Ош шаары (319)
Акыркы 3 жылдын ичинде Ош шаарында 10го чукул эс алуучу жайлар толугу менен оңдоо-түзөөдөн өткөрүлүп жашоочулардын пайдалануусуна берилген. Бул тууралуу өткөн саныбызда чагылдырып, “Космонавттар”, “Жеңиш”,”Ата-Түрк” жана И.Раззаков эс алуу жайларына саякат жасаганбыз. Ал эми бул жумада жаңы ишке берилген «Жибек жолу» жана дээрлик 99 % ы кайрадан оңдолуп, жаш көчөттөр эгилип, шаарыбызга көрк берип турган эс алуу жайлары - «Семетей», Шаардык сейил бак, Балдар сквери жана Жолон Мамытовдун ысмын алып жүргөн журналисттер аллеясы тууралуу кыскача баяндап, шаар тургундарынын пикирине орун беребиз.
Жолон Мамытов атындагы сейил бак
Башта бош жаткан 3,5 гектар жер өздөштүрүлүп, сейил бакка айланган. Белгилүү акын Жолон Мамытовдун ысымы ыйгарылган журналисттер аллеясына 2013-жылдан баштап 2000ге жакын арчалар эгилген. Бүгүнкү күнгө чейин 400 түп ийне жалбырактуу, 700 түп жазы жалбырактуу дарактар отургузулуп, жашылдандырылды. Сейил бакты абаттоону көрктөндүрүү, жашылдандыруу чарба комбинаты колго алган.
«Семетей» сейил багы
«Семетей» эс алуу багы Манас-Ата аймактык кеңешинде жайгашкан. Аймактык кеңеште көп кабаттуу үйлөрдөн сырткары 23 үй-бүлөлүк жатакана бар. Калкынын саны 31 668. 2015-жылы пайдаланууга берилген. Сейил бакты абаттоого жалпысынан 2,5 миллион сом каражат жумшалган.
Шаардык сейил бак
Шаардык сквер Т.Сатылганов атындагы облустук китепкананын жанында жайгашкан.2016-жылы толук реконструкцияланган. Жалпы сметалык баасы 1 900000 сом. Шаардык мэрия тарабынан 338 800, көрктөндүрүү жана жашылдандыруу комбинаты тарабынан 687238, эл аралык толеранттуулук үчүн уюму тарабынан 824 миң сом жумшалган.
«Жибек жолу» сейил багы
“Дархан” чайканасынын жанындагы «Жибек жолу» сейил багы жеке менчиктен мыйзам чегинде муниципалдык менчикке кайтарылып алынган. Учурда толугу менен кайрадан оңдолуп-түзөлүп, 13-октябрь күнү пайдаланууга берилди.
Эс алуу жайды оңдоп-түзөөгө жалпысынан 4, 5 млн. сом сарпталды. Ош шаарынын мэриясы тарабынан 2 млн. сом, Көрктөндүрүү жана жашылдандыруу чарба комбинатынан 1 млн. сом, “МКР” ЖЧК тарабынан 1,5 млн. сом бөлүнгөн. Эс алуу жайдын жалпы аянты 9 619 чарчы метрди түзөт. Курулуш иштери “Апсамат-курулуш” ЖЧКсы тарабынан жүргүзүлдү.
«Балдар» сквери
«Балдар» сквери Черемушки кичи районунда жайгашкан. Эс алуу багынын курулушуна 2 млн. 229 миң 420 сом жумшалды, мунун ичинен Ош шаардык мэриясынын салымы - 194 850 сом. Эс алуу багынын курулушуна БУУнун өнүктүрүү программасы, качкындар боюнча жогорку комиссариаты, ЮНИСЕФ жана Бүткүл дүйнөлүк азык-түлүк программасы өз салымдарын кошту. Шаардык көрктөндүрүү жана жашылдандыруу чарба комбинаты бакты жашылдандырууга, ыңгайлуу шарттарды түзүү иштерин жүргүздү. Бул жаңы социалдык инфратүзүм Черемушки кичи районундагы 15 000 ден ашык адамга, мунун ичинде 78 000 балага жеткиликтүү.
Ширин Абдраманова, Салиева көчөсүнүн жашоочусу:
-Мен көрктөндүрүү жана жашылдандыруу чарба комбинатында иштейм. Бул жерди абаттоо көп эмгекти талап кылды. Жумушчулар катуу мээнет кылышты. Эми этият урунуп, сындырбай, жулбай мамиле жасасак жакшы эле.
Учурда сейил бактын жашыл чөп эгилүүчү жерлерин жалбырактан арылтып, тазалап, кийинки жылы газон эгүүгө даярдап жатабыз. Бул жер башта жеке менчикке өтүп каралбай, тозуп кеткен, баары билишет. Мына эми минтип кайрадан жашоо тартууланып, жаңы бак болуп ачылды. Шаар тургундарынын эс алуусун ойлогон, элге мыкты шарт түзүп жаткан шаардык мэрияга терең ыраазыбыз.
Алима Батырова, Мады айыл аймагынын Учкун айылынын жашоочусу:
-Бул бактын кайра жашарып, жашылданып таптаза болуп турган бүгүнкү көрүнүшү кимди болбосун кубантпай койбойт. Жаштар, чоңдор, балдар келип эс алышууда. Келерки жылы мындан да өтүп кулпурат бул жер, буюрса. Мэрияга, А.Наватовага Алла ыраазы болсун. Тозуп жаткан жерди минтип таптакыр өзгөртүп койду. Баары алкап жатышат.
Мыскал Маматалиева, ОшМУнун медициналык колледжинин 3-курсунун студенти:
-Башта деле бул жерден өтчүбүз. Аябай абалы начар болчу. Кирип араламак турсун, өткүчө шашчубуз. Бүгүн биз кыздар атайы эс алалы таза абада деп келдик. Аябай сонун болуп калыптыр. Ош шаарынын күндөн күнгө өзгөрүп жатышына кубанабыз, албетте. Менимче өлкө боюнча Ош шаары таза шаар болсо керек, жашылданып, жашарып баратканы боюнча да. Мен сыймыктанам Ош шаарым менен.
Нуртилек Кубатбек уулу, У.Салиева атындагы мектеп-гимназиянын окуучусу:
-Биз жаңы ачылган «Жибек жолу» эс алуу багына бош убакта келип эс алып жатабыз.
Чынында биз үчүн бул жердин оңдолушу чоң майрам болду. Башта каякка басарыбызды билбей баш катчу. Азыр эми жыргап калдык. Классташтар келип ары-бери басабыз. Таза аба, унаалардын добушу угулбайт, коопсуз. Калаа башчысына, комбинаттын жетекчилигине, жумушчуларга рахмат айтабыз.
Баяман Дамирбек уулу, шаар тургуну:
-Шаарыбыздагы эс алуу бактарынын кайрадан оңдолушу, түнкү чырактардын коюлушу баарын эле кубантса керек. Башта ата-энелерибиз бакка барбагыла, бирөө жарым тийишет, тоноп кетет деп коруп турушчу. Капкараңгы болуп, тозуп жатчу эмес беле. Азыр болсо тескерисинче «бакка барып ойногула жолдон алыс, таза абадан дем алып» деп айтышат. Анткени бактар заманбап жасалгаланып, чырактар жанып жапжарык болуп турат. Абасы да таза, көңүлүң сергийт чынында.
Масим Турсунбекова
Фото Сыдык Токонов
А.Кадырбаев 10-октябрь күнү Жапалак айылдык аймактык башкармалыгынын жашоочулары менен жолугушту. Жолугушууга вице-мэр жана шаардагы тиешелүү мекеме. ишканалардын жетекчилери да барышты.
Алгач Ош шаарында 2017-жылдын 9 айында жасалган иштерди баяндаган тасма көрсөтүлдү. Андан соң А.Кадырбаев жашоочулардын кат аркылуу келген суроолоруна жооп берди. Жол жана таза суу маселеси жапалактыктардын эң негизги көйгөйү экенин билген шаар башчысы бул багытта иштер жүрүп жаткандыгын билдирди. Калаа башчы акыркы үч жыл ичинде эмне иштерди жасагандыгын айтты. Мэр буга чейин жеке менчикке сатылып кеткен жерлерди мыйзам жолунда муниципалдык менчикке кайтарып алгандыгын, Жапалак аймагына суу берүүгө жетишкендиктерин, көчөлөрүн түнкү жарыктандыруулар менен камсыз кылгандыгын, ошондой эле мындан ары аталган аймакка дагы да көңүл буруларын кошумчалап өттү.
Тургундар шаар башчысына коомдук транспорт каттамдары, көчөлөрдү жарыктандыруу багытындагы суроолорун берип, тиешелүү жоопторун алышты. Жолугушууга жалпысынан миңге чукул тургундар катышып, берилген ар бир суроо протоколго киргизилди.
Өз кезегинде калаа башчы ар бир суроого өз-өзүнчө токтолуп, тиешелүү жетекчилерге жеринен тапшырмаларды берди.
Шаар тургуну Yмүт Алимбекова акыркы жылдары Жапалакка жакшы көңүл бурулуп жаткандыгын айтты:
- Жапалак айылдык аймактык башкармалыгында жакшы саамалыктар көп болууда. Бүгүн мэр 9 ай ичинде аткарган иштери боюнча тааныштырды. Буга чейин биздин аймакка такыр көңүл бурулган эмес. Азыр түнкү чырактар коюлуп жатат. Жакынкы жылдары газ менен камсыз болгону жатабыз. Көчөлөрүбүзгө асфальт басып берип жатат. Мунун баарына күбө болуп отуруп өзүмчө кубанып калдым. Рахмат мэрге, буга чейин көңүл бурулбаган аймакка келип көйгөйлөрдү чечип жатат.
Жергиликтүү жашоочу Арзыкан Тойчиева болуп жаткан иштерди көрүп мэрге ыраазычылык билдирди:
- Иштеген ушунчалык болот. Ким эле бизге жол чырактарды, түнкү чырактарды коюп бериптир. Көчөлөргө шагыл төгүп жатат. Ушул убакка чейин Жапалакка эч ким көңүл бурган эмес. Бул инимдин жасаган иштерин көрүп, ыраазычылыгымды гана билдирип жүрөм.
БексултанНуркамилуулу
Ош шаарынын мэри Айтмамат Кадырбаев эл менен бетме-бет жолугуп, ачык-айкын баарлашууну адатка айланткан. Жолугушууларда ар бир тургун өзүнүн жүрөк өйүгөн маселесин шаар мэрине ачык айтып, тиешелүү жообун ала алат. Айтылган көйгөй ошол жерде айтылып эле калбастан тиешелүү жетекчиге тапшырма катары берилип, кийинки жолугушууда толук маалымат берилип келет. А.Кадырбаев мына ошондой эл менен жолугушууну кайрадан баштады. 9-10-октябрь күндөрү Амир-Темур аймактык кеңешинин жана Жапалак айылдык аймактык башкармалыгынын жашоочулары менен жолукту. Жолугушууда тургундар калаа башчыга суроо беришип, жеринде жооп ала алышты.
Амир-Темур аймактык кеңешинин жашоочулары:
«Жашообуз оң жакка өзгөрдү»
9-октябрь күнү А.Кадырбаев Амир-Темур аймактык кеңешинин тургундары менен жолугушту. Жолугушууга вице-мэрлер Асылбек Топчубаев, Шакир Зулимов жана шаардагы тиешелүү мекеме, ишканалардын жетекчилери катышты.
Шаар башчы учурда 9 мектептин курулуш иштери жүрүп, бир канча бала бакчалар курулуп жаткандыгына токтолуп, акыркы жылдары Ош шаарынын бюджети 300 миллион сомго өскөндүгүн айтты. Ошондой эле акчаны үнөмдүү пайдаланып, 40 млн.сомго курулган баштагы бала бакчалардай эле бала бакчаларды 20 млн.сомго куруп жаткандыгын, акыркы эки жыл шаарда курулуштун жылы болуп, гранттык акчадан көпүрө курулуп, вело жол, унаа жолдору салынгандыгын жана акыркы үч жарым жылда 22 км. жол капиталдык ремонттон өткөндүгүн билдирди. Ошондой эле калаа башчы Ош шаарына Орто Азияда жок көргөзмө аянтчасы (подиум) куруларын, ФИФА тарабынан футбол академиясы курулуп, заманбап медициналык жабдуулар менен жабдылган оорукана курулуп жаткандыгын, калктын камын ойлоодо колдон келген мүмкүнчүлүктөр пайдаланып жаткандыгын белгиледи.
Жолугушууга келген жашоочулар тарабынан бир нече суроолор берилди. Жергиликтүү жашоочулар көчөлөргө шагыл төшөө, айрым көчөлөргө жардамчы жол чырактары жетишпестиги, кээ бир көчөлөрдө суу түтүгү болгону менен суу берилбей жаткандыгы, маршруттук каттамдардын айдоочулары окуучуларды албай жаткандыгы боюнча суроолорду беришти. Айрым мугалимдер мектептин ремонтуна деген да даттануу болуп жатат.
Мэр суроолордун ар бирине токтолуп, тиешелүү кызматкерлерге жеринде тапшырмаларды берди.
Жолугушууга келген жашоочу Өктөм Раимбердиев мэрге мугалимдердин ремонтко акча сурап жаткандыгы тууралуу суроо бергендигин жана натыйжалуу жооп уккандыгын биз менен бөлүштү.
- Мэр биздин көйгөйлөрүбүздү угат. Ар дайым жолугушууга келгенде бир маселени чечип кетебиз. Мэр тапшырма бериши менен кийинки күнү көйгөйүбүз чечилет. Бүгүн мен мугалимдердин мыйзамсыз акча талап кылуусу боюнча суроо бердим. Мэр билим берүү башкармалыгынын башчысынын орун басарынан сурап, такташын буйруду. Көйгөйлөрүбүздүн чечилгендиги үчүн рахматыбызды айтабыз,-дейт Ө. Раимбердиев.
Ушул эле аймактын жашоочусу Садырдин Амиржанов буга чейинки бир да мэр келип элдин көйгөйүн укпагандыгын, А.Кадырбаев келгенден бери шаар жашоосу оң жакка өзгөрүп жаткандыгына токтолду:
- Көп жакшы иштерди жасады. Көпүрөлөрдү курду. Эми башка жакта жок көргөзмө аянтча курулат деп жатат. Бул анын иштегенинин белгиси эмей эмне. Ушул мэр келгенден бери жашообуз оң жакка өзгөрдү. Көйгөйлөрүбүздү угуп, колунан келгенче жардам берип жатат. Айтмамат Тентибаевичтин шаар тургундары менен мамилеси жакшы. Эл сүйгөн мэр десем жаңылышпайм.
Мухриниса Каримова А.Кадырбаевдин шаарга жакшы иштерди жасагандыгы үчүн ыраазы экендигин айтат:
- Шаарыбызды гүлгө ороп таза кылды. Мектептерди, бала бакчаларды куруп жатат. Эс алуу бактары кайрадан толук оңдолуп, жашоочулардын көңүлүн көтөрүүдө. Бүгүн калаа башчыбыз буюрса, биздин аймакты эки жылда газ менен камсыз болосуңар деп айтты. Мектеп көйгөйүн да чечип берем деп жатат. Элдин атынан Айтмамат Тентибаевичке ыраазычылык билдирем.
Ханифа Якубова:
- Мен калаа башчыдан абдан ыраазымын. Эч ким жасабаган иштерди жасап жатат. 30 жылдан бери жарык көрбөгөн көчөлөрүбүз жарыктандырылды. Бүгүн мен жашаган 217-кварталга трансформатор берилиптир. Ошону мэр менен болгон жыйында отуруп телефондо угуп, кубанып кетип, мэрге ыраазычылык билдирдим. Абдан ыраазымын. Өмүрү узун болуп, ушундай жакшы иштерди жасап элге кызмат кылып жүрө берсин.
11-октябрь күнү Курманжан-Датка-2 аймактык кеңешинде алгачкы жолу бала бакча ачылды. Ачылуу аземине калаа башчы Айтмамат Кадырбаев, шаардык Кеңештин төрагасынын орун басары Бактыбек Каналиев, вице-мэр Нурбек Кадыров, мекеме. ишканалардын жетекчилери жана жергиликтүү тургундар катышты.
Айтмамат Кадырбаев:
"Бул бала бакча балдардын келечегине болгон инвестиция"
Калаа башчы А.Кадырбаев аталган аймакка алгачкы жолу бала бакча салынып жаткандыгын, буга чейин ал аймакка эч кандай көңүл бурулбагандыгын айтып, буларга токтолду:
- Бул аймак шаардан бир аз алыс болгондуктан таза суу, бала бакча, мектеп деген маселени алгач эл менен жолугушуумда айтышкан эле. Көп өтпөй таза суу көйгөйүн жөнгө салып, мына бүгүн болсо 75 орундуу балдар бакчасын куруп бүтүп, тапшырып жатабыз. Эл үчүн, наристелер үчүн бүгүн кубанычтуу күн. Ушул жерден тарбия алган балдар, эрезеге жеткенде өз өлкөсүнөн жардамын аябайт деп ишенебиз. Бул бакчаны балдардын келечегинин инвестициясы деп билиңиздер. Балдарга азыр биз кам көрсөк, эртең балдар бизге кам көрөт.
Шаардык Кеңештин төрагасынын орун басары Бактыбек Каналиев бала бакча балдардын келечекке болгон умтулуусун шыктандыруучу алгачкы үй экенин айтып, келечек ээлерин жана жергиликтүү тургундарды жаңы ачылган балдар бакчасы менен куттуктап өттү.
Жаңы ачылган бала бакчага аксакалдар да батасын берип, ак жолжой болсун деген тилектерин билдиришти.
Андан соң бакчанын расмий ачылуусу болуп, кызыл тасма кесилди. Мэр баштаган топ бала бакчанын ички жасалгасы, шарты менен таанышып чыктык.
«А.Кадырбаевге канча ыраазычылык билдирсек да аздык кылат»
Ачылыш аземине келген жашоочу Ирсалат Тажиева кубанычын биз менен бөлүштү:
- Биздин жумушубуз абдан көп. Балдарды алыс жактагы бакчага алып барып абдан кыйналчубуз. Өздөрүн жөнөтсөк маршрутка албай өтүп кетип, абдан көйгөйлөр болчу. Эми мына жаңы бакча ачылып кубанып турган учурубуз. Эми неберелерибиз өздөрү эле барып келе беришет. Мэрдин жасап жаткан иштери көзгө көрүнөрлүк болуп жатат. Анын жасаган иштеринин натыйжасында бизге таза суу берилди. Айтмамат Кадырбаевге канча ыраазычылык билдирсек да аздык кылат.
«Анык элдин уулу деп ушуну айт»
Аймактык кеңештин жашоочусу Умсун Алиева да неберелерин шаардагы бала бакчаларга алып барып кыйналгандыгын айтат. Ал өз сөзүндө 20 жылдан ашык убактан бери бакча маселеси чечилбей келгенине токтолду:
- Бул аймактын түптөлгөнүнө 50 жыл болду. Менин ушул жерде жашаганыма быйыл 20 жыл болот. Биз келгенде бала бакча эмес, таза суу да жок болчу. Балдарыбызды шаардагы мектептерге, бала бакчаларга ташычубуз. Кыштын күнү бир азап болчу. Борбордук жолго чыгып, балдарыбызды шаарга алып барып, кайра алып келип абдан кыйналып жашадык. Минтип жаңы бакча ачылса ошол күндөр эстен чыгып кетет экен. Мындай бакчаны салып, элдин камын ойлогон мэрибиз Айтмамат Кадырбаевге терең ыраазычылык билдирем. Биздин көйгөйлөрүбүздүн басымдуу бөлүгүн чечип берди. Биринчи келип биз менен жолугуп, көйгөйлөрүңөрдү чечип берем дегенде ишенген эмес элек. Анык элдин уулу деп ушуну айт. Элим деген жетекчи экен. Сөзүнүн үстүнөн чыгып, таза суу, бала бакча деген көйгөйлөрүбүздөн арылтты. Бул жасагандары үчүн абдан ыраазыбыз.
Маалымат үчүн: «Ширинтай» бала бакчасы 75 орундуу болуп, эки кабат имараттан турат. Ичи заманбап жасалгаланып, балдар үчүн көрсөтмө куралдар, стол-стулдар коюлган. Бакчанын жалпы сметалык баасы 20 млн. 200 миң сом болгон. Ал эми тендердик баасы 10 млн. 200 миң сомду түздү. Курулушту «Иверия» ЖЧКсы бүтүрдү.
Бексултан Нуркамил уулу
4-5-октябрь күндөрү Ош шаарынын 3017 жылдыгы салтанаттуу белгиленди: спорттук мелдештер уюштурулуп, жез таңдай акындар айтышы болду. Аз камсыз болгон жана аярлуу катмардын балдарына калаа башчысы А.Кадырбаев тарабынан белектер тартууланды. А.Кадырбаев 5-октябрь күнү Ош шаары менен кызматташкан башка өлкөнүн шаарларынан келген өкүлдөрдү кабыл алды. Меймандар шаар күнүнө карата куттуктоолорун арнашты. Борбордук аянтта сахналаштырылган концерт конокторго тартууланып, айыл чарба техникаларынын көргөзмөсү болуп, күзгү мөмө-жемиштердин жарманкеси менен коштолду. И.Раззаков эс алуу багынын ачылышы да бул күнгө туш келди..
Ош шаарынын күнүнө арналган иш чара 4-октябрь күнү «Баарына бир дүйнө» аттуу кайрымдуулук акциясы менен башталды. Ага калаа башчы Айтмамат Кадырбаев жана Түркиянын Амасия шаарынан келген өкүлдөр катышты. Акцияга алтымыштан ашуун аз камсыз болгон жана мүмкүнчүлүгү чектелген үй-бүлөлөрдүн балдары чакырылган. Иш чара «Нур» кинотеатрында болуп, анда шаар мэри А.Кадырбаев балдардын келечегине кам көрүү ар бир ата-эненин милдети экенин белгилеп, мындай кайрымдуулук акциялары жыл сайын улана берерин кошумчалады.
Аталган акция Ош шаардык жаштар иштери боюнча комитети тарабынан уюштурулуп, бир күн кечке балдардын маанайын көтөрүштү.
Андан соң «Коңурат» спорттук комплексинде «Атам, апам жана мен-ынтымактуу үй-бүлө» аттуу спорттук мелдеш башталды. Ага биринчи вице-мэр Замирбек Аскаров жана Түркия өлкөсүнүн келген коноктор катышышты. Мелдеште 4 үй-бүлө өз ара спорттук жарыштарды өткөрүштү. Жыйынтыгында жеңүүчүлөргө баалуу белектер тапшырылды. З.Аскаров белек тапшырып жатып, дени сак улут күчтүү мамлекет экенин, үй-бүлө бекем болсо, мамлекет бекем болот деген пикирин билдирди.
№52 орто мектепте шаарыбыздагы мектептер аралык «Баарыбыз бирге» аттуу өздүк көркөм чыгармачылык конкурсу болуп өттү. Сынакта окуучулар жана мугалимдер тарабынан ыр, бийлер аткарылып, жеңүүчү болгон мектептер баалуу белектер менен сыйланышты.
Бул күнү шаар күнүнө арналган иш чаралар ак таңдай төкмө акындардын айтышы менен аяктады.
С.Ибраимов атындагы Ош улуттук драма театрында төкмө акындардын айтышы болду. Айтышка КРнын эмгек сиңирген артисти Амантай Кутманалиев, КРнын эл акыны Рахматтула Козукеев , КРнын маданиятына эмгек сиңирген ишмер Абдылда Нуралиев, акын Жыпар Арзымаматова, төкмө акын Калык Сатимкулов, төкмө акын Шайырбек Тургунбаев, ырчы, обончу, төкмө акын Абдибали Акимбеков, маданияттын мыктысы Мамел Исраилов катышышты.
Төкмө акындар Сулайман-Тоо, Ак-Буура, байыркы калаа тууралуу даңазалашып, Ош шаарынын күнү менен куттукташты.
Жыйынтыгында калаа башчы төкмө акындык касиет казак-кыргызда гана бар экенин, акындар элдин жарчысы болуу менен бирге, калкты ынтымакка, биримдикке үндөөрүн жана табиятынан чечен болгон акындардын шаар күнүнө арналган саамылыкка катышып жатканына ыраазы экенин белгилеп, чыгармачылык ийгилик каалады.
Ошондой эле мэр айтышка катышкан ар бир акынга 15 миң сомдон акча тапшырып, айрым акындарга 30 миң сомдон ыйгарды.
Ош шаарынын 3017 жылдыгына арналган салтанат
Борбордук аянтта Ош шаарынын 3017 жылдыгына арналган салтанат болду. Салтанатка Айтмамат Кадырбаев, шаардык Кеңештин төрагасы Жапарбек Ормонов, КРнын Ош облусундагы ыйгарым укуктуу өкүлүнүн орун басары Байыш Юсупов, бир катар өлкөлөрдүн шаарларынын өкүлдөрү катышты.
Өз сөзүндө А.Кадырбаев Ош шаарынын байыркы шаарлардан экенине токтолду.
- Батыш менен Чыгышты бириктирип турган Ош шаарына бүгүн 3017 жыл толду. Ушул 30 кылымдан ашык убактан бери Ош шаары канчалаган цивилизацияны баштан өткөргөнү тарыхтан белгилүү. Шаар күнү биз үчүн жөн гана катардагы күн эмес. Бул күн кылым карыткан тарыхы бар калаанын майрамы,- деди мэр.
Шаардык Кеңештин төрагасы Жапарбек Ормонов салтанаттын катышуучуларын куттуктап, шаарда көп улуттун адамдар жашарын, кылымдардан бери келе жаткан Ош берекелүү жер экенин, ар дайым элде биримдик, ынтымак болушун каалады.
Андан соң шаар күнүнө арналган салтанат башталды. Шаардагы мекеме-ишканалалардын кызматкерлери параддан өтүштү.Сахналаштырылган оюн-зооктор көрсөтүлүп, түрдүү улуттардын бийлери тартууланды. Ош шаары жөнүндө ырлар ырдалды.
А.Кадырбаев боордош шаарлардан келген өкүлдөрдү кабыл алды
Ош шаарынын күнүнө чакырылган расмий конокторду калаа башчы Айтмамат Кадырбаев кабыл алды.
Ош шаарынын күнү менен куттуктоо салтанатына РФнын Оштогу башкы консулу Роман Свистин, Казакстандын Оштогу элчиси, РФнын Новосибрск облусунун Калинин райондук администрациясынын өкүлү Ш.Герман, Түркиянын Амасия жана Йозгат шаарларынын вице-мэрлери, Өзбекстандын Андижан шаарынын өкүлү, Тажикстандын Худжант шаарынын өкүлү катышты.
Өз сөзүндө А.Кадырбаев Ош шаарынын күнүнө келген конокторго ыраазычылыгын билдирип, аталган шаарлар менен Ош шаарынын өз ара мамилелери мындан ары да арта берүүсүнө тилектештигин билдирди.
Коноктор өз кезегинде шаар күнү менен куттукташып, ар тараптуу достук мамилелерге даяр экендиктерин билдиришти.
«Ош Агро-II» айыл чарба техникаларынын көргөзмөсү
Майрамдык салтанаттан соң А.Кадырбаев баштаган топ «Өчпөс от» мемориалдык коплексинин жанында коюлган айыл чарба техникаларынын көргөзмөсүнө катышышты. Көргөзмө «Айыл-Банк» ААКнын колдоосу менен уюштурулуп, дан, чөп, жер айдоочу техникалар көргөзмөгө коюлган.
Мэр А.Кадырбаев көргөзмөнүн максаты дыйкандарды колдоо болуп саналарын жана кандай багытта иш алып барса болорун, ошондой эле көргөзмөгө коюлган айыл чарба техникаларынын мүмкүнчүлүктөрү жогору экенин баса белгилеп өттү.
Ага улай «Күз берекеси» аттуу айыл чарба товарларынын жарманкеси болду. Ага калаа башчы баштаган коноктор да күбө болушту. Жарманкеге күз мезгилинде бышып жетилүүчү жер-жемиштер, бал, сүт азыктары коюлду.
И.Раззаков эс алуу багы пайдаланууга берилди
Ушул күнү Манас-Ата аймактык кеңешиндеги И.Раззаков атындагы эс алуу багы пайдаланууга берилди. Ага мэр Айтмамат Кадырбаев, шаардык мекемелердин жетекчилери, жергиликтүү жашоочулар катышышты.
Өз сөзүндө калаа башчы акыркы үч жылда Ош шаарындагы сейил бактардын 90%ы реконструкциядан өткөндүгүн, 2018-жылы Ош шаарынын күнүнө Т.Сатылганов эс алуу багын да пайдаланууга берүү планда бар экенин айтты.
И.Раззаков багынын жалпы аянты 21998 чарчы метр. Жалпы сметалык баасы 14, 0 млн.сом, тендердик баасы 8 421 000 сом. Аталган паркты реконструкциялоо үчүн Ош шаарынын мэриясы 5 371 562 сом бөлүп берген, ал эми «Юз оф Ош» коомдук бирикмеси тарабынан 850 000 сом бөлүнсө, көрктөндүрүү жана жашылдандыруу чарба комбинаты тарабынан 2 млн.сом акча каражаты жумшалган.
Айта кетсек, акыркы үч жылдын ичинде 10 го чукул эс алуу жайы толук реконструкциядан өтүп шаардыктарга тапшырылган. Алар “Жеңиш”, “Ата-Түрк”, “Космонавттар”, “Семетей” жана башка эс алуу жайлары.
Гала концерт
С.Ибраимов атындагы Ош улуттук драма театрында эстрада жылдыздарынын коштосунда гала концерт өттү. Концерттин башталышында Ош шаардык мэриясынын аткарган иштери тууралуу видео баян көрсөтүлдү.
Эстрада ырчылары Омар, «Nonstop» дуэти, Аяна Касымова, Самара Каримова, Айпери Кулбаева өңдүү бир катар ырчылар эс алганы келген шаардыктарга көңүлдүү маанай тартуулашты.
Бексултан Нуркамил уулу Фото С.Токонов
Ошто "YUG-Stroy" жана " YUG-Energy 2017" жарманкеси уюштурулду
Понедельник, 25 Сентябрь 2017 04:13 Автор Назгүл
19-21-сентябрда Ош шаарында төртүнчү адистештирилген "Курулуш - YugStroy 2017» жана "Энергетика жана жарыктандыруу - YugEnergy 2017» көргөзмөсүнүн расмий ачылуу аземи болду. Ага Ош шаарынын биринчи вице-мэри Замирбек Аскаров, Өкмөттүн Ош облусундагы ыйгарым укуктуу өкүлүнүн орун басары А.Махамадов, КРнын өкмөтүнө караштуу архитектура, курулуш жана турак жай-коммуналдык чарба башкармалыгынын башчысы Бактыбек Курманалиев, "BiExpo”ЖЧК көргөзмө компаниясынын жетекчиси Виктор Линовицкий, мекеме-ишканалардын жетекчилери, шаар тургундары жана жеке ишкерлер келип катышты.
Биринчи вице-мэр Замирбек Аскаров акыркы учурларда Ош шаарында түрдүү жарманкелер өтүп, ага чет мамлекеттерден, кошуна өлкөлөрдөн ишкерлер келип, бизнести өздөштүрүп жаткан ишкерлер менен тажрыйба алмашып жаткандыгы жакшы жышаан экендигин белгилеп өттү.
“Ош шаарынан Улуу Жибек Жолу өткөн, батыш менен чыгышты, түндүк менен түштүктү бириктирген, соода-сатык жүргөн шаарлардын катарын толуктайт. Андыктан бир нече мамлекеттен келген ишкерлердин башын бириктирген 3 күндүк жарманкеге ийгилик каалайм. Жеке ишкерлер тажрыйба алмашып, келишимдер түзүлсүн. Курулуш, жарыктандыруу багытында Ош шаарынын мэриясы тарабынан бир топ алгылыктуу иштер жүрүп жатат. Учурда жарыктандыруу багытында кызуу иштер жүрүп, Керме-Тоо аймактык кеңешинде көп кабаттуу үйлөрдүн короолорун жарыктандыруу долбоору ишке ашып жатат. Бир жарым айдын ичинде шаардагы бардык көп кабаттуу үйлөрдүн короолорун, балдар аянтчаларын жарыктандырып бүтөбүз. Электр энергиясын үнөмдөгөн, сапаттуу чырактарды сатып алууда дал ушундай жарманкелерге катышкан компаниялардын жардамы чоң ”,- деди З.Аскаров.
Белгилей кетсек,"YugStroy 2017” көргөзмөсү өзүнө "Курулуш жана интерьер, жылытуу жана желдетүүнү, терезелерди, эшиктерди, фасаддарды” камтыган түштүк региондогу курулуш индустриясындагы эң маанилүү жана олуттуу көргөзмө долбоору болуп эсептелет. Ал эми "Энергетика жана жарык берүү” багытын көрсөткөн "YugEnergy” көргөзмөсү үйлөргө, короолорго жарык берүү, жылытуу жана терможөнгө салуу жаатындагы алдыңкы технологияларды камтыйт.
Жарманкеде Беларусь, Германия, Казакстан, Канада, Кытай, БАЭ , Россия, Түркия, Украина, Чехия жана Түштүк Корея сыяктуу 12 өлкөдөн келген, 35тен ашуун компаниялар өз продукцияларын жергиликтүү керектөөчүлөргө тааныштырышты.
Ош шаардык мэриясынын Жапалак айылдык-аймактык башкармалыгы башка аймактык кеңештерден жайгашышы, чарба жүргүзүүсү жагынан бир топ айырмаланып турат. Бул жолу башкармалыктын ишмердүүлүгү тууралуу сөз кылабыз.
13 айылдан турат
Жапалак айылдык-аймактык башкармалыгынын курамына 13 айыл кирет. Жеринин аянты 103 чарчы км.. Жашоочулардын саны 29006, 5244 кожолук бар, калкы көп улуттуу. Башкармалыктын аймагында калктын саламаттыгын көзөмөлдөөчү 8 медициналык пункт жана №1 үй-бүлөлүк дарыгерлер борборунун №6 филиалы жайгашкан. Калктын кирешелүү тармагы айыл чарба тармагы. Башкармалыктын жамаатында 29 адам эмгектенет. Жетекчиси Санжар Эшманов, жетекчинин орун басары Ыктыяр Бердиев.
Башкармалыктын жетекчиси Санжар Эшманов калк камын көрүүдө башкармалык кандай иштерди жасап жаткандыгы тууралуу буларга токтолду.
- 1996-жылы өлкө боюнча жер реформасы жүргөндө, биздин айылдык-аймактык башкармалыктын жерлери элге үлүш катары бөлүнүп берилген. Мамлекеттик фонддогу суулуу жерлер 313 г. кайракы айдоо жерлер 684 г. ал эми 45 г. чөп чабык жерлер. Мамлекеттик фонддун жоболору боюнча, жер кыска мөөнөткө 5 жылга чейин, орто мөөнөткө 25 жылга чейин, узак мөөнөткө 49 жылга чейин берилет деп көрсөтүлгөн. Ошол көрсөтүлгөн жоболор боюнча биз жерлерди элге бөлүштүрүп бергенбиз. Эл ал жерлерге жашылча, мөмө-жемиштерди эгишет.
«Жерлерди элге бирдей бөлүштүрүп беребиз»
- Башкармалыкка караштуу мамлекеттин фондундагы жерлер элге ижарага берилет. Суу жетпеген жерлердин 1 гектарынын ижара акысы жылына 2000 сомдон. Суу барчу жерлерге жылына 4-5 миң сомдон төлөшөт. Бирок жер тартыштык маселеси бар. Суулуу жерлерди жашоочулардын санына карап 5-10 сотыхтан бөлүп беребиз.
«Быйыл эки эсе көп түшүм алдык»
- 2016-жылы планда көрсөтүлгөн иштер толугу менен аткарылды. Биздин башкармалык калк менен тыгыз иш алып барат. Элдин колундагы мал жандыктардын дени сактыгын көзөмөлдөө, мал жандыктарын жугуштуу ылаңдарга каршы дарылоо боюнча түшүндүрмөлөрдү берүү биздин милдет. ӨКМ, айыл башчылары менен биргеликте сел коркунучу туулган жерлер боюнча иш алып барабыз. Айылдагы жерлерге мониторинг жүргүзөбүз. Сел коркунучу туулган жерлер болсо тиешелүү чараларды көрөбүз. Элге колубуздан келишинче шарттарды түзүп беребиз. 2016-жылы планда көрсөтүлгөн иштер толугу менен аткарылып, 2017-жылга көрсөтүлгөн иштер өз нугунда жүрүп жатат. Быйыл жамгыр көп жаап, кайракы жерлерге эгилген кылкандуу өсүмдүктөрдүн түшүмү жакшы болду. Жылда кайракы жерден 1,5 центнер түшүм алынса, быйыл 2,5 центнерден түшүм алынды. Мындан сырткары оруп-жыйноо мезгили жакшы болуп, элдер мал жандыктарына чөп жыйнап алышты. Учурда жүгөрү жыйноо мезгили башталды. Жылдагыга салыштырмалуу быйыл жүгөрүнүн түшүмү да жакшы болду. Жакында 2018-жылга жерлерди даярдоо иштери башталат. Калктын колунда 46 трактор бар. Биз айыл башчылар аркылуу алар менен сүйлөшүп, тракторлорду айдоо иштерине даярдайбыз. Кылкандуу дан өсүмдүктөрүн оруп-жыйноо үчүн 6 комбайн бар.
«Мэрия бизге жакшы көңүл бөлүүдө»
- Былтыр шаардык мэриянын каржылоосу менен 5-6 км. жолго асфальт төшөлдү. Быйыл да бир топ иштер жүрүп жатат, мисалы, Качыбек айылында, Кеңештин Соколок учаскасында асфальт төшөө иштери аягына чыгып калды. Мындан сырткары мэрия тарабынан Ош-Ноокат жолунан Ош-Араван жолуна чейин 9 км. жолго түнкү чырактар орнотулду.
Бизде мурун таза суу көйгөйү жаралчу, учурда ал маселе да чечилген. Калкыбыз саат-сааты менен таза суу алып турушат. Буюрса, кошумча суу кампалары бүтүп калса биздин айылдык-аймактык башкармалыктын эли толугу менен таза суу менен камсыз болот. Биздин башкармалык үчүн бир топ ыңгайлуу шарт түзүлүүдө. Алсак «Газпром» ишканасы тарабынан азыркы тапта газ куурлары тартылууда. Буюрса, Жапалак эли 2020-жылга чейин газ менен толук камсыз болуп калат.
Кадырбек Уларов, башкармалыктын башкы адиси:
«Быйыл түшүм мол болду»
- Илгертен эле Жапалактын эли шаарыбыздын базарларын мөмө-жемиш, жашылча-жемиштер менен камсыздап келген. Учурда да бул иштер уланууда. Биз айыл башчылары жана аппарат жетекчилери менен биргеликте штаб түзгөнбүз. Дыйкандарды чогултуп, аларга айыл чарба багытында кеңештерди берип, жер иштетүү боюнча жаңы ыкмаларды үйрөтөбүз. Ошонун негизинде элдер жерлерине тиешелүү жашылча-жемиштерди эгишет. Натыйжасы жаман эмес, быйыл түшүм мол болду. Жазгы түшүм да, күзгү түшүм да жакшы.
Дыйкан демекчи, айыл чарба өндүрүшүн жогорулатуу максатында быйыл «Айыл банк» менен биргеликте дыйкандарга семинар уюштурдук. «Айыл банктын» кызматкерлери дыйкандарга жеңилдетилген насыя берүүгө даяр экенин айтышты.
«Күнөсканалардын саны жылдан жылга көбөйүүдө»
- Жылдан жылга элибиздин жашылча-жемиштерди өстүрүүдөгү тажрыйбалары артууда. Бул тармактын пайдалуу экенин билип, жылдын суук айларында да жашылча-жемиштерди өстүрүү боюнча иш алып барышып күнөсканаларды курушкан. Мисалы 2015-жылы 1,5 гектар жерде күнөсканалар бар болсо, 2016-жылы алардын саны эки эсе өсүп 3 гектар болду. Учурда 5-6 гектар аянтты ээлеген күнөсканалар бар.
Эрте жазда капуста, помидор, бадыраң жана башка жашылчаларды күнөскана ээлери базарга алып чыгышат. Ушул күнөсканалардын эсебинен ээлери киреше булагын чыңдап алышты. Күнөсканаларды куруу түйшүгү оор, бирок куруп бүткөндөн кийин пайдасы жакшы боло тургандыгы бүгүнкү күндө белгилүү болуп калды.
Бексултан
Нуркамил уулу
Ашимжан Семетеев: «3 жыл ичинде 100гө жакын объект мэриянын балансына кайтарылды»
Понедельник, 18 Сентябрь 2017 04:21 Автор Назгүл
Ош шаардык муниципалдык менчик башкармалыгы тарабынан акыркы 3 жыл аралыгында 100 дөй социалдык обьект шаардык мэриянын балансына кайтарылган. Ушул жана башка маалыматтар тууралуу аталган мекеменин жетекчиси Ашимжан Семетеев маалымат берди.
«Шаардык Кеңештин токтому менен мэриянын ыйгарым укуктуу ишканасы болуп калдык»
- Мекеме Өкмөттүн токтому менен ыйгарым укуктуу ишкана деп жоболору бекитилген. Бирок, кайсыл башкармалыкка баш ийиши жөнүндө көрсөтүлгөн эмес. Ушулардын негизинде шаардык Кеңешке кат жолдогонбуз. Шаардык Кеңештин токтому менен мэриянын ыйгарым укуктуу ишканасы болуп калдык. Мэриянын балансындагы бардык социалдык мекемелердин, билим берүү мекемелеринин, саламаттыкты сактоо мекемелеринин мамлекеттик актысын алганбыз. Ошого жараша бир катар ишканаларга бөлүп бергенбиз. Жолдор башкармалыгына, эс алуу бактары жашылдандыруу комбинатына бөлүштүрүлгөн.
«Башкармалыкта тажрыйбалуу адистер эмгектенет»
- Биздин башкармалыкта жалпысынан 36 адам эмгектенет. Бөлүмдөр боюнча айтсам, муниципалдык мүлктөрдү тариздөө (экономика) бөлүмү бар. Бул бөлүмдө жер тилкелеринин, имараттардын, техпаспорттордун мамлекеттик актылары сакталып турат. Жер тилкелерин ижарага берүү бөлүмү бар. Көрсөтүлгөн мыйзамдын негизинде жер тилкелерин ижарага берет. Жер укуктарын сатуу бөлүмү иштейт. Мыйзамсыз курулуштарды алып салуу жана мүлктү көзөмөлдөө бөлүмү иш алып барат. Бул бөлүм дагы өздөрүнө тиешелүү иштерди аткарат. Жарнак жана дизайн бөлүмү бар. Бул бөлүм мэриядагы тил комиссиясынын негизинде иштейт. Мындан сырткары юридикалык бөлүмү бар. Бөлүмдө мыкты юристтер эмгектенет. Бүгүнкү күнгө чейин кандай жетишкендиктерге жетишсек, бөлүмдөрдөгү адистердин эмгеги менен болду деп эсептейм.
«Сот аркылуу жеке тарап жер тилкелерин өздөштүрүп алышкан»
- Буга чейин жеке тараптар УМСтен жер тилкелерин ижарага алышып, көп убакыт өткөндөн кийин тааныш-билиштери аркылуу сотко кайрылып, соттун чечими менен жеке менчикке айландырып алышкан. Бирок УМСтин балансындагы жерлер эч качан соттун чечими менен жеке тарапка берилсин деген бүтүм жок. Шаардык мэриянын токтому менен гана берилсин деген бүтүм бар. Ушул нормага таянып, жеке тараптарды сотко берип, менчиктештирилген жерлерди кайра кайтарып жатабыз.
«Учурда 1 см. да жер сатылган жок»
- Биздин башкармалык өз милдеттерин так аткарып келүүдө. Сөзүмдүн башында жетишкендиктерибиз тууралуу белгилеп өтөйүн. 2012-жылы башкармалыктын кирешеси 11 млн. сом болсо, бүгүнкү күндө 40 млн.сомго жеткирдик. Мурда жерди сатып эле планды толтуруп коюшкан экен. Баса белгилеп өтөйүн, учурда 1 см. жер да сатылган жок. Дагы бир жагдай, мэрияга карай турган бир дагы бассейн калбаптыр. Баары жеке менчик тарапка өтүп кеткен экен. Мындан сырткары сейил бактар да жеке тарапка өтүп кеткен.
«Сейил бактар да менчикке өтүп кеткен экен»
- Муниципалдык менчикти көзөмөлдөгөндөн кийин милдеттемелерди жакшы аткарыш керек. Бул жаатта алгылыктуу иштерди жүргүзүп жатабыз. Жогоруда сөз кылганымдай, жеке тарапка өтүп кеткен социалдык обьектилерди, жерлерди, парктарды кайра кайтарып алдык. Бүгүнкү күндө кайтарып алган обьектилер ижарага берилген. Жеке тарапка өтүп кеткен бассейндерди шаардын балансына өткөрүп, ижарачыларга бердик. Мындан сырткары №9 эмкананы (азыр №1 YБДнын № 3 филиалы), Черемушки кичи районундагы №3 эмкананы, Раззаков скверин, Жеңиш паркын, Түштүк-Чыгыш кичи районундагы кышкы муз тебүүчү аянтча жеке тараптан кайтарып алынды. Ошолордун негизинде шаардын казынасын тийиштүү өлчөмдөгү сумманы чогултуудабыз.
«10 дон ашык объектилердин иши сотто турат»
- Буга чейин бир дагы сот ишинен утула элекпиз. Биздин башкармалыктын юристери татыктуу иштеп жатышат. Ошонун негизинде сотто шаардын балансына тиешелүү, бирок жеке тарапка өтүп кеткен жерлерди кайтарып алуудабыз. Учурда 10 дон ашык объекттердин иши сотто турат. Буюрса, буларды дагы кайтарып алабыз. Алдыда дагы кайтарып ала турган объекттер, жер тилкелери көп, акырындык менен бардыгын муниципалдык менчикке кайтарабыз. Мындан сырткары Тилеке-Баатыр көчөсү менен кесилишкен «Сымбат» тейлөө үйү (дом быта) кичи районунда жайгашкан көпүрөнүн түбүндө "Кремль" деген түнкү клуб жайгашкан. Анын ээси жөн эле турган жерди сотко берип өздөштүрүп алган. Бул боюнча соттук иштер жүрүп жатат. Буюрса, утабыз деп турабыз.
Биздин ишибиз күндөн-күнгө алдыга жылууда. Бир тараптын кызыкчылыгынан көрө, ошол объекттен шаарыбыздын миңдеген тургундары пайда көрсө биз үчүн сыймык болот жана шаардын жашоочуларынын кызыкчылыгы үчүн иштерди аткаруу биздин милдет деп билем.
«Учурда жерлерди 1 жылга гана ижарага берип жатабыз»
- Мыйзам боюнча жерлерди 5 жылга жана 50 жылга ижарага берүү көрсөтүлгөн. Бирок, элүү жылда ким бар, ким жок дейсиз. 50 жылга ижара берилген жерлер бара-бара унутулуп кетет да жеке тарап аны өздөштүрүп алат. Ошондуктан биз учурда башкача жолдорду колдонуп жатабыз. Жеке тарапка ижарага 1 жыл мөөнөтүн гана берип жатабыз. Бул оңой жол. Ижарага берилген жер унутулбайт. Анан албетте, 1 жылдан кийин жеринин мөөнөтүн узартуу үчүн келишет.
Менчиктин үч түрү бар. Мамлекеттик менчик, муниципалдык менчик, жеке менчик. Эгер мамлекеттик же жеке менчик болуп эч жерде катталбаган объект болсо муниципалдык менчик болуп эсептелет. Кудай буюрса, жерлерди каттоодон өткөрүүдөбүз.
Бексултан
Нуркамил уулу
Бир канча жыл башта жеке менчикке узак мөөнөткө ижарага берилип, каралбай кеткен И.Раззаков эс алуу жайы кайрадан муниципалдык менчикке кайтарылып алынган эле. Жакын арада көрктөндүрүү жана жашылдандыруу чарба комбинаты тарабынан толук оңдоп-түзөөдөн өткөн эс алуу багы эс алуучулардын пайдалануусуна берилгени турат.
Иманбек Советбеков, комбинаттын кызматкери:
“Эс алуу жайын элге кайтарып алууда мэриянын эмгеги чоң”
-Бул бакты элге кайтарып берүүдө шаардык мэриянын эмгеги чоң. Эл эс алчу жай каралбай кор болду, биз - ушул кичи райондун тургундары кайда барып эс алабыз деген тургундардын суроосу боюнча мэрия эс алуу багын кайрадан элдин менчигине өткөрүп берди.
Эс алуу жайды оңдоп-түзөөдөн өткөрүүгө Ош шаардык мэриясы тарабынан 6 000 000 сом акча каражаты бөлүнгөн. Биз түзгөн долбоордун негизинде тендер жарыяланып, тендердин сметалык баасы 14 084 000 сомду түздү. Көрктөндүрүү жана жашылдандыруу ишканасы каражатты үнөмдөө максатында тендер жарыялап, анын жыйынтыгында мэрия бөлүп берген 6 000 000 сомдун 4 855 100 сому курулуш иштерине жумшалды. Мындан сырткары ушул долбоордун негизинде «УоuthofOsh» фонду тарабынан 850 миң сом, Көрктөндүрүү жана жашылдандыруу комбинаты тарабынан 2 000 000 сом бөлүнүп, эс алуу жайынын реконструкциялоо иштери жүргүзүлдү.
Оштогу жашылдандыруу жана көрктөндүрүү комбинатынын эс алуу бактары боюнча кызматкери Максаткан Аманова:
- И.Раззаков атындагы эс алуу багы бүгүнкү күндө толук кандуу оңдоп-түзөөдөн өткөрүлдү. Буга чейин 45 жылга жеке ишкерге ижарага берилип, кароосуз калган жер эле. Шаардык бийлик жергиликтүү жашоочулардын арызы менен бул жайды кайрадан муниципалдык менчикке өткөрүп берди. Ал эми оңдоп-түздөөнү биздин комбинат колго алган. Учурда бардык иштер бүтүп пайдаланууга берилүү астында турат. Бул иште «Юз оф Ош» коомдук бирикмеси жалпы суммасы 850 миң сомду түзгөн балдар ойноочу аянтча куруп беришти. Ал эми биздин комбинаттан жалпы оңдоп-түзөөгө 2 млн. 186 миң 71 сом каражат жумшалды. Бүгүнкү күндө сейил бак колдонууга даяр. Жакын арада ачылуу аземинин болушун күтүп жатабыз.
Айбек Самиев, Манас-Ата аймактык кеңешинин жашоочусу:
-Эс алуу багынын оңдолуп, шаар тургундарынын пайдалануусуна берилиши өтө көңүл кубанарлык жаңылык. Шаар жетекчилигине, көрктөндүрүү комбинатына терең ыраазыбыз. Башта каякка басарыбызды билбей баш катчу. Эми минтип балдар менен келип каалагандай эс алып отурабыз.
Масим Турсунбекова
Көп кабаттуу үйлөрдүн алдына түнкү чырактар коюлууда
Понедельник, 18 Сентябрь 2017 03:58 Автор Назгүл
13-сентябрь күнү Ош шаарынын мэри Айтмамат Кадырбаев шаардагы көп кабаттуу үйлөрдүн алдын түнкү жарык менен камсыз кылуу иштери менен таанышты.
Анын негизинде СМУТТ, Аскер шаарчасы, Кулатов, Төлөйкөн кичи райондорунда жайгашкан көп кабаттуу үйлөрдүн алдында орнотулган түнкү жарыктар текшерилди.
Шаар мэри шаар тургундары менен баарлашып жүрүп көчөлөрдү жана көп кабаттуу үйлөрдүн алдын түнкү жарыктар менен камсыз кылуу Ош шаарын өнүктүрүү программасындагы негизги багыттардын бири экенин билдирди.
Айтмамат Кадырбаев, Ош шаарынын мэри:
“ Бир жарым ай ичинде бардык көп кабаттуу үйдүн алды толук жарыктандырылат”
- Ош шаарын өнүктүрүү программасын кабыл алып жатканда, негизги багыттардын бири катары көчөлөрдү жана үйлөрдүн алдын толугу менен түнкү жарыктар менен камсыз кылууну киргизгенбиз. Программанын алкагында акыркы үч жылда шаарыбызда 174 чакырым жолго түнкү жарыктар орнотулду. Учурда жергиликтүү бюджеттин эсебинен 30 млн. сом бөлүнүп, шаарда жайгашкан 640 көп кабаттуу үйлөрдүн алдына түнкү жарыктар орнотулууда. Бул иш-аракеттер шаарыбыздын тургундары, жаш балдар үчүн ыңгайлуу шарттарды түзүп, коомдук тартипти сактоодо, кылмыштуулуктун алдын алууда жардамын көрсөтөт деп айтууга болот. Буюрса, бир жарым айдын ичинде шаардагы бардык көп кабаттуу үйлөрдүн алдына светодиоддук чырактар орнотулуп пайдаланууга берилет,-деди А.Кадырбаев.
Ошондой эле А.Кадырбаев тиешелүү адистерге аткарылып жаткан жумуштун сапатына көңүл бурууну жана аяктоо мөөнөтүнө бүтүрүүнү тапшырды.
Айта кетсек, №5 Керме-Тоо аймактык кеңешине караган СМУТТ, аскер шаарчасы, Кулатов, Төлөйкөн жана Анар кичи райондоруна баары болуп 100 ВТ кубаттуулугундагы 100 дөн ашык заманбап үлгүдөгү электр энергиясын үнөмдөөчү чырактар орнотулду. Жалпысынан 40 башкаруу щитин орнотуу каралган.
Дайджест---------------------------------
ЖЕР ТИТИРӨӨ КАЙСЫЛ АЙМАКТАРДА, КАНЧА БАЛЛГА ЖЕТТИ
Среда, 18 Ноябрь 2015
Спорт
Аброр Хакимов, спортчу: «Чыныгы спортчу көчөдө күч колдонбойт»
Маданият
Легендарлуу «Кыз- Бурак» тобуна 40 жыл
Интервьюлар---------------------------
Күйөөмө кредит алып берсем төлөбөй койду
Понедельник, 09 Сентябрь 2019-
Сухбатила Мирзаев, Ош шаардык Кеӊешинин депутаты: «Кыргызстанды эч бир өлкөгө салыштырбайм»
Понедельник, 02 Сентябрь 2019 -
Гүлмира Турдубаева, Ош шаардык Кеӊешинин депутаты: «Кыргызстандын эӊ чоӊ байлыгы - эл»
Понедельник, 02 Сентябрь 2019
Сурамжылоо-----------------------
Ош шаарынын тазалыгына кандай баа бересиз?
Добуштардын саны:: 38
Билим берүү-----------------------
Доор жана басма сөз
Понедельник, 16 Ноябрь 2015
-
ЧЫҢГЫЗ АЙТМАТОВДУН ААЛАМЫ
Понедельник, 12 Декабрь 2016 -
Сарык оорусу
Понедельник, 11 Сентябрь 2017 -
ФУТБОЛ академиясы ачылды
Понедельник, 16 Октябрь 2017
-
гидра - Hydra отзывы, ссылка hydra
-
гидра интернет магазин - hydraruzxpnew4a f, зеркало hydra
-
hi :) bross :)
-
Мен Мураталы энурез оруйм кенеш берсездер канча жыл кетет дарыланганга 0705738140
Ош шамы коомдук-саясий гезити
Толугу менен...