ алдыӊкы мугалимдери болгон. Айылыбыздын дээрлик отуз-кырк жылдык тарыхында жүздөгөн балдарды окутуп-тарбиялашты. Чакан айыл болгондуктан, мектеп алыс. Биз он жыл бою мектепке жөө 10 чакырым жолду басып өтүп, чарчабай, ойноп, кыйналдык дебестен окуп бүттүк. 11 бир тууган баарыбыз мектепти калтырбай, эӊ жакшы окуп, билимдүү болуп өстүк. Мугалимдерибиз мыкты адистер болгон экен. Тарыхтан Кубат агай,физикадан Осмонкул агай, математикадан атам Казыбай, орус тилчи Модубай агайларыбыз бизге билим гана бербестен,татыктуу адам болууга да тарбиялаптыр, жол көрсөтүптүр. Мен ал агайларымды эстегенимде баскан-турганы, кийген кийимдери, жөнөкөйлүгү, адамгерчилиги, тереӊ билимдүүлүгү, эл алдындагы чексиз урмат-сыйга ээ болгондору элестейт. Мугалимдин негизги үлгүлөрүн агайларым көрсөтүшүптүр. Бүгүн да мугалим кандай болуш керек дегенде ошол агайларымдын үлгүсүн мисал кылып айтып келем.
Бала дүйнөсүнө байлаган - “Көлчүктөгү ай”
- Көп бир туугандын арасында өскөнүм да балдар адабиятына жакын болушума таасир берсе керек. Башталгыч класстарда окуп жүргөндө дубал гезиттерге ырларым чыгып турчу. Балдардын окуусу, жүрүм-туруму тууралуу сатиралык ырларды жаза берчүмүн. 9-10 класста Т.Кожомбердиевдин «Көлчүктөгү ай» деген китебин өтө таасирленип,кызыгып окуп калдым. Ошол китеп менин жолумду балдар адабиятына биротоло буруп койду окшойт. Анан Улуттук университеттин 1-курсуна кирип, алгачкы«Жатпас куурчак», «Апам качан келет» деген аӊгемелерим «Кыргызстан пионери» гезитине чыгып, тушоом кесилген. Айылда 9 жыл мугалим болуп иштедим. Кайра Бишкекке келип, 1987-жылы Кыргыз билим берүү академиясына конкурстан өтүп, ага илимий кызматкер болуп эмгектенип калдым. Мектептеги тажрыйбаӊ бар деп, окуу китептерди рецензиялатып көнүктүрүп, методикалык колдонмо-көрсөтмөлөрдү жаздырып, машыктырып, анан бизге окуу китептерди да жазууга тапшырма бере башташкан. Ошондо балдар үчүн чакан жомок, аӊгемелердин табылышы кыйын болор эле. Анан зарылчылыктан улам балдарга ылайыктап аӊгемелерди, жомокторду жазып, акыры аларды жыйнактап 1997-жылы «Жылмайып турган таш» аттуу жыйнагым чыкты. Андан бери 50дөн ашык аӊгеме-жомок жыйнактарды чыгардым. Бизде балдар жомоктору, аӊгемелердин таӊсыктыгы – мени балдар адабиятына биротоло байлады.
Элге тааныткан “Алиппе” китеби
-Академияга келгенден баштап адегенде ага илимий кызматкер, сектор башчысы, бөлүм башчысы жана лабораторияны жетектеп келдим. Далай программа, концепция, стандарт, методикалык эмгектерди, башталгыч кыргыз жана орус класстарына арнап «Алиппе», «Кыргыз тили», «Адеп», «Адабий окуу» сыяктуу 13 окуу китебин, ондогон методикалык жана окуу куралдарын, хрестоматияларды жаздым. Бакчаларга арнап да 5-6 китебим чыкты. Менин китептерим менен Өзбекстандын, Тажикстандын кыргыз мектептеринде балдар эне тилинен билим алып келет. 1995-жылы илимдин кандидаты, 2000-жылы доцент, 2006-жылы доктордук ишимди коргоп, 2010-жылы профессор, 2015-жылы Кыргыз билим берүү академиясынын мүчө-корреспонденти болдум. «Алиппе» китебим Парижде, Ленинградда, Москвада эл аралык китеп көргөзмөлөрүндө алтын медалдарга ээ болду. Илимий-методикалык эмгектеримди жазып жатып, чыгармачылык калган жок. Улам биринен келген эргүү экинчиси менен алмашып, бирин токтотуп, экинчисин баштап жүрүп экөөнү теӊ бирдей алып келатам. Менин оюмча окуу китептерим деле балдар үчүн, илимий-методикалык эмгектерим деле балдарга жакшы билим берүүсүнө жол көрсөтөр мугалимдер үчүн, аӊгеме-жомокторум деле балдар үчүн, кыскасы, баары эле барып балдарга багышталган сыяктуу. Алгачкы китебим – “Эл мугалими” токтогулдук Б.Батыркулов аттуу белгилүү педагогдун педагогикалык тажрыйбасы, анын кыргыз педагогикасына кошкон жаӊылыктары, новаторлугу тууралуу болчу. Андан кийин деле бир нече китептерди чыгардым. Менин атымды элге тааныткан чоӊ эмгегим, албетте, «Алиппе» болду. Биздин курактагылар Турусбеков, Рысбекованын авторлугундагы “Алиппе” китебин окуганбыз. 1924-жылдын 15-февралы биринчи “Алиппе” китеби чыккан күн эмеспи. Кийин мен 1998-жылы И. Арабаевдин, жогорудагы авторлордун идеясын чогултуп, жаӊы “Алиппе” китебин жаздым. Китеп жалпы элге сиӊип кетти. Андан бери 21 жыл болду. Ошондон бери жеткинчек балдар сүйүп окуп, билим жолуна түшүп келет.
“Өзүмдү унутуп, бирөөгө жардам берип эс алам”
-Чыгармачылык бир теӊ, акамемиядагы лаборатория башчысынын иши бир теӊ. Илимий иш, отчеттер, семинарлар, конференциялар, каттарга жооп жазуу, жазмаларды рецензиялоо, илимий кеӊешке даярдоо иштери колду абдан байлайт. Кечке отурган үстөлдөн турбай иштеп кеч кирген күндөр өтүүдө. Андан кийин колум бошоп кечинде, түн бышканга чейин чыгармачылык менен отурган убак көп болот. Ансыз кайдан аӊгеме-жомоктор жазылмак?! Ошондо чарчап-чаалыкканга карабай түнкү бир убакта да бир иш бүткөрүп алсам ошого каниет кылып, чер жазылып, ыраазы болуп, чарчоо унутулуп, жыргап калам. Менин эс алганым ошондо бир билинет. Кээде бала-чака менен табиятка чыгып, аба жутуп, эс алып, мээни сергитип, ошондо да бүтпөй жаткан иштерди башымда бышырып, үйгө келгенде баягы ишти кайра улантмай…
Турмуш деген турмуш, ойлогон ойду кыстаган турмуш жеӊет дегендей, ар кандай жеӊген жана жеӊилген кырдаалдар болот. Бирине кыжалат болсом, бирине каниет кылам. Ошондой кысталыш убактарда эч качан бирөөгө зыяным тийбесин, мен жеӊилсем да, менин зыяным тийбесин деп ойлойм. Өзүмдү унутуп, өзгөгө жардам берип, бирөөгө пайдалуу иш кылып, андан жан дүйнөмдү ыраазы кылып, эс алдырам…
“Обон жазчу болдум”
-Соӊку кездерде обон жазчу болдум. Учурда жыйырмадан ашык обондорум бар, бир нечеси белгилүү ырчылар тарабынан аткарылып келет. «Шат күндөр», «Мектеп вальсы», «Бийге чакырам», «Бакыт гүлү», «Мекен болбос ата журттун өзүндөй» сыяктуу ырлар менин обондорум экенин эл анча билбейт. Азыр Куурчак театры менен иштешип, жомокторумду сахналаштырсам деп жүрөм. Мультфильм тартып жатабыз.Буюрса, алдыӊкы күндөрдө жакшы жаӊылыктар болот деп үмүттөнүп жүргөн чак.
Келинчегим Чынар мектепте мугалим. үч уул, бир кызым бар. Баары турмуштан өз орундарын табышты. Иштеп-окуп жүрүшөт. Жакшынакай келиндерим, сегиз неберембар. Кызым Айгерим мага жардамчы болуп, жаӊы багытта иштерди башташып, мультфильм тартышып, сценарий жазышып, неберелерим баары жакшы окуп, көптү үмүттөндүрүп жүрүшөт.
“Жомокторду сахналаштырып, мультфильмдерди тартсам”
-Бала кезде кимдер гана кыялданбайт. Акын, жазуучу, сүрөтчү, актер, журналист, ал тургай архитектор болгум келчү. Бүгүнкү кезде кыялданганымдын көбүнө жетиштим. Кантип элге кызмат кылам деп ойлоно берчүмүн. Азыр заман өзгөрүп, өлкөбүз баш аламандыктан бир аз арылып, туура жолго багыт алууда. Буга чейинки он жылдыктар көп кыйынчылыктарды жаратты. Эми алдыда чыгармаларымды балдарыбызга жеткиликтүү чыгаруу, аларды сахналаштыруу, мультфильмдерди тартуу сыяктуу көп кыялдар бар. Буюрса, алар дагы аткарылар деген үмүттөмүн. Жаштарга көӊүл салып карап келем. Алардын алдында кеӊ келечек турат. Эмнеге жөндөмдүү болушса, ошого жетүүгө умтулуулары гана керек. Азыр эмне кылам десе баары даяр. Техниканын, агып келип жаткан жаӊылыктардын заманы, дүйнө азыркы жаштарга кеӊ кучагын жайды, кайда барам десе жол ачык. Бирок, негизги маселе жаштар ата журтун, анын келечегин, эмне кызмат кылсам, өнүктүрүүгө кандай эмгегимди арнасам деп гана ойлонушу керек.
Бүкалча Маматали кызы
Чаткалбай Райымбаев, ОшКӨУнун ректору: «Илим эч качан өлбөйт, аны улантуучулар сөзсүз чыгат»
Понедельник, 18 Февраль 2019 04:59 Автор Бекмурат
Илим - чындыкка болгон обьективдүү маалыматты иштеп чыгаруу жана системалоого багытталган адам ишмердигинин бөлүгү. Мындай ишмердиктин негизин фактыларды чогултуу жана аларды дайыма жаӊылап, системалап, анализ жүргүзүп, булардын негизинде жаӊы билимди же жалпылоону синтездөө түзөт. Ал эми илимдин заманбап түшүнүгү XVI, XVII кылымдарда калыптана баштаган. Дал ушул илим ааламында бир топ эмгектерди жаратып, окумуштуу атыккан илимпоздор тууралуу баяндоочу “Илимдеги инсан” рубрикабыз бар. Бул жолку коногубуз Кыргыз-өзбек университетинин ректору Райымбаев Чаткалбай Кенейбаевич болмокчу.
Илимий чыгармачылык жолу
Эмгек жолун 1992-жылы Ош техникумунда окутуучу болуп иштөөдөн баштаган. 1994-жылдан тартып Кыргыз -өзбек университетинде иштеп келет. Алгач университеттин каржы-экономика факультетинде окутуучулук кылуу менен бирге декандын орун басары кызматын аркалаган. 2006-жылдан 2009-жылга чейин экономика жана укук багытындагы адистерди кайра даярдоо факультетинин деканы болуп иштеген. 2009-жылдан 2013-жылга чейин ишканалар экономикасы жана башкаруу кафедрасынын башчысы болуп эмгектенип, 2013-жылдын июнь айынан тарта университеттин ректорлук кызматын аркалап келүүдө.
2006-жылы Кыргыз Республикасынын Улуттук илимдер академиясында «Кыргыз Республикасынын социалдык чөйрөсүнүн экономикалык көйгөйлөрү» деген аталыштагы кандидаттык диссертациясын ийгиликтүү жактаган. 2009-жылы Кыргыз Республикасынын Жогорку аттестациялык комиссиясы тарабынан доцент илимий даражасы ыйгарылган. 2017-жылы «Кыргыз Республикасынын социалдык комплексиндеги экономикалык көйгөйлөрдү чечүүнүн инновациялык жолдору» аталышындагы илимдин докторлук диссертациясын жактаган.
Жалал-Абаддагы К. Токтомаматов атындагы эл аралык университеттин алдында экономика боюнча диссертациялык кеӊештин мүчөсү.
Элүүдөн ашык илимий-усулдук эмгектердин ээси. Университеттин экономика багытындагы жогорку квалификациялуу адистерин даярдоодо жана окутуучулардын илимий чыгармачылыгын жогорулатууда чоӊ салымын кошуп келет.
«Биз жараткан эмгек пайдаланылууда»
- Илимге 1998-жылдан бери аралашып келе жатам. 20 жылдын жүзү болду. Анын жыйынтыктарын өзүӊүздөр билесиздер, 2006-жылы илимдин кандидаттыгы боюнча диссертациямды жактадым. 2017-жылы илимдин докторлугу диссертациямды жактадым. Биз тараптан иштелип чыккан сунуштарды, иштелмелерди өндүрүшкө киргизүү, ишке ашыруу өкмөттүн колдоосу менен болуш керек. Анткени, социалдык тармактын негизги бөлүгү бюджеттен көз каранды. Биринчи кезекте билим берүү тармагы, саламаттыкты сактоо тармагы, пособие, пенсиялар… Бул тармакта орун алган экономикалык көйгөйлөрдү канткенде чече алабыз? Канткенде калктын социалдык абалын жакшыртабыз деген маселелерге жооп издеп көрдүк. Бул багытта бир топ илимий макалалар жарык көрдү. Жалпысынан 60дан ашуун илимий макала жарык көргөн болсо, анын 20дан ашууну чет элдик журналдарга жарыяланды. Алар Казакстан, Өзбекстан, Орусия, Корея, Түркия, Малайзия жана Италиянын илимий популярдуу журналдары. Булар өзүнүн рейтинги, экономикалык багытта орду бар, эӊ негизгиси дүйнөлүк колдонууга ээ, инфо фактору нөлдөн жогору болгон журналдар болуп саналат. Макаланын журналга жарык көргөнүнүн эки жагы болот. Жөн эле жарык көрүп кала бериши мүмкүн, ошол эле мезгилде аталган макаланы бир нече илим изилдөөчүлөр пайдаланып, анын актуалдуугун арттырышы ыктымал. Анын жыйынтыгында ар бир окумуштууга пайдалануу көрсөткүчүнө жараша упай берилет. Учурда окумуштуулук даражамда жарык көргөн макалаларым 4 упай менен кетип жатат. Демек, биз жазган эмгектер коомчулук тараптан, айрыкча илим издөөчүлөр тарабынан пайдаланылууда.
«Алты аспирантка жетекчилик кылам»
- Пайдалануунун көрсөткүчүнүн бир упайын алуу үчүн макалага бир нече жолу шилтемелер болушу керек. Сен сунуштаган изилдөөлөр эске алынып, пайдаланышы маанилүү. Дүйнөлүк басылмаларда Scopus, WOS- Bigtimе деген системаларга кирген журналдар бар. Ошол журналдарга жарык көргөн макалалардын пайдалануу даражасына жараша илимдеги орду өзгөчө бааланат. Өзүбүздүн жогорку аттестациялык комиссиясы да жаӊы талаптарды иштеп чыккан. Илимдин кандидаттыгын же докторлугун жактоодо ошол журналдарда жарык көргөн макалалардын болуусун шарттайт да жыйынтыгында упай топтойт. Комиссия көргөзгөн упайды топтогондон кийин өзүнүн докторлугун же кандидаттыгын коргоого мүмкүнчүлүк алат. Кыргызстанда деле жогорудай журналдар бар. Эгер макалаӊыз Кыргызстандагы журналдарга чыкса 20 упай, Орусиянын журналдарына жарык көрсө 25 упай, ал эми Индия, Малайзия, Италия, Түркияда Scopus, WOS- Bigtimе системасындагы журналдарга жарык көргөн макала үчүн 40 упай берилет. Ушул берилген упайлардан эле кайсы журналдын аброю дүйнөлүк масштабда канчалык деӊгээлде экенин билүүгө болот. Негизинен, акыркы үч жылдан бери илим багытындагы саясат ушундай жүргүзүлүп жатат. Бул жакшы көрүнүш. Анткени, ар бир окумуштуунун рейтингин баалоодо спин-код аркылуу эле интернеттен көрүүгө болот. Журналдарды көтөрүп барып, көрсөтүп далилдеп отурбайсыӊ. Кимдин макаласы кандай, кайсы окумуштуу кандай даражада экенин аныктоого болот. 2010-жылдан баштап ОшМУнун алдында атайын илимдин кандидаттарын даярдоо боюнча диссертациялык кеӊеште мүчө катары 7 жылдай иштедим. Бир топ экономика жаатында илимдин кандидаттары даярдалды. Мен өзүм да беш-алты аспирантка жетекчилик кылам. Бүгүнкү күндө бир аспирант дипломун алып, учурда илимдин кандидаты болуп иштеп жатат. Ар бир корголгон кандидаттык-докторлук диссертация кичине болсо да экономикабыз үчүн кошкон салым.Мына ушундай бир топ илимпоздордун издөөлөрү менен бара-бара жакшы жыйынтыктарды берип, жетишкендиктерди жаратары бышык.
«Улук устатым тууралуу»
-Менин экономика багытына түшүшүмө, ушул багыттагы илимди жактоого түздөн-түз таасирин берген экономика илимдеринин доктору, Улуттук илимдер академиясынын мүчө корреспонденти, көп жылдар бою ОшМУда эмгектенген Купуев Пирмат Купуевич агай болду. Тилекке каршы, жакында мезгилсиз дүйнөдөн кайтып кетти. Бул киши менин илимий жетекчим катары көп жол көргөздү. Агай менин илимге түшүшүмө, ал жерде такшалышыма себепчи болду. Студент кезимде илимдин доктору, кандидаты деген адамдар менен үчүн идеалдуу кишилер болгон. Ал мезгилде илимдин докторлору саналуу гана болчу. Профессор болуу, жогорку окуу жайда сабак берүү мен үчүн идеалдагы иштер эле. Дал ушул сезимдердин таасири да илимге келишимде чоӊ роль ойнойт. Экинчи жагынан илимий жетекчимдин ишмердүүлүгү болду. Ошол эле мезгилде түз жол көргөзбөгөнү менен, илим жолундагы бир топ методикалык жактарынан жардам берген инсандар бар. Атасам, улуттук илимдер академиясынын академиги М. Мамасаидов агайдын да салымы чоӊ. Бизге окшогон жаш, илимге суусаган балдарды чогултуп, атайын илимий кеӊештерди уюштуруп, майда илимий макалаларды алып чыгуубузга тапшырмаларды берип, ошол макаланы талкууга алып чыкчу. Ал нерсе биз үчүн чоӊ мектеп болуп калды. Кийин диссертацияларды коргогондо көп тажрыйба топтодук. Кыргыз-Өзбек университети жаӊы ачылганда бир эле илимдин доктору, эки илимдин кандидаты менен ишин баштаган. Бүгүнкү күндө университетте 10дон ашуун илимдин докторлору, 70ден ашуун илимдин кандидаттары эмгектенишет.
«Даражага ак эмгеги менен жеткендерди сыйлайм”
-Кандидаттык даража алуу айтканга оӊой болгону менен талыкпаган эмгекти талап кылат. Илимге өзү бут багып кирип, бешене-тери менен иштеп илимдин кандидаттыгы даражасын алууга жетишкен болсо, ал адамды абдан сыйлайм. Анткени, ошол инсан өзү коргогон илимий ишинин артында бир топ маселелерге жолуккан. Азыр илимди жакташ өтө оор. Себеби, өлкөбүздө илимге болгон көӊүл буруу начар. Илим болбогон жерде өнүүгү болбойт. Биринчи кезекте билимге, билим аркылуу илимге көӊүл буруу керек. Өтө көп таланттуу жаштар бар. Бирок, жетишпеген турмуш илимге умтулууга шарт жаратпай келе жатат. Кээде отуруп “аттиӊ, ушул бала илим артынан кеткенде чоӊ ачылыштарды жасамак” деп ойлонуп калдам. Бирок, беш кол теӊ эмес, илимдин кандидаты деген диплому бар инсандардын баары эле жогоруда айткан талаптарга жооп берет дегенден алысмын. Кой аксагы менен миӊ дегендей.
«Илимдеги инсан моралдык байлыкка чөмүлөт»
-Илимде жараткан бир макалаӊ өзүӊ өстүргөн баладай эле ыйык болот. Кастарлап, аярлап, коргойсуӊ. Бирок, базар экономикасында эгерде илимдеги жасалган ачылыш болсо, өндүрүшкө абдан зарыл болгон бир эмгек жаратсаӊ материалдык да колдоо боло алат. Мунун артында абдан чоӊ акча каражаты турат деген кеп. Сенин акчаӊ жок болгон күндө да инвесторлор чыгат. Сатылууга турушу мүмкүн, эгер сатылбаса эмгегиӊди ишке ашырууда инвесторлор менен келишим түзүлүп, автоматтык түрдө каржылык абалыӊды жакшырта алат. Илимде кедей болуп калам деген түшүнүк болбойт. Анын түпкү жыйынтыгы материалдык жактан, моралдык жактан да колдоо көрсөтө алат. Бирок, максатка жетүү көп убакытты талап кылат. Көп жолу чайналып, жолун таппай айланып, бир топ изилдөөлөрдү жасоого туура келет. Анын көзүн таап, чечимин, түйүнүн кармаганыӊда – рахат. Кеп акчада эмес, издегениӊди тапканыӊда.
«Билимге суусаган жаштарды көрүп тынчтанам»
-Улуу муундар болмоюнча, алардын тажрыйбаларын пайдаланып, үйрөнмөйүнчө алдыга жылуу мүмкүн эмес. Ал эми жасалган иштерди колго алып, андан ары улантуучу жаштардын жоктугу коркунуч. Билимде, илимде болобу сөзсүз түрдө муундардын ортосундагы байланыш тыгыз болууга тийиш. Улуу муун колунан келген тажрыйбанын баарын жаштарга үйрөтүп, андан ары өркүндөтүүсүнө жардам беришибиз керек. Жаштарда да колдон алып, ишти алып кетүүгө мүмкүнчүлүгү болуусу зарыл. Жаштардын арасында илимге умтулган, илим менен алектенгендер көп. Мамлекетибиздин келечеги кеӊ деп ишеничтүү айта алам. Илим өлбөйт, аны улантуучулар сөзсүз түрдө чыгат. Бирок, деӊгээли түрдүү болуп калышы мүмкүн. Союз мезгилиндеги илим менен азыркы илим деӊгээлинин айырмачылыгы бар. Союз убагында Кыргызстандагы илимдин деӊгээли абдан күчтүү болгон. Муну ошол убактагы муун сыймыктануу менен айтып келет. Ал эми бүгүн ошол илим деӊгээли бир баскыч төмөн түшүп кеткени байкалат.
Бактыгүл Калдарбай кызы
Экономика илимдеринин доктору Расул Узенбаев: “Илим жаштарсыз – трагедия, ал эми улууларсыз - комедия”
Вторник, 29 Январь 2019 03:21 Автор Бекмурат
Экономика илимдеринин доктору, профессор, эл аралык байланыштар боюнча АКШнын (Миннесота), Россиянын (ВМУ), Казакстандын (КИМЕП) университеттеринде тажрыйба алмашып келген Расул Узенбаев бүгүнкү “Илимдеги инсан” рубрикабыздын кадырлуу коногу.
Илимпоз тууралуу
• Расул Узенбаев 1988-жылы “Мурас” бирикмесинде бухгалтер болуп баштап, экономист, финансист, башкы эсепчинин орун басары, Ош ПОСтун курулуш башкармалыгында башкы бухгалтер, Ош соода техникумунун окутуучусу, ал эми 1994-жылдан тартып Ош технологиялык университетинде эмгектенип келет.
• 1997-жылы өзүнүн демилгеси менен түштүк региондо, ОшТУда биринчилерден болуп “Бухгалтердик эсеп жана аудит” кафедрасы ачылган. Окутуучу, ага окутуучу, доцент, кафедра башчысы, 2003-2009-жылдары инженердик-экономика факультетинин деканы болуп эмгектенген.
• Илимий макалалары АКШ, Түркия, Россия, Казакстан, Тажикстан жана жергиликтүү басылмалардан жарык көргөн.
• Илимий педагогикалык иш мезгилинде 3 монографиясы, 60тан ашуун илимий макалалары, 30дан ашуун окуу-методикалык иштери басылып чыккан. Анын жетекчилиги менен 1 кандидаттык диссертация КУУнун жана КРСУнун астындагы диссертациялык кеӊеште ийгиликтүү корголгон. Азыркы учурда 3 аспиранттын илимий иштерине жетекчилик кылууда.
• 2016-жылдан бери КРнын Жогорку аттестациялык комиссиясынын 08.00.12 бухгалтердик эсеп, статистика адистиги боюнча эксперттик кеӊештин мүчөсү.
• Учурда ОшТУнун бухгалтердик эсеп жана аудит кафедрасын жетектейт.
- Агай, илим чөйрөсүнө канча жашыӊызда аралашып, канча жашыӊызда жана кайсыл темада доктордук ишиӊизди коргодуӊуз?
-1988- жылы Кыргыз мамлекеттик университетин бүтүп, окутуучуларымдын сунушу менен Ош шаарындагы “Мурас” элдик кол-өнөрчүлүк өндүрүш бирикмесине бухгалтердик кызмат ордуна бөлүнгөнмүн. Бул ишканада өз кесибим боюнча жакшы өндүрүштүк тажрыйба алдым. Илимге кызыгуу 34 жашымда, 1994-жылы Ош соода техникумунан Ош жогорку технологиялык колледжине же азыркы Ош технологиялык университетине которулган мезгилден башталды. Эӊ биринчи илимий-методикалык эмгектерим 1995-жылы жарыкка чыккан. Ал эмгектер мен үчүн эӊ баалуу жана эстелик. Андан бери бир топ убакыт өтүп, 20 жылдан кийин доктордук диссертациямды 2014-жылдын 1-октябрында, Бишкек шаарында КРСУ профессору О.К. Курманбековдун кеӊешчилиги астында “ФОЭАС шартында өндүрүш чыгымдарынын эсеби жана анализинин проблемалары: теория, методология жана практика” темасы боюнча 54 жашымда коргодум.
- Улуу жолго баштаган устаттарыӊыз тууралуу айтсаӊыз?
-Студент кезде сабак берип, жол көрсөткөн окутуучулар көп болгон. Ал эми илим чөйрөсүндө К.Токтомаматов атындагы Жалал-Абад эл аралык университетинин илимий иштер жана эл аралык байланыштар боюнча проректору, экономика илимдеринин доктору, профессор, кандидаттык диссертациянын жетекчиси Атабек Арзыбаев, Россиялык сырттан окуу финансылык-экономикалык институтунун кафедра башчысы, экономика илимдеринин докторуЛилия Гиляровская, экономика илимдеринин доктору, Б.Н. Ельцин атындагы Кыргыз-Россиялык Славян университетинин профессору, доктордук диссертациянын кеӊешчиси Оӊолбек Курманбеков, ошол эле окуу жайдын кафедра башчысы, экономика илимдеринин доктору, профессор Мукаш Исраиловду сыймыктануу менен устаттарым деп айта алам. Ар бири тажрыйбалуу педагог, дасыккан илимпоз, мыкты устат.
- Кээ бир жаш кандидаттарга көз карашыӊыз кандай?
-Азыркы мезгилде илим бир топ жашарды, илимий диссертацияларды жактоолор да жеӊилдеди. Жеӊил алынган илимий даражалар, наамдар коомдо бир топ тескери ойлорду жаратып келет. Кээде илимге тиешеси жок чиновниктерди, саясатчыларды, түрдүү жеӊил жерден аброй күткөн, наам издегендерди кызыктырды. Ал эми илгертен белгилүү болгондой жеӊил келген ийгиликтер кадыр-барксыз болору бышык. “Илим жаштарсыз – трагедия, ал эми улууларсыз - комедия” дегендей, албетте, илимде жаштар болуусу айдан ачык. Себеби, алар биздин эртеӊибиз, келечегибиз. Бирок оӊой-олтоӊ кандидат болуу максат болбошу керек.
- Айрымдардын илимий иштерин 50% плагиат деп таап чыгып, кандидаттыгын кайтарып алып жатышпайбы?
-Өзүнүн күнөөсүн сезген жана аны моюнга алган бул азаматтык жана чоӊ эрдик. “Антиплагиат” программасын колдонушубуз керек. Бул бир инструмент, таза илимдин бааланышы үчүн бир жол. Биз мындан да башка критерийлерди жана нормаларды иштеп чыгуубуз керек деп ойлойм. Муну менен илимге “жасалмалардын” келишине бөгөт коюлмак жана учурдагы зарыл нерсе . Убакыттын өтүшү менен чыныгы илимдин кишилерин мезгил өзү ээлеп, иргеп коет.
- Илимдеги адам байыбайт деп коюшат го…
-Туура, илим бул келечектин иши. Ал турмушка ашып, коомго пайда алып келүүсү үчүн бир топ жылдар керектелет. Бирок, азыркы маалыматташуу заманында балким, бул убакыт бир топ кыскарат десек болот. Ошентсе да илимдин жыйынтыктары илимпозго пайда алып келип, байытпайт. Илим коом үчүн жана аны келечекте өзгөртүү үчүн жасалат. Ошондуктан, чыныгы илимий адам бул – жупуну жашоо кечирген адам. Илим – руханий байлык. Ал эми материалдык байлыкка умтулган адам илимпоз эмес. Негизи, илим жана байлык бир индивидуумдун деӊгээлинде эмес, коомго карата каралуусу туура.
- Жаш кандидаттарга сунуш-пикириӊиз?
-Кандидаттык диплом үчүн өзүнүн адистигин таштап коюп, башка адистик боюнча илим изилдеп жаткандарга таӊ калам. Мындай шартта илим-изилдөөлөрдүн миӊден бири гана жемиштүү болуусу мүмкүн. Ага карабай азыркы илимий дипломго талапкерлер кайсыл адистик болбосун, эптеп эле диплом болсо болду болуп калышкандай. Мындай абалга илимий чөйрө да шарт түзүп коюуда. Жаш илимпоздор “мээнет менен бышырылган нандын даамы ширин” экенин жана илимий чөйрө “жасалма” кандидаттарды бары бир илимпоз катары эсептебестигин даана билүүсү зарыл.
- Маегиӊизге чоӊ рахмат, илимдеги кадамыӊыз арбый берсин, бар болуӊуз, агай!
Маматали кызы
Бүкалча
Ош мамлекеттик университетинин окутуучусу, профессор Букарбай Иметов : “Өмүрүӊдү бергенге арзыган максатыӊдын болушу - ийгиликтин сыры”
Среда, 16 Январь 2019 03:27 Автор Бекмурат
Илимпоз окутуучу, музыкант, Рыспай таануучу, музыкадан дагы мугалимдикти жакын көргөн, обончу, акындык, жазуучулук өнөрдү аркалап келаткан чыгармачыл инсан Иметов Букарбай агай менен илимдеги жетишкен ийгилиги, өмүр жолу тууралуу азын-оолак маек курдук.
- Агай, алгач чырпык ат минип чоӊойгон туулган жериӊизден, балалыгыӊыздан кеп баштасак.
-Мен 1951-жылы Ноокат районунун Кыргыз-Ата айыл өкмөтүнө караштуу Ак-Булак айылында төрөлгөм. Айылдагы К. Маркс орто мектебинде билим алгам. Агам аскер деӊиз флотуна аскердик кызматка кетип, үйдөгүлөргө каралашаар мен болгондуктан, үйдө калып калдым. Ал кезде Тельман колхозу деп койчу. Жыл сайын күз мезгилинде кесиптик окуу жайларына колхоз акча төлөп, стипендия, кийим-кечесин берип, 4-5 адамды окутчу. Мектепти бүтөрүм менен Кызыл-Кыядагы кесиптик техникумга 4 жигит окууга кеттик. Ал жактан устачылыкты үйрөнүп келип, Тельман колхозунда эки жыл жыгач уста болуп иштедим. Турмуш-шартка карап жүрүп, жогорку окуу жайга кечирээк кирип калдым.
- Устачылык кылып жүрүп, музыка жаатына кантип келип калдыӊыз? Мугалимдик тарттыбы же музыкабы?
-Өзү тээ бала кезимден эле ырдайт элем. Окууга ынтызар болуп жүрүп, армиядан келгенден кийин гана Ош пединститутунун музыкалык бөлүмүнө тапшырдым. Турмушта көрүп эле жүрөбүз, чыгармачыл адамдардын көбү чыгармачылыктан алысыраак кесиптердин ээлери. Ошентсе да чыгармачыл чөйрөдө жашап келишет. Буга адабиятта Ч.Айтматов менен Ж. Мамытовдун эле өмүр жолу жооп берет. Эми Чыӊгыз менен Жолондун жолу башка. Уста болуп иштөөгө турмуш аргасыз кылган. Ырдап жүргөнүм себеп болуп, музыкалык окуу жайга тапшырдым. Бирок, музыкага караганда мугалимдик тартты бейм, илимге көбүрөөк кирип кеттим окшойт.
-Илим жолуӊуз тууралуу кеп кылсаӊыз?
-1970-72-жылдары советтик армияда кызмат кылып келип, Ош мамлекеттик университетинин музыкалык факультетине тапшырып, окууну жакшы бүттүм. 1976-жылдан факультетке лаборант болуп жумушка орношуп, ошондон бери эмгектенип келатам. 1984-жылы Москва шаарына В.И. Ленин атындагы педагогикалык институтунда жогорку мектептин психологиясы жана педагогикасы кафедрасына стажер катары 2 жылдык окууга бардым. Ал учурда 1 жылдык аспирантура бөлүмү бар болчу. Ошого тапшырдым. Кызыгы СССР боюнча эӊ акыркылардан болуп кабыл алындым. 1988-жылы кандидаттык диссертациямды “Айыл жаштарын педагогикалык окуу жайынын даярдоо бөлүмдөрүнө кабыл алуу жана окутуу” темасында Виталий Александрович Сластенин деген белгилүү окумуштуунун жетекчилигинде коргодум. Келип, кайра пединстититуттун даярдоо бөлүмүндө окутуучудан баштап, 15 жылдай кафедра башчысы болуп иштедим. Андан кийин ОшМУда проректор, кесипке даярдоо жана прогноздоо институтунда директор болдум, профсоюз комитетинин башчысы, факультеттин деканы, институтта директор, кафедра башчысы болуп иштедим. Былтыры жетекчилик менен кеӊешип кафедра башчылыгын тапшырып берип, кафедранын профессору катары окутуучулук милдетимди аткарып, студенттер менен иштешип келатам. В.А. Сластенинден окуган бир тобубуз азыр жогорку окуу жайларында эмгектенебиз. Илимдин жоопкерчиликтүү жолуна салган ошол киши болгон.
- Агай, илимий иш менен кошо чыгармачылык менен да алектенип келесиз.
-Ооба, илим жөнүндө кеп кылганда 50дөй макала, китептер бар. Бирок, чыгарма жазуу бала кезимден ички тилек-ойлорум бири эле. Катарынан айтсам, Р. Абдыкадыров жөнүндө “Сендейди биз кайдан гана табабыз” деген макалалар, эскерүүлөр, чыгармалары ноталары менен кирген китеп түздүм. Андан кийин “Кыргыз музыкасынын тарыхы”, “Манас жана музыка” ( азыр “Кыргыз элдик музыкалык чыгармачылыгы” деп аталат) предмети боюнча программасын түзүп, азыр музыкалык факультеттерде колдонулуп жүрөт. Бул боюнча анча-мынча окулукту даярдап, буюрса китеп болуп чыгат. Мындан сырткары, сатирага, юморго жакын адаммын. Чогуу жүргөн адамдардын кызыктуу окуялары, чогултуп жүргөндөрүмдү кошуп “Тамаша” деген китеп чыгардым. “Кыргыз-Атам” деген китепте жер-суу аттары, балбандары, мыктылары жөнүндө, афоризмдерди, анча-мынча чиймелеп жүргөн ырларымды, “Рыспай” деген драманы, “Тетир жал” деген атам тууралуу поэманы киргиздим. ОшМУда Р. Абдыкадыров коомдук фондунун төрагасы катары андан кийинки иштерим “Рыспай” деген 6 томдукту 4 адам менен бирге түзүп чыгуу болду. Чыкканына жарым жылдай болуп калган бул эмгекте түзүүчү-редакторлук кылдым. Андан сырткары жыл сайын студенттерди тарбиялоо менен бирге, дипломдук, магистрдык иштерге жетекчилик кылып келем. Сыймыктанчу студенттерим аз эмес.
- Ийгиликтин сыры эмнеде деп ойлойсуз?
-Көпчүлүк адамдар эмгектениш керек дешет. Туура, эмгектениш керек. Эмгектен дагы адамды оолуктуруп, алдыга сүрөп турган максат болот да. Ички мотивиӊ күчтүү болсо, ошол жеӊип кетет. Байкаганыма караганда, адамдар жаш кезинде түрдүү тоскоолдуктарга учурап, жокчулук, барчылыкты көрүп өссө, ошол чоӊ түрткү болот экен. Негизгиси, өмүрүӊдү бергенге арзыган максатыӊ болсо, ийгиликтин сыры ошол деп ойлойм.
- Сиз сүйүп окуган китептер?
-Ар бир чыгарма турмуштун бир чоӊ жагын ачып берет. Эӊ биринчи аябай кызыгып, элестетип окуган К. Жантөшевдин “Каныбек” романы болду. Биздин муун талашып жүрүп окудук. Ч. Айтматов, Т. Касымбеков, Т. Сыдыкбеков, К. Осмоналиевдин, А. Токомбаевдин чыгармалары, В.М.Шукшиндин сатира, юморду кошуп жазганы, өтө сүйүп окуган Тургенев, Чеховдун чыгармалары болду. Китепканадагы китептер калбай калчу. Айдын жарыгына отуруп алып окуган күндөр али эсте. Жаш кезде колубузга тийген китептин баарын эле окуй берген экенбиз (күлүп). Ийгиликке жетүүдө китептин да оруну чоӊ.
- Үй-бүлөӊүз жөнүндө да айтсаӊыз. Балдарыӊыздан жолуӊузду жолдогону болдубу?
-Окууну бүтүп, иштеп калган кез. Ал жылдары Жалал-Абаддан Ошко окуусун улантканы келген кыздар бизде окуп калышты. Жубайым ошолор менен келген экен. Токтолуп калган учурум. Кыздарды тамак кылганына карап тандагын дегенди угуп калдым эле. Жатаканада жашайбыз. Жолдош балам бар болчу. Бир жолу кыздар тамак кылып, дымдап коюшкан экен, жанагы досум үйгө алып кирип коюптур тамашалап. Ошондон таанышып калдык. Тамагы абдан таттуу экен, жагып калды. Кийин сүйлөшүп жүрүп, жашырганда не, Ноокатка ала качып кеткенмин. Азыр Кудайга шүгүр, 2 уул, 1 кыздын ата-энесибиз. Баары жогорку билимдүү, колунда жумушу бар, бала-чакалуу болуп калышты. Чыгармачылыкка кызыга беришпеди окшойт. Кызымды музыкалык окууга берип көрдүм. Комуз чертимиш болуп жүрдү. “Ата, мен медик болом” дегенинен эркине койдум. Кыз бала күйүмдүү болот экен. Ооруп калсаӊ келип каралашып сүйүндүрүп турат. Кудайга ыраазыбыз.
- Бала кездеги кыялыӊыз орундалдыбы?
-Кээде өзүбүздүн жөндөмүбүздү өзүбүз билбеген учурларыбыз болот да. Биздин убакта багыт бере турган адамдар дагы жокко эсе болгон. Бала кезде адабият менен тарыхка музыкадан дагы көбүрөөк кызыкчумун. Ырдачумун дагы. Анан кыялымдын түпкүрүндө бир нерсе жазсам экен, санжыраны билсем экен дедим эле. Азыр буларга жетиштим. 70-80 пайыз ички көксөөм, мүдөөм орундалды десем болот. Кээде чогуу иштегендер музыкант эмес, жазуучу боло турган адамсыӊ деп калышат. Өзү табиятыман көк жаралган адаммын. Жетем дегениме жетип эле келатам, Кудайга шүгүр.
-Маегиӊизге рахмат, бекем ден соолук, үй-бүлөлүк бакубат жашоо, узак өмүр каалайбыз!
Обондоруӊ ак кууларга айлансын
Рыспай Абдыкадыровго
Кайрык тандап, кеч киргизип, таӊ тосуп,
Көөнөрбөгөн ыргактарды тапкандай.
Кайран талант кара жерди жара тээп,
Кайталангыс үнүн созуп жаткандай.
Жүлүн тепчип боздогон бир үн чыгат,
Бул эмнеси? Махабаттын ыйыбы?..
Мынча неге муун бошоп муӊканат,
Ашык жардын армандуу бир сырыбы?
Обондорун жаӊы эле жазгандай,
Оо дүйнөгө узаганы жалгандай.
Улуу талант Сулайман тоо бооруна,
Гүл тергени, ырдаганы баргандай.
Рыспай ким? Ырчылардын ырчысы,
Жашоо, өмүр, махабаттын жарчысы.
Эӊ бир назик, эӊ бир кымбат, эӊ аӊо,
Сүйүүлөрдүн мөлтүр тунук тамчысы.
Толгонуу
Убакыт ай кеткен тура билинбей,
Жыл алмашат кийип чечкен кийимдей.
Кеӊ ааламдын мейкининен карасак,
Биздин өмүр колдун жууган кириндей.
Кээде туман, кээде ачылып жаркылдай,
Өмүр барат улам ары салкындай.
Кайран жаштык, кайран жылдар, убакыт,
Бир дүрт этип, күйүп өчкөн жалындай.
Кечээ эле миндик го биз ат тандап,
Кыя карап, кыйынсынып, кыз жандап.
Күүлдөдүк Күнгө колдоп жетчүдөй,
Күүлөр чертип, бийлер бийлеп, ыр курап.
Бекмурза Зулуев, Ош гуманитардык-педагогикалык институтунун ректору, доцент: «ОГПИ менен тагдырлашмын»
Понедельник, 03 Декабрь 2018 04:13 Автор Бекмурат
«Мугалим мөмөлүү дарак», «дарак бир жерден көгөрөт» деген сөздөр «Бейне» рубрикасынын бүгүнкү каарманына тиешелүү. Карт тарыхка ээ окуу жайды жетектеп келе жаткан Бекмурза агай маек учурунда мугалимдик кесиби менен сыймыктанаарын айтып отурду. Төмөндө ата-энеси, үй-бүлөсү, өмүр жолу тууралуу макаланы сунуштайбыз.
«Жылкычынын үй-бүлөсүндө төрөлгөм»
-Мен 1972-жылы Өзгөн районунун Жалпак-Таш совхозунун Yч-Капчал айылында төрөлгөм. Yй-бүлөдө сегиз бир туугандын алтынчысымын. Менден улуу үч агам, эки эжем бар. Ата-энем өмүр бою совхоздун жылкысын багып, жылкычылык кесибин аркалап, ак эмгеги менен бизди чоӊойтту. Атам Бекболот Зулуев, апам Гүлсүн Суранчиева тилекке каршы, бүгүнкү күндө арабызда жок, көзү өтүп кеткен. Экөө теӊ жети жылдык билими менен окубай калышкан экен, жогорку билимибиз жок деп кейип калышчу. Ошон үчүн «үй-бүлөдө балдарымдын арасында зээндүүсүӊ, сен оку, балам» деп мага көп айтышчу. Эӊ улуу агам куруучулук кесибине ээ. Менден улуу агам ырга шыгы болгон үчүн музыкалык окуу жайга тапшырып, бирок үйдү, ата-энебизди сагына берип окуй албай таштап салган экен. Ал кезде мен 6-класста окучумун. Ошондо эле «мен окуйм» деген элем.
«Апамын жупкасын, көмөч нанын сагынам»
-Атам мени окусун, билим алсын дегенсип бардык шартты түздү. Тилекке каршы, ушул күндөрдү көрбөй кетти. Эч качан калп айтпа, эмгекчил бол деп үйрөттү. Анан «дарак бир жерден көгөрөт» деген сөзүн көп укчумун. Атамдын ошол сөзү менен кыйын кезеӊдерде да мугалимдик кесипти таштабай иштеп калдым. Акча алмашкан учурларда 20 сом айлык алып иштеген күндөрүм болду.
Ал эми апам тууралуу айта турган болсом, бардык балдар сыяктуу эле апамдын жасаган тамак-ашы мен үчүн башкача даамдуу экени талашсыз. Апам кымызды, жупканы өзгөчө жасачу. Ата-энем жылкычы болгон үчүн көбүнчө жайлоодо жүрүп калдык. Жайлоодо тандыр жок, апам казанды көмкөрүп туруп ошого нан жаап берчү. Көмөч нан деп койчу элек. Ошол көмөч нанды азырга чейин сагынам.
«Комсомол болгонума кубанып…»
-Мектепте жалаӊ "4" жана "5" деген бааларга окудум. Биз жашаган жер мектептен бир аз алысыраак болчу. Күн сайын 3 чакырым жолду басып өтүү менен мектепке барар элек. Окуучулук кездеги эӊ кубанычтуу күндөрүмдүн бири катары эсимде калганы комсомолдун катарына өтүү болду. Ал кезде комсомолго 9-10-класста кабыл алчу. Мен 7-класста окуган кезде кабыл алындым. Комсомолго өткөнүмө кубанып, 3 чакырым жолдо чуркап барып атама сүйүнчүлөгөм. Сабакты такыр калтырбайт элем. Кар оор түшкөнүнө карабай окууга барчумун.
Биз бала кезде мугалимдик кесип абдан ардактуу болчу. Мугалимдин коомдо өзгөчө орду бар болгон үчүн, негизги тарбияны мугалим бергендиктен жаш муундар мугалим болгусу келчү. 1987-жылы айылыбыздагы 8 жылдык мектепти аяктап, учурда өзүм жетектеп жаткан окуу жай Ош гуманитардык-педагогикалык институтунун башталгыч класстык билим берүү адистигине тапшырып окуп калдым. Окууга тапшырганда аталаш агаларымдын көбү «эмне үчүн «чоӊдукка» окуган жоксуӊ» деп тамашалашкан. 1991-жылы окууну аяктап, Ош мамлекеттик университетинин тарых адистигине тапшыргам.
«19 жашымда башталгыч класска мугалим болгом»
-1991-жылы шаардагы №42 -Керме-Тоо орто мектебинде башталгыч класстын мугалими болуп иштөө менен эмгек жолумду баштагам. Башталгыч класска мугалим болгон жылы аябай көп балдарды окуткам. Анткени, кыз балдар турмушка чыгып кетип, балдар ара жолдо калат дегенсип, ата-энелердин көбү мага алып келишкен. Эсимде 40тан ашык баланы окуткам. Ал мектепте жети жыл эмгектендим. 19 жашымда башталгыч класска мугалим, 20 жашымда башталгыч класска окуу бөлүмүнүн башчысы, 21 жашымда диреткордун тарбия иштери боюнча орун басары болдум. Азыркы жаштар менен өзүмдү салыштырсам, ошондо али өзүм бала бойдон эле коркпой жооптуу иштерди аткарган экем.
1997-жылдан мугалимдердин билимин өркүндөтүү институтуна методист, элдик педагогика каанасына башчы болуп иштедим. 2001-жылдан тарта Ош гуманитардык-педагогикалык институтуна мугалим болуп чакырылдым. Окуу жайда да декандын окуу иштери, тарбия иштери боюнча орун басары, декан болуп эмгектендим. 2011-жылдан баштап ректорлук кызматты аркалап келе жатам.
«Жетекчи болоюн деп иштеген жокмун»
-Ийгиликке жетүүдө биринчи кезекте эмгекти сүйө билүү керек деп эсептейм. Анан албетте, тырышчаактык керек. Бүгүнкү күндө кандай ийгиликке жетишкен болсом ошонун баарына ушул эмгек, тырышчаактык менен жеттим. Жетекчи болоюн деп иштеген жокмун. Биринчи кезекте өзүмдүн кесибимди сүйүү деген жатат. Менин лекциямды уккан жаштар эртеӊ көчөдөн көрүп калса ушул менин агайым деген коомчулукта пикир болсо, саламы түз болсо, ошол мага дем берет. Ректор болуу оюмда жок эле. Кудай буюруп бешенеме жазылган экен, өзүм окуп аяктаган окуу жайга ректор болуп калдым. Мен бул окуу жайга он беш жашымда келгем. Андыктан окуу жайым менин тагдырлашым десем да болот.
«Балдарым эмгекчил болушун каалайм»
-Өзүм шаарда жашаганым менен бош убактым болсо жер иштеткенди жакшы көрөм. Өзүм эле эмес балдарымы да эмгекке тарбиялоо максатында аларды да жер иштеткенге үйрөтөм. Бизди атам эмгекке, чынчылдыкка үйрөткөн, менин да балдарым эмгекчил болушун каалайм.
Эки уул, эки кыздын атасымын. Кыздарым экөө теӊ котормочулук адистикти тандашты. Бири англис тили боюнча, экинчиси испан тилинен билим алууда. Уулдарым учурда мектепте окушат. Келинчегим Айгүл - кыргыз тили мугалими, бүгүнкү күндө балдар менен үйдө отурат.
«Китеп - түбөлүктүү»
-Китеп окуганды жактырам. Учурда акыркы окуп жаткан китебим тарыхый багыттагы «Сталинди кантип өлтүрүшкөн?» деген котормо китеп, автору Рыскулбек Бакиров. Жаӊы китептерди көрсөм сөзсүз түрдө сатып алам. Кыздарым да чет өлкөгө чыксам «англис тилиндеги китептерди ала келиӊиз» деп суранышат. Балдарыма айтып калам, менден силерге эӊ чоӊ белек катары калтырып кетчү нерсем булар - китептер деп. Бирөөгө китеп бергенди жакшы көрөм. Китеп бул - түбөлүктүү деп эсептейм, актуалдуулугу жоголбойт.
Мугалим мугалимдигин гана кылыш керек деп дайым айтып калам. Саясатты саясатчылар эле кылсын. Саясатка баруу азыркы учурда оюмда жок. Азырынча мугалимдик кесипти аркалап, коомго пайдам тийип турсун.
Элира Чынтемир кызы
(Сүрөттөр автордун жеке архивинен алынды)
Сиз билесизби?
• Финландияда жогорку ылдамдыкта бараткан унаанын айдоочусуна бир жылдык кирешесинин суммасында айып пул салынат.
• Балдарыбыз сүйүп жеген «Киндер сюрприз» шоколадын АКШда сатууга тыюу салынган.
• Акула 100 литр суудагы бир тамчы кандын жытын сезе алат.
• Шоколаддын адамды өлүмгө жеткирген дозасы 10 килограмм.
• Көпөлөктөр жер титирөө учурунда уча албайт.
• Бир ручканын сыясы 50 000 сөз жазганга жетет.
• Гавайиде серфинг мектеп программасына киргизилген.
• Леонардо Да Винчи Мона Лизанын эринин тартууга 12 жыл убактысын кетирген.
• Байыркы Грецияда бейтап опперация учурунда каза болсо врачын колун кесип салуу салты болгон.
• Скорпион 2 жыл, кене 10 жыл эч нерсе жебей жашай алат.
• Алгачкы 2 сааттык кинотасманын пленкасы 3200 метр болгон.
• Кытайда балдардын жакшы окушу үчүн класста 20 мүнөт уктап алууга уруксат берилген.
• Өрдөктүн жөжөсү көзүн ачканда биринчи эмнени көрсө ошону энеси деп кабыл алат да, өрдөктүн өзүн такыр ээрчибей коет.
• Дельфиндер чөгүп бараткан адамды 200 метрден сезишет жана жардамга барышат.
• Кубик рубик оюнчугу дүйнөдө сатууда айфондон кийинки орунда турат.
• Жаныбарлар эс алуусу үчүн Токиодо зоопарктар жыл сайын 2 айга жабылат.
• Астронавттардын шлеминде мурунду аарчып тура турган нерсе бар.
• Ливермор шаарында 110 жылдан бери жанып турган лампочка бар.
• Бир күндө жаш балдар 400 жолу, ал эми чоӊдор 15 жолу күлүшөт.
Уулбү Каныбекова
Китеп окуу өмүрдү 2 жылга узартат. Бул - Йель университетинин окумуштуулары далилдеген факт. Китеп окуганда мээ клеткаларынын арасындагы байланыш күчөйт. Бул өз кезегинде нейродегенеративдүү оорулардын пайда болуусунан сактайт. Китеп окуу эске сактоо жөндөмүн жакшыртып, депрессия менен күрөшүүнүн жакшы ыкмасы болуп саналат.
Окуу стрессти төмөндөтөт
Окумуштуулар менен дарыгерлер стресстин - адам организминдеги оорулардын 60 пайызынын себепчиси болорун айтып келишет. Узак убакытка созулган стресс инсультту 50 пайызга, жүрөк-кан тамыр ооруларынын пайда болуусун 40 пайызга жогорулатат. Ал эми китеп окуу стресстин деӊгээлин 68 пайызга төмөндөтө алат экен. Болгону 6 мүнөт китеп окуу жүрөктүн согушун жакшыртып, булчуӊ эттин кычышканын басат. Бирок бул - монитордон карап окуу деген эмес.
Окуу уйкусуздукту дарылайт
Көптөгөн адамдар жатар алдында планшет менен телефонду карап жатышат. Алардан чыккан көк түстүү жарык организмдеги мелатонин (уйку гормону) гормонунун бөлүнүүсүн алсыратат. Ал эми китеп окуу жатар алдында уйкуну чакырат экен.
Китеп окуу кыйын учурлардан чыгууга жардам берет
Кээ бир адамдар китепти чындыктан качуу деп эсептешет. Бирок, илимий изилдөөлөр көрсөткөндөй, китеп окуу коомдогу ар кандай жөндөмдөрдү жогорулатарын көрсөткөн. Китепти көп окуган адамдар башкалар менен тил табышып, кыйын учурлардан чыгуусуна, керек болсо жакшы көргөн адамын түшүнүүгө да жеӊилирээк болот.
Дайджест---------------------------------
ЖЕР ТИТИРӨӨ КАЙСЫЛ АЙМАКТАРДА, КАНЧА БАЛЛГА ЖЕТТИ
Среда, 18 Ноябрь 2015
Спорт
Баястан Максатбек уулу, жеӊил атлетика боюнча спорт чебери: «Максатым - мекенимди дүйнөгө таанытуу»
Маданият
Ош улуттук драма театрынын актрисасы Надира Сарыкова: “Музыканын тили математиканын тилинен да татаал болорун билбепмин”
Интервьюлар---------------------------
Бюджет, экономика жана өнөр-жай маселелери боюнча туруктуу депутаттык комиссиясынын мүчөсү Илгиз Капаров: «Кыргызстанды башка өлкө менен теӊей албайм»
Понедельник, 27 Август 2018
Сурамжылоо-----------------------
Ош шаарынын тазалыгына кандай баа бересиз?
Добуштардын саны:: 38
Билим берүү-----------------------
Доор жана басма сөз
Понедельник, 16 Ноябрь 2015
-
ЧЫҢГЫЗ АЙТМАТОВДУН ААЛАМЫ
Понедельник, 12 Декабрь 2016 -
ФУТБОЛ академиясы ачылды
Понедельник, 16 Октябрь 2017 -
Сарык оорусу
Понедельник, 11 Сентябрь 2017
-
Саламатсызбы! Мен 19 жаштамын 17 жашымда суучечек оорусу менен Ооругам. А бирок азыр дагы ушул ...
-
Айсалкын эже менин кызым ооруп калды суу чечек оорусу менен сут ичсе болобу жашы 2 де ???
-
Сокур ичегигини.опера циия сыз айыктырса болобу?
-
Эрте келген турналар повестине дилбаян жазуу керек
Ош шамы коомдук-саясий гезити
Толугу менен...