Асел Касымова: «Ырда да, стилде да — ɵзʏмдʏн табиятымды алып чыгам»

Сахнада сырдуу, жашоодо тʏз жана жɵнɵкɵй Асел Касымова менен болгон бул ачык маек — ойлонууга тʏрткʏ берген, кээде жылмайтып, кээде жашоонун терең маңызын ачып берген жʏрɵккɵ жакын маек болду.

— Акыркы убакта сахнадан азыраак кɵрʏнʏп жаткандайсыз. Бул чыгармачылыгыңыздагы тыныгуубу же кайра жаралуунун мезгилиби?

— Сахнадан такыр эле алыстап кеткен жокмун. Болгону иштеп жʏргɵнʏмдʏ ар дайым эл алдына чыгарып, бɵлʏшɵ бербеген адам окшойм. Жаңы ыр, жаңы клип сыяктуу менде жаңылык болушу керек эле. Бирок азырынча ɵзʏмдʏ толук канааттандырган ырды тандай албай, клип тартуу да артка жылып турат. Жаңы чыгарма жаратуу ʏчʏн бир нерсе жетишпей жаткандай. Кɵңʏлʏмɵ ырлар жакпай, «мен издеп жаткан ыр ушул!» деген ыр табыла элек учурдамын.

— Ыр жазууга сизге эмне тʏрткʏ болот: сʏйʏʏбʏ, кайгыбы же “эргʏʏбʏ”?

— Негизги тʏрткʏ – “илхам” десем туура болот. Ар кандай учурлар да болот. Кээде сʏйʏʏдɵн азап чегип жаткандай ырдасам да, ошол учурда жашоомдо андай кайгы болбогон учурлар болгон. Башыбыздан ɵткɵрмɵйʏнчɵ сɵздʏн, кайрыктын терең маанисине жетиш кыйын тура. Бирок айтып коёюн, кийинчерээк дал ошол кайгылуу ырлар мени жашоодо да ушундай абалга алып келгендей болду. «Ойлор материалдуу болот», «Энергияны ɵзʏң чакырасың» деген тʏшʏнʏктɵр бар эмеспи, балким, ошол кейиштʏʏ толкунду ɵзʏм тартып алгам. Азыр кайгылуу ырларды ырдагым келбейт. Менин кɵңʏлʏм азыр шаңдуу, позитивдʏʏ обондорду талап кылууда. Ошол маанайга ылайык ырларды издеп, ошол толкунда жʏрɵм.

— Сиздин стилиңиз эркин стиль. Бул образ сахнанын талабыбы же сиздин табитиңизби?

— Чынын айтсам, мейли канча образ тандаба, адамдын ичиндеги табити, жан дʏйнɵсʏнʏн жагдайы баары бир жʏзʏнɵ, кийгенине, кыймыл-аракети менен ыр тандоосунда билинип калат экен. Образ деген нерсе – бир ырда, ашып кетсе ʏч ырда жашай турган кɵрʏнʏш. Мен тренд деп бирɵɵнʏн стилин кɵчʏрʏп, ɵзʏмдʏ “ɵзгɵчɵ” кылып кɵрсɵткʏм келбейт. Эмне жакса ошону кием, жʏрɵгʏмɵ жаккан ырды ырдайм. ʏйдɵ да, кɵчɵдɵ да, дал ушундай кийинем. Сахнадагы Асел менен жашоодогу Аселде айырма жок. Демек, бул образ сахнага гана тиешелʏʏ эмес, менин табиятымдын чагылышы

— Стилиңизге байланыштуу коомчулукта айтылган сындар же стереотиптер болдубу? Алардын сизге тийгизген таасири?

— Стереотип деген ɵзʏ эле айтып турат — бул эски тʏшʏнʏк. Жашоо меники, демек тандоо да меники. Эмне ʏчʏн мен бирɵɵнʏн каалоосу менен кийинишим керек? Ар ким ɵзʏ каалагандай жашашы керек. Бирɵɵгɵ ɵз оюңду таңуулап, жашоосуна кийлигишʏʏ мен ʏчʏн туура эмес. Ар бирибиз адамдын жеке чек арасын билип, аны сактаганды ʏйрɵнʏшʏбʏз керек. Анан бара-бара ɵнʏгʏп, ɵсʏп атабыз деген менен кɵп учурда ушул чʏпʏрɵку чоң проблема кылгандар кɵбɵйʏп кетти. Албетте, баары эмес. Аялдардын кийимине асылып, ушул чʏпʏрɵктʏ узарса эле жашоо оңолуп кетчʏдɵй айтышат. Андайларга айткым келет: “Бɵтɵндʏн кийимине асылгандан кɵрɵ, ɵз жашооң менен алек бол”. Балким бирɵɵ ʏчʏн бул туура эместир, бирок менин кɵз карашым ушундай.

Кантсе да ырчы болуп, эл алдында жʏргɵн соң, мындай сɵздɵргɵ, сын-пикирлерге кɵнʏп калат экенсиң. Бул деле жашоонун бир мектеби. Кышты кайра-кайра кʏйгʏзɵ берсе, ал акыры бышып, бекем кирпичке айланат эмеспи. Биз да ошондойбуз — улам-улам уккан сɵз, кɵргɵн сыноо бизди катуулатып, бекем кылат экен. Мурда мындай сындар жʏрɵккɵ тиет эле, азыр болсо тескерисинче, кɵңʏл деле бурбайм. Себеби, мен киммин, эмнеге татыктуумун — муну ɵзʏм жакшы билем.

— Сахнадагы Асел менен жашоодогу Асел Касымова кандай адам?

— Сахнада менин образым элге назик, созулган кыздай кɵрʏнɵт окшойт. Бирок жашоодо тескерисинче, тааныштарым бетиме айтпаса деле угуп калам — “стерва” экенмин (кʏлʏп). Баары менен ачык баарлашып, бетке айткан адаммын. Ошондуктан, “ыйлагандын кɵзʏ жаман, айткандын оозу жаман” дегендей, мени ушул сапаттарым ʏчʏн “стерва” деп коюшат окшойт. “Баарына бирдей караш керек”, — деген кичинебизде уккан насааттар азыркы жашообузга туура келбей калгандай.Азыркы менин мамилем кʏзгʏдɵй: ким кандай болсо, мен да ошого жараша.

— Эң акыркы кɵргɵн тасмаңыз сизге кандай таасир калтырды?

— Жакында «Атактуу» (англ.Celebrity) деген тʏштʏк-кореялык сериалды кɵрдʏм. Азыркы заманбап социалдык жашоону, идеалдуу кɵрʏнʏшкɵ умтулууларды, катталуучулардын санын кɵбɵйтʏʏ ʏчʏн жʏрʏп жаткан «жарыш» тууралуу баяндайт. Катталуучулары кɵбɵйгɵндɵ эле белгилʏʏ адамга айланып, ɵзгɵрʏп кеткен адамдар жɵнʏндɵ сериал. Мен ʏчʏн бул сериал ɵзгɵчɵ таасир тийгизди деп айта албайм, бирок ɵзʏм ʏчʏн терең бир анализ жʏргʏзʏʏгɵ мʏмкʏнчʏлʏк берди десем болот. Мурунку жашоодогу баалуулуктар менен азыркы жашоодогу баалуулуктарды салыштырдым. Бул мен кɵргɵн жасалма жарнама, жасалма кɵрʏнʏш жасаган, “эл кɵзʏнɵ улук болуп кɵрʏнгɵнгʏсʏ” келгендердин чыныгы жашоосундагы жʏзʏн кɵрсɵтʏʏчʏ сериал экен.

— Бʏгʏнкʏ Асел – 5 жыл мурунку Аселден эмнеси менен айырмаланат?

— 5 жыл мурунку Асел азыркы Аселдин тескериси эле. Кɵңʏлчɵɵк, ийкемдʏʏ Асел эле. “Жыгачтын жумшагын курт жейт”, — дейт эмеспи. Ошол “курттарды” ɵз жашооңдо кɵргɵндɵн кийин, чындыгында темир боло баштайт экенсиң. Мен азыр темирге айландым. Убагында жумшак жыгач болгом. Бирок азыр мен кандай Асел болбоюн, жашоонун ысык-суугун кɵрʏп, бышкандан кийинки Аселмин. Жашоонун талабынан келип чыккан Аселмин десем болот.

— Социалдык тармактардан келген эң таң калычтуу комментарий?

— Жакшы ой менен жазышат, тʏшʏнɵм, бирок, «ушул кыз ушунчалык жакшы, эркектер эмнени карап жʏрʏшɵт?» деп жазып коюшат. Эч ким карабай койгондой, бир байкуштай сездирген комментарийлер. Ар бир адамдын ɵзʏнʏн теңи бар дегендей, мен кʏйɵɵгɵ тийсем да, тийбесем да — бул менин ɵз тандоом. Эрге тие албай жʏргɵндɵй кɵз караш менен караган адамдарды мен тʏшʏнɵ албайм. Ошол нерсе мени таң калтырат.

— Жашоодогу ураныңыз же эмнеден мотвация аласыз?

— Жашоомдо ɵзʏм кабылган окуяларды анализдеп, ɵзʏмɵ бир тыянак чыгарам. Эң кʏчтʏʏ тарбия — бул жашоонун ɵзʏ берген тарбия. Мыкты психолог сага сабак берсе да, сен аны башынан ɵткɵрмɵйʏнчɵ чыныгы маанисин тʏшʏнбɵйсʏң. Канчалык деңгээлде маанилʏʏ нерселерди айтып жатканына карабай, башынан ɵткɵндɵн кийин гана тыянак чыгарып, баалап биле аласың.

Сахнага аралашканыма ɵкʏнбɵйм. Албетте, кыйынчылыктар болгон, бирок ошол кыйынчылыктардан аман чыгып жатпайбызбы? Демек, бул чыныгы кыйынчылык деле эмес экен. Жашоону кыйындаткан — биз ɵзʏбʏз. Ошол сыноолордун баарын жеңип чыккан Аселден мен мотивация алам. Девизим — дайыма алдыга!

Гульнура Ормонова