Сирияда Башар Асаддын режими кулагандан берки эң ири нааразылыктар тутанды. Буга убактылуу өкмөттүн дизель майын 40%га, бензинди 28%га кымбаттатуу чечими себеп болду. Бийлик муну дүйнөлүк баалардын өсүшү жана Банияс мунай заводунун оңдоп-түзөөгө жабылышы менен түшүндүрдү. Энергетика министри өлкө суткасына болгону 102 миң баррель мунай өндүрүп, 325 миң баррель керектегендиктен, импортко көз каранды экенин айтты. Кымбатчылыктан чочулаган тургундар Дамаск, Алеппо, Хама жана Камышлы шаарларында жолдорду тосуп, дөңгөлөктөрдү өрттөштү. Эл бул чечимди жакыр катмарга каршы сокку деп баалап, «Ачарчылык саясатына жол жок!» деген ураандар менен чыгууда. Бул кризис жаңы өкмөт үчүн алгачкы оор сыноо болуп калды.
About The Author
